Հեռացրեք այդ քաղցկեղը, որը հենց ինքը՝ Էրդողանն է, քանի դեռ այն չի տարածվել. La Casa de Papel սերիալի հայ աստղ

Իսպանական հայտնի «La Casa de Papel» սերիալի հայկական արմատներով աստղ Հովիկ Կեուչկերյանը տեսաուղերձ է հրապարակել՝ աշխարհին տեղեկացնելով Արցախում ստեղծված իրավիճակի մասին։

«Այն, ինչ տեղի է ունենում Արցախում սեպտեմբերի 27-ից սկսած, Լեռնային Ղարաբաղում հակամարտությունը, ինչպես միջազգային մամուլն է այն անվանում, իրականում հակամարտություն չէ, այլ ագրեսիա։ Դա հստակ փորձ է Էրդողանի Թուրքիայի և Ալիևի Ադրբեջանի կողմից հայ ժողովրդի դեմ մի նոր ցեղասպանություն սկսելու։ Դա ավելին է, քան պատերազմ»,- նշել է դերասանը։ Նա շեշտել է, որ հակառակորդի շարքերում են վարձկաններ, ահաբեկիչներ, «որոնց վարձել են, որպեսզի նրանք սպանեն թե՛ հայ զինվորականներին, թե՛ խաղաղ բնակիչներին»։

«Ես պնդում եմ, որ դա ավելին է, քան պատերազմ։ Հայաստանը մտադիր չէ զավթելու և ոչ էլ կոտորելու կամ պատերազմելու որևէ մեկի հետ։ Կա 3 միլիոն հայ, որոնք միակ բանը, որ ուզում են՝ ապրել խաղաղ և բարգավաճել իրենց մայր հայրենիքում, աշխարհի բոլոր հայերի սուրբ երկրում, բայց հերթական անգամ ստացվում է, որ այդ իրավունքը չունենք։ Սակայն նույնիսկ հայ ժողովրդի տառապած, արյունոտ և ողբալի ողջ պատմության ընթացքում նրանք չեն կարողացել խլել մեզնից մեր ժպիտը, երազանքները, ուժը և կամքը։ Եվ ոչ էլ կարողացել են խլել մեր միասնականությունը, համախմբվածությունը և արյան կանչը։ Նրանց դա չի հաջողվել, չի հաջողվում և չի էլ հաջողվի։ Չեք կարողանա»,- նշել է Հովիկ Կեուչկերյանը։

Դերասանը նշել է՝ հենց այս պահին Էրդողանն ու Ալիևը փորձում են նորից էթնիկ զտումներ սկսել։ Նա միջազգային հանրությանը, Ամերիկայի Միացյալ Նահանգներին, Եվրամիությանը, Ռուսաստանին և ՄԱԿ-ին կոչ է արել վերջ հայտարարություններին, մտադրություններին և լոկ խոսքերին. ժամանակն է գործելու և հնարավորինս արագ։

«Կտրուկ և վերջնականապես կանգնեցրեք Էրդողանին, արմատախիլ արեք նրան մեկընդմիշտ։ Հեռացրեք այդ քաղցկեղը, որը հենց ինքը՝ Էրդողանն է, քանի դեռ այն չի տարածվել։ Եթե ոչ, ապա վաղ թե ուշ դուք ստիպված կլինեք գործ ունենալու ձեր իսկ «Ադոլֆ Հիտլերի» հետ 21-րդ դարում։ Մինչ դուք որոշումներ եք կայացնում, հայերը կռվում են, դիմադրում և պաշտպանվում։ Ես պնդում եմ, որ նրանք պաշտպանվում են։ Պայքարում են հանուն մեր հավատալիքների, մեր մշակույթի, մեր պատմության, մեր ընտանիքների, մեր տների, մեր զավակների, մեր տարեցների, մեր նախնիների և մեր փոքրիկ հայկական հողի»,- ասել է Կեուչկերյանը՝ ընդգծելով, որ դա գոյության պայքար է։

«Քանի դեռ կա գեթ մեկ հայ՝ ոտքի վրա կանգնած, որն ընդունակ է զենք վերցնել և շարունակել պայքարել հանուն իր հայրենիքի, հանուն մեր սիրելի հայ հողի, մենք կշարունակեք պայքարել մինչև վերջ։ Երբեք չենք հանձնվի։ Երբեք չենք նահանջի և չկասկածեք՝ միշտ էլ հայը կանգնած է լինելու և շարունակելու է պայքարը։ Ես ուզում եմ ուղարկել իմ ողջ էներգիան, իմ ամբողջ ուժը, հիացմունքս, հարգանքս, իմ ամբողջ սերը, իմ բոլոր աղոթքները Հայաստանի և Արցախի ողջ քաղաքացիական բնակչությանը, մարտական գործողությունների ընթացքում ընկած և հերոսացած հայերին ու նրանց ընտանիքներին և բոլոր զինծառայողներին, որոնք այս պահին կրկին ատամներով պաշտպանում են մեր սուրբ հողը։ Իմ հայ քույրեր և եղբայրներ, դուք մենակ չեք, Աստված օրհնի ձեզ»,- եզրափակել է դերասանը: