Բանկը կարող է ասել՝ ես վարկ տալիս եմ միայն սև աչքեր ունեցողներին. գործադիրը օրակարգային նախագծերից մեկը բավականին երկար է քննարկել

«Տնտեսական երկարաժամկետ զարգացմանն ուղղված ծրագրում» փոփոխությունների նախագծի քննարկումն այսօր կառավարությունում բավականին երկար է տևել, իսկ վարչապետ Նիկոլ Փաշինյանը նկատել է, որ հենց առաջին օրվանից այս պրոցեսն ուղեկցվել է կառավարության ներսում տեղի ունեցող բանավեճերով:

«Ըստ էության, փորձ է արվել ներդնել էքսպերիմենտալ գործիք, երբ ՀՀ բյուջեից հակաճգնաժամային նկատառումներով ինչ-որ դրամագլուխ կհատկացվի ՀՀ ազգային հետաքրքրությունների հիմնադրամին, որը այդ դրամագլուխը կփորձի կառավարել: Հենց սկզբից եղել է քննարկման երկու թեմա. առաջինը՝ արժե՞ նման բան անել, թե՞ ոչ, որ բյուջեի միջոցներից ներդրումների խթանման այսպիսի գործիք կիրառվի, և երկրորդը վերաբերել է կանոններին:

Երկու հարցերի վերաբերյալ միասնական դիրքորոշում չի եղել կառավարությունում: Հենց սկզբից եղել են մտավախություններ, որ այս կանոններով հնարավոր չի լինի ներդրումներ իրականացնել: Այսօր էլ միասնական կարծիք կառավարությունում չկա: Փաստարկների երկու խումբն էլ ունեն իրենց հիմնավորումները: Պետք է խոստովանել, որ նախագիծը չունի այն արդյունքները, որոնք հույս ունեինք, որ կունենա: Հիմա, որպես դրա պատճառ ու մեղավոր համարվում են այն կանոնները, որոնք սահմանված են: Իմ ընկալումն այն է, որ եթե մինչև այստեղ հասել ենք, շարունակենք, ու տեսնենք, թե արդյոք արդյունքներ ունենում ենք, թե չենք ունենում»,- ասել է վարչապետը:

«Մինչ այսօր շատ բան է արվել, օժանդակության ծրագրերը հասել են 160 մլրդ դրամի: Այն կանոնները և շահառուի նույնականացման ձևը, որ ընտրել ենք, բավականին արդար է: Քանի որ հիմա շահառուի ընտրության կանոն որևէ կերպ այլևս չի արձանագրվում, հիմա հարց է առաջանում, թե ինչու մենք պետք է առանց շահառուի նույնականացման կամ նկարագրության կանոնի բյուջետային միջոցները տեղաբաշխենք մասնավոր հատվածում»,- նկատել է փոխվարչապետ Մհեր Գրիգորյանը։

Էկոնոմիկայի նախարար Վահան Քերոբյանի հիշեցմամբ՝  ներդրողը ՀՀ-ում փող կարող է վերցնել միայն բանկից, և դա ամենամեծ խոչընդոտն է ներդրումներ անելու: Վարչապետն այն կարծիքին է, որ երբ շատ ազատական կանոններ են սահմանվում, առաջանում է ընկերությունների երկար հերթ, որոնք  ցանկանում են  որ այդ ներդրումն իրենց մոտ տեղի ունենա, իսկ  շատ ընկերություններում ներդրումներ անելն այնքան էլ տրամաբանական չի լինի.

«Արդյունքում՝ պրոյեկտի շուրջ անառողջ մթնոլորտ է գոյանալու, ասելու են՝ իսկ ինչի՞ էն մեկի հայտը բավարարվեց, մյուսինը՝ ոչ: Ես այստեղ ռեպուտացիոն մեծ ռիսկ եմ տեսնում: Հետո շատ դժվար կլինի բացատրել, թե ինչու այս մի ընկերությունում ներդրում արվեց, մյուսում՝ չարվեց: Իսկ եթե որևէ անհաջողություն լինի, այդ պրոցեսներն ավելի կշատանան, կդառնան քրգործեր և այլն: Եթե բանկն է տալիս աջակցությունը, նա մասնավոր կառույց է և կարող է ասել՝ իմ քաղաքականությունն այնպիսին է, որ ես վարկ տալիս եմ միայն սև աչքեր ունեցողներին: Բայց երբ պետությունն է նման բան ասում, խնդիր է առաջանում: Եթե մենք 0-1-ին ենք ընտրելու, մնացած 9-ը ասելու են՝ ուրեմն էստեղ ներքին գործարքներ, խնամի-ծանոթ է գործում»,- ասել է վարչապետը:

«Մենք հիմա քննարկում ենք անել կամ չանել ինչ-որ բան, որը կարող է առաջացնել կամ չառաջացնել ինչ-որ ռիսկ: Ես իմ 1,5 ամիս աշխատանքի ընթացքում անընդհատ լսում են՝ սա ռիսկ է առաջացնում, նա ռիսկ է առաջացնում: Մենք էսպիսի պահպանողական մոտեցմամբ այնքան ենք կաշկանդում պետական կառավարման համակարգը, որ բոլորը մտածում են՝ ավելի լավ է ոչ մի բան չանել, քան ինչ-որ բան անել, որովհետև այնտեղ կա ռիսկ: Ես իմ նախարարությունում բոլորին կոչ եմ արել լինել համարձակ և չվախենալ սխալներ գործելիս: Այստեղ էլ կոչ եմ անում լինել համարձակ և անել նոր քայլեր, որովհետև միայն դա կարող է փոփոխություն մտցնել մեր աշխատանքի մեջ»,- հավելել է էկոնոմիկայի նախարարը:

Երկար քննարկումից հետո Նիկոլ Փաշինյանն առաջարկեց բաց քվեարկությամբ որոշել հարցը: Կառավարության անդամներից նախագծին դեմ էին միայն 3-ը: Նախագիծն ընդունվել է: