Հույս ունենք, որ ԱՄՆ-ի բարոյական առաջնորդությունը վերջ կդնի ադրբեջանական ագրեսիային. Զերունյանի նամակը Ջո Բայդենին

Հարավային Կալիֆոռնիայի համալսարանի Բեդրոսյան կենտրոնի գործադիր կրթության տնօրեն, Լոս Անջելեսում Հարավային Կալիֆորնիայի համալսարանի պրոֆեսոր Ֆրենկ Զերունյանը բաց նամակ է հղել ԱՄՆ նորընտիր նախագահ Ջո Բայդենին: Նամակին կից ֆեյսբուքյան գրառման մեջ նա հույս է հայտնել, որ Ջո Բայդենը կստանա իր նամակի 1.5 միլիոն օրինակ` ավելի քան 1 դար առաջ լռեցված ձայների անունից, ինչպես նաև նրանց անունից, ովքեր զոհել են իրենց կյանքը` պաշտպանելով  իրենց նախնիների հայրենիք Արցախը:

Զերունյանը շնորհավորել է Ջո Բայդենին երդմնակալության կապակցությամբ` հիշեցնելով Միացյալ Նահանգները բարոյական հիմքերով կառավարելու Բայդենի խոստումը:

«Ես իմ ողջ պրոֆեսիոնալ գործունեության ընթացքում արել եմ ամեն բան` արմատախիլ անելու ցեղասպանությունը որպես մարդկության դեմ հանցանք: Այսօր ամենայն հարգանքով հիշեցնում եմ Ձեզ 2020 թ.-ի ապրիլի 24-ին Հայոց ցեսապանությունը հիշելիս և 2020 թ.-ի հոկտեմբերի 25-ին` Արցախի ժողովրդի դեմ թուրք-ադրբեջանական ագրեսիայից հետո Ձեր տված խոստումների մասին», – գրել է ամերիկահայ պրոֆեսորը:

Ֆրենկ Զերունյանը նշել է Politico պարբերականի հիշատակած Բայդենի թվիթերյան գրառման մասին, որի համաձայն՝ ընտրվելու դեպքում Բայդենը խոստացել էր աջակցել Հայոց ցեղասպանության ճանաչման բանաձևի ընդունմանը և ամբողջ աշխարհում մարդու իրավունքներն առաջնահերթություն դարձնել:

«Պրն. նախագահ, խնդրում եմ հարգել այդ խոստումները` վերականգնելու այս ազգի բարոյական հեղինակությունը բոլոր ցեղասպանությունների և մարդու իրավունքների ոտնահարումների դեմ: Մենք` ամերիկացիներս, ունենք ճշմարտությունն, արդարությունն ու օրենքի գերակայությունը խրախուսելու բազմամյա ավանդույթ»,- գրել է Ֆրենկ Զերունյանը:

Հայազգի պրոֆեսորը նշում է, որ թեպետ չի կարող հետ բերել իր նախնիներին, այնուամենայնիվ, միասին հնարավոր է կանգնեցնել մարդկանց անմարդկային վերաբերմունքը միմյանց հանդեպ, որտեղ էլ դա լինի:

«Հայերին, հրեաներին, կամբոջացիներին, ռուանդացիներին, դարֆուրցիներին, այժմ էլ՝ ույղուրներին ուղղված «այլևս երբեք» արտահայտությունը պարզապես կարգախոս չէ, այլ երկրի երեսից ցեղասպանությունն արմատախիլ անելու գործողության իմաստալից կոչ»,- գրել է Ֆրենկ Զերունյանը:

Պրոֆեսորը նամակում հիշատակում է Հայոց ցեղասպանությունն աշխարհում ճանաչելու օրինակները` նշելով, որ 2020-ի փետրվարի դրությամբ 1915-ի իրադարձությունները պաշտոնապես որպես ցեղասպանություն է ճանաչել 32 ինքնիշխան պետություն, այդ թվում` Վատիկանը: Զերունյանը նաև հիշատակում է այդ պատմական փաստը ճանաչած աշխարհի հարյուրավոր քաղաքների, շրջանների, խորհրդարանների և ԱՄՆ 49 նահանգների մասին: Հիշատակվում են նաև այդ կապակցությամբ ԱՄՆ նախկին նախագահների տված խոստումներն ու «Հայոց ցեղասպանություն» եզրույթն օգտագործելու անհաջող փորձերը:

Զերունյանն անդրադարձել է նաև 2020 թ.-ի սեպտեմբերի 27-ին Արցախի խաղաղ բնակչության դեմ Թուրքիայի ու Ադրբեջանի սանձազերծած պատերազմին:
Նրա խոսքով` ՆԱՏՕ-ի դաշնակցի կողմից ամերիկյան սպառազինության դաժան ուժի կիրառմամբ ավերվել է հայերի նախնիների երկիրն Արցախում:

«Մենք խիստ պատիժ ենք ակնկալում ագրեսորների կողմից իրականացված պատերազմական հանցագործությունների համար: Ամենակարևորը`մենք հույս ունենք, որ ԱՄՆ-ի բարոյական առաջնորդությունը վերջ կդնի ադրբեջանական ագրեսիային և կդադարեցնի ռազմական սարքավորումների մատակարարումն այս ագրեսորներին: Եվ վերջապես, ամենակարևորը` հույս ունենք, որ Դուք աշխարհին կուղղորդեք դեպի Արցախի ճանաչումը, ինչը ժողովրդի գոյատևման միակ լուծումն է»,- գրել է հայազգի պրոֆեսորը:

Զերունյանը Բայդենին հիշեցրել է երդմնակալության ժամանակ հնչեցրած խոսքերը՝ «կառաջնորդենք օրինակի ուժով», և նշել, որ սպասում է այդ գաղափարի կյանքի կոչմանը, քանի որ դա վերաբերում է ճշմարտությանը, արդարությանը, ցեղասպանության ճանաչմանը, մարդու իրավունքներին և Արցախին: