Ազգային ժողովում գնաճը մեղմելու հնարավորությունների մասին լսումների ժամանակ ՀՀ գյուղատնտեսության նախարար Իգնատի Առաքելյանն ասաց, որ կարտոֆիլի թանկացումը կապված է արտահանման հետ: Նախարարը բացատրեց, որ նոր Հարկային օրենսգրքով սերմերի գնի 1 տոկոսանոց թանկացումը ոչ մի կերպ չի կարող ազդել կարտոֆիլի թանկացման վրա, քանի որ սերմի արժեքի մեջ այդ թանկացումը կազմելու է ընդամենը 3-3,5 դրամ, իսկ կարտոֆիլի բերքի վրա ընդհանրապես չի ազդելու:
«Այսօրվա կարտոֆիլագործությունը Հայաստանում և հիմնականում գյուղատնտեսությունը շատ ցածր մակարդակի է, զարգացած չէ և չկիրառելով բարձր տեխնոլոգիաներև ճիշտ ագրոտեխնիկական միջոցներ՝ դրանք միշտ կլինեն կա՛մ թանկ, կա՛մ անորակ»,- ասաց ՀՀ գյուղնախարարը:
Նա նաև ասաց, թե վերլուծությունները թույլ են տալիս պնդել՝ պարարտանյութի, դիզվառելիքի սուբսիդավորումը կարող է իջեցնել ծախսերը, բայց թույլ չի տալիս բարձրացնել արդյունավետությունը:
«Պարարտանյութի հետ կապված՝ այո՛, մենք հայտարարել ենք, որ չենք սուբսիդավորելու, որովհետև անցյալ տարի սուբսիդավորումը կազմել էր ընդամենը 5000 դրամ 1 հա-ի համար, որը, կարծում ենք, ոչ մի օգուտ չի կարող տալ արդյունավետությունը բարձրացնելու կամ գինը իջեցնելու համար: Հետևաբար, մենք հանել ենք այդ ծրագիրն ու փոխարինել այլ ծրագրերով: Մենք մեր ձեռքը չենք քաշում պարարտանյութի շուկայից, հետևելու ենք, որ շուկան կայանա նաև մասնավոր ներդրողների միջոցով»,- ասաց Իգնատի Առաքելյանը:
