ԱՀԿ-ն հայտնել է, որ եվրոպական երկրները պետք է պատրաստ լինեն կորոնավիրուսի վերադարձին

Եվրոպական երկրները պետք է պատրաստվեն նոր կորոնավիրուսի վերադարձին։ Այդ մասին հայտնել է Առողջապահության համաշխարհային կազմակերպության (ԱՀԿ) Եվրոպական տարածաշրջանային բյուրոյի ղեկավար Հանս Կլյուգեն լրագրողների հետ օնլայն ճեպազրույցի ժամանակ։

«Մենք պետք է օգտագործենք մեր ունեցած յուրաքանչյուր հնարավորություն, որպեսզի նախապատրաստվենք և ավելացնենք ինչպես արտակարգ իրավիճակներում բուժօգնության մատուցման համակարգի, այնպես էլ պլանային բուժօգնության մատուցման համակարգի պատրաստվածության մակարդակը։ Այլ կերպ ասած՝ մենք պետք է լավագույնի հույս ունենանք, բայց պատրաստվենք վատագույնին, այն է՝ COVID-19-ի վերադարձին, որը կարող է գրավել երկրներ, տարածաշրջաններ, քաղաքներ և առանձին շրջաններ։ Ինչպես ասվում է ժողովրդական առածում. «Ճտերն աշնանն են հաշվում». մեր աշխատանքի արդյունքները կախված են նրանից, թե ինչ միջոցներ ենք մենք ձեռնարկում այսօր», – ասել է Կլյուգեն։

ԱՀԿ-ի Եվրոպական տարածաշրջանային բյուրոյի ղեկավարի խոսքով, COVID-19-ի համաճարակը նախկինի պես ակտիվ փուլում է գտնվում շատ երկրներում։

«Շատ կարևոր է, որ մենք շարունակենք վերականգնել և կառուցել նորմալ կյանքը ընդհանուր կարանտինից հետո, սակայն պակաս կարևոր չէ, որ երկրների պետական մարմինները բոլոր անհրաժեշտ միջոցները ձեռնարկեն և ուժ ներդնեն, որպեսզի ստեղծեն համաճարակային իրավիճակի վերահսկման ակտիվ համակարգ, որը թույլ կտա հայտնաբերել հիվանդության դեպքերը, կատարել թեստավորում և հետևել վարակվածների կոնտակտավորներին, որպեսզի վարակվածության ցուցանիշի բարձրանալու դեպքում առաջիկա շաբաթների և ամիսների ընթացքում խուսափեն նոր ընդհանուր կարանտին սահմանելու անհրաժեշտությունից, որը կապված է ֆինանսական մեծ ծախսերի հետ», – ասել է ԱՀԿ-ի Եվրոպական տարածաշրջանային բյուրոյի ղեկավարը։

Հանս Կլյուգեն նաև հիշեցրել է, որ մի շարք երկրներում դպրոցների բացումը հանգեցրել է նոր դեպքերի աճի։

«Դա նշանակում է, որ մենք պետք է պահպանենք զգոնությունը և զգուշորեն մոտենանք սահմանափակումների մեղմացմանը», – ասել է Կլյուգեն՝ ընդգծելով, որ բոլոր երկրներում ռիսկը նախկինի պես բարձր է։

Եվրոպական երկրներին բաժին է ընկնում աշխարհում կորոնավիրուսով վարակվածների ընդհանուր թվի 31 %-ը, մահացածների 43%-ը։

Ինչպես ավելի վաղ հայտնել էր ShantNews-ը, ըստ ԱՀԿ-ի՝ մի շարք երկրներում, ինչպիսին են Հյուսիսային Մակեդոնիան, Հայաստանը, Ադրբեջանը, Ուզբեկստանը և Իսրայելը, դիտվում է վարակվածների թվի աճ։

https://www.facebook.com/WHOEurope/videos/2694580367428911/