Շիրակի մարզը 2900 տոննա աշնանացան սերմացուի պահանջարկ է ներկայացրել

Շիրակի մարզը 2900 տոննա աշնանացան ցորենի սերմացուի պահանջարկ է ներկայացրել: Հիշեցնենք՝ կառավարությունը սկսել է աշնանացան սերմացուի արտադրության խթանման ծրագիր, որի շահառուները Շիրակի, Սյունիքի, Գեղարքունիքի, Լոռու, Արագածոտնի, Տավուշի և Կոտայքի մարզերում 2-20 հեկտար ցորենի ցանքատարածքներ մշակող գյուղացիական տնտեսություններն են։ Կառավարությունը սուբսիդավորում է 1 կգ սերմացուի արժեքի 70 դրամը: Գյուղացիներն արդեն ընտրել են մատակարարներին և հիմա նրանց հետ պայմանագրերի կնքման գործընթացն է սկսվել:

Ախուրյանցի ֆերմեր Արա Սերգոյանը հացահատիկի բերքահավաքն ավարտել է։ Պահեստավորած ցորենն այժմ զտում է, ախտահանում ու պարկավորում: Մոտ 100 տոննա սերմացու է առանձնացրել: Պետական սերմարտադրության ծրագրին մասնակցում է որպես մատակարար: Մինչ մատակարարի կարգավիճակ ստանալը, նրա ցանքերն ու ստացած բերքը մասնագետներն են ուսումնասիրել, համոզվելու համար, որ սերմացուն որակյալ է:

«45 հեկտար աշնանացան ցորեն եմ ցանել, որից 22 հեկտարը սերմադաշտեր էին: Ակնկալում էինք 100-120 տոննա սերմ ստանալ, բայց 90-100 տոննա ենք ստացել: Ազատ վաճառք էլ ունենք: Այն մարզերի բնակիչները, որոնք պետական սերմարտադրության ծրագրին չեն մասնակցում, գնում են մեզնից սերմացուն 160-170 դրամով, իսկ Շիրակի մարզի բնակիչներին վաճառում ենք 110-130 դրամով: Այդ գումարները բնակիչները բանկում մեր հաշվեհամարին են մուտքագրում, իսկ 1 կգ-ի համար 70 դրամ սուբսիդիան պետությունը նոյեմբերին է փոխհատուցելու»,- SHANTNEWS-ին ասել է ֆերմեր Արա Սերգոյանը:

Անցյալ տարի սերմացուի իրացման խնդիր է ունեցել: Գյուղացին վճարունակ չէ, ցանել է այն, ինչ ունեցել է: Հիմա սերմարտադրության պետական ծրագրով 1 կգ սերմացուի գինը բավական մատչելի է. 70 դրամը պետությունն է սուբսիդավորում:

Գյուղացին ինքն է ընտրում մատակարարին ու թե ինչ գնանոց սերմացու է ուզում: Վճարումները գյուղացիները կատարում են կանխիկ, իսկ սուբսիդավորման գումարները էկոնոմիկայի նախարարությունը մատակարարներին փոխանցում է գործընթացի ավարտից հետո:

Ծրագրի շահառու հողօգտագործողներին որոշակի պահանջներ են ներկայացվում: Մասնավորապես, սուբսիդավորված գնով սերմացու կարող են ստանալ նրանք, ովքեր 2-ից մինչև 20 հեկտար ցանքեր ունեն: Նրանք, ում հողակտորներն ավելի փոքր են, ծրագրի շահառու դառնալու տարբերակ գտել են: Միացնում են հողակտորները և սերմացուի հայտ ներկայացնում:

Ընդհանուր Շիրակի մարզի պահանջարկը կազմում է 2900 տոննա: Այս թիվը հաստատվել է ու ներկայացվել էկոնոմիկայի նախարարություն: 1 հեկտար աշնանացան կատարելու համար 300-350 կգ սերմացու է անհրաժեշտ: Սա նշանակում է, որ պետական ծրագրով Շիրակի մարզում մոտ 9500 հեկտար աշնանացան է կատարվելու: Այս թիվը դեռ կարող է փոփոխվել:

«Գումարը պետությունը տալիս է մատակարարին, բայց աջակցությունը ստացվում է հողօգտագործողին, քանի որ հողօգտագործողի համար է վճարում պետությունը: Ընդհանուր ծրագրին մասնակցում են 19 մատակարարներ, նրանցից 7-8-ը Շիրակի մարզից են: Կան և տեղական սերմացուներ մշակողներ և ներկրողներ: Մարզի ընդհանուր պահանջարկը եղել է 2900 տոննա, բայց եթե ավելանա պահանջը, դիմողները շատ լինեն, հնարավոր է դիմենք կառավարությանը մեր մարզի հասանելիքն ավելացնելու համար»,- SHANTNEWS-ի հետ զրույցում ասել է Շիրակի մարզպետարանի գյուղատնտեսության բաժնի պետ Անդրանիկ Նալբանդյանը:

Հիմա գյուղացիների, մատակարարների ու էկոնոմիկայի նախարարության միջև եռակողմ պայմանագրեր են կնքվում: Մինչև սեպտեմբերի 15-ը կատարվելու է սերմացուի վաճառք, իսկ աշնանացանը Շիրակի մարզում սկսվում է արդեն օգոստոսի վերջից ու տևում մինչև հոկտեմբեր ամիսը: