Գյումրեցի 14-ամյա Անժելա Պապիկյանը հաղթող է ճանաչվել Բելառուսում անցկացված նկարչության միջազգային մրցույթում

Հունիսի 1-ին Բելառուսի Հանրապետությունում անցկացված «Աշխարհի երեխաները բարեկամներ են» խորագրով մանկական նկարի 7-րդ միջազգային օնլայն մրցույթում Հայաստանի ներկայացուցիչ, գյումրեցի Անժելա Պապիկյանը 14-16 տարեկանների տարիքային խմբում գրավել է առաջին պատվավոր հորիզոնականը: Անժելան Գյումրիի «Ընտանիք» կենտրոնի մանրանկարչության խմբակի սան է, հայտնի մանրանկարիչ, գեղանկարիչ Վարդևան Շամամյանի սանն է:

«Մրցույթի մասնակցության նախապատրաստական աշխատանքները սկսել ենք դեռ 3-4 ամիս առաջ: Անժելայի հետ որոշեցինք  ներկայացնել այնպիսի աշխատանք, որտեղ կլինեն հայկական  գույներն ու մեր երկիրը խորհրդանշող տեսարանները: Նկարում մեր Հայաստանի գույներն են, ջրաղացն ու լավաշ թխող հայ կինը: Ցանկանում էինք ցույց տալ, որ մեզ մոտ ավանդական լավաշը թխվում է  էկոլոգիապես մաքուր  թոնրում, ջրաղացում էլ արևի ու ջրի էներգիայի աշխատանքով ցորենից ստանում ենք ալյուր: Անժելայի աշխատանքը  30 գեղանկարներից մեր կենտրոնի գեղարվեստական խորհուրդն ընտրեց որպես մրցութային աշխատանք և ուղարկեց Բելառուս»,- նախապատրաստական աշխատանքների ընթացքի մասին է խոսել մանրանկարիչ Վարդևան Շամամյանը:

Ըստ ուսուցչի՝ աշխատանքը նկարելիս Անժելան ոգեշնչվել է սարյանական ոճից ու վառ գույներից, դրան գումարել իր մանկական  երևակայությունն ու միտքը: Ուսումնասիրել են միջազգային կերպարվեստն ու էկոլոգիայի վիճակը ու փորձել միջազգային ժյուրիին ներկայացնել հայկական լավաշի ստեղծման պատմությունը:

«Ժյուրիի կազմում ընդգրկված էին 20-ից ավելի ակադեմիական կրթություն ստացած հեղինակավոր գեղանկարիչներ ու մանրանկարիչներ, ընտրությունը, վստահ եմ, որ եղել է բարդ ու դժվար: Մրցութային երեք փուլերից հետո 27 երկրների 45 հազար մասնակիցներից եզրափակիչ էին անցել մոտ երկու տասնյակ աշխատանքներ: Մեր երկիրը ներկայացնող իմ աշակերտի գեղանկարը 14-16 տարեկանների խմբում ճանաչվեց հաղթող, ինչը մեծ հպարտություն է մեզ համար»,- նշում է Վարդևան Շամամյանը:

Մինչ հաղթողների անունները հայտնի դառնալը, մրցույթի կազմակերպիչներն անցկացրել են օնլայն մի քանի ցուցահանդեսներ, որտեղ ցուցադրվել են բոլոր մասնակիցների աշխատանքները, նաև փոքրիկ ֆիլմեր են պատրաստել եզրափակիչ անցած մասնակիցների երկրների մասին:

Գյումրեցի Անժելա Պապիկյանի հաղթանակը վկայող դիպլոմն ու մեդալը Հայաստան կհասնի մոտ 2 ամսից, իսկ հայկական գույներով  գեղանկարը կտեղադրվի ու կցուցադրվի Բելառուսի Ակադեմիայի թանգարանում՝ որպես մրցույթի հաղթող աշխատանք:

Հեղինակավոր մրցույթում հաղթանակը գյումրեցի նկարչուհու միակ հաջողությունը չէ: Նա հաղթող է ճանաչվել նաև Ճապոնիայում  կայացած գեղանկարչության և մանրանկարչության միջազգային մրցույթում, որտեղ ներկայացել էր գյումրվա ֆայտոնը պատկերող  աշխատանքով:

Ըստ  ուսուցչի՝ Անժելան այս տարիքում արդեն լավագույնս տիրապետում է հայ մանրանկարչության ու գեղանկարչության հմտություններին, ու նրա աշխատանքները մշտապես  հայտնվում են մասնագետների ուշադրության կենտրոնում: