«Կանայք և տվյալագիտությունը Հայաստանում» թեմայով գիտաժողով է անցկացվել Վանաձորի տեխնոլոգիական կենտրոնում

Մարտի 13-ին Վանաձորի տեխնոլոգիական կենտրոնում տեղի ունեցավ «Կանայք տվյալագիտության մեջ» Հայաստան (Women in Data Science ARMENIA) գիտաժողովը։

Գիտաժողովը 2015թ. կազմակերպվում է Սթենֆորդի Համալսարանի կողմից աշխարհի շուրջ 150 վայրում:  Հայաստանում գիտաժողովի իրականացումը հնարավոր  դարձավ «Ձեռնարկությունների ինկուբատոր» հիմնադրամի (ՁԻՀ) և Սթենֆորդի համալսարանի միջև համագործակցության շնորհիվ, որի շրջանակում Հայաստանն ունի նաև WiDS դեսպան՝ ի դեմս ՁԻՀ ծրագրերի ղեկավար Ամալյա Եղոյանի։

Ծրագիրն իրականացվեց «Ձեռնարկությունների ինկուբատոր» հիմնադրամի, ISTC-ի և Վանաձորի ու Գյումրու տեխնոլոգիական կենտրոնների հետ համատեղ՝ Համաշխարհային բանկի խմբի (ՀԲԽ) անդամ Միջազգային ֆինանսական կորպորացիայի (ՄՖԿ) «Ձեռներեց կանանց հնարավորությունների ընդլայնումն ու առաջխաղացումը ոչ տեխնոլոգիական ոլորտներում տեխնոլոգիական լուծումների կիրառման միջոցով» ծրագրի շրջանակում: Գիտաժողովի ընթացքում ելույթ ունեցան բանախոսներ տարբեր ընկերություններից ու կազմակերպություններից, նաև PMI Գիտահետազոտական կենտրոնի ներկայացուցիչներ:

PMI Գիտահետազոտական կենտրոնը հիմնադրվել է 2018թ. և հանդիսանում է «Ֆիլիպ Մորրիս Ինթերնեյշնլ» ընկերության միջազգային ցանցում երրորդ կենտրոնը՝ արտացոլելով անծուխ ապագայի հասնելու ընկերության տեսլականը: Հայաստանում հիմնադրված գիտահետազոտական կենտրոնը հիմնականում աշխատում է Շվեյցարիայի Նևշատել քաղաքում տեղակայված «Կուբ» կենտրոնի հետ մի շարք գիտական ուղղություններում և իրականացնում է բազմաթիվ հետազոտություններ:

Ինչպես նշեց ՖՄԻ Գիտահետազոտական կենտրոնի Տվյալագիտության բաժնի կառավարիչ Նարեկ Մելքոնյանը` «ՖՄԻ-ը ճանաչում է Հայաստանում տեխնոլոգիական զարգացման հարուստ ժառանգությունն ու պոտենցիալը. Գիտության և տեխնոլոգիայի ոլորտում երկրի առաջընթացի շնորհիվ 2017թ. «Ֆիլիպ Մորրիս Ինթերնեյշնլ»-ը ՀՀ կառավարության, Հայաստանի ազգային պոլիտեխնիկական համալսարանի ու Երևանի պետական համալսարանի հետ համատեղ ստորագրեց Ըմբռնման հուշագիրը՝ հաստատելով ՖՄԻ-ի մտադրությունը Հայաստանում ստեղծելու գիտահետազոտական կենտրոն»:

Ներկայումս ՖՄԻ-ի գիտահետազոտական կենտրոնը Հայաստանում համագործակցում է մի շարք տեղական գիտական հաստատությունների և համալսարանների հետ՝ ընդարձակվելով և ընդգրկելով մասնագետների հետևյալ հիմնական ուղղություններում՝

–        Տվյալագիտություն

–        Տեխնոլոգիաներ

–        Նյութական գիտություն

Հաստիքներ

Նարեկ Մելքոնյանը նաև նշեց․ «Այժմ մենք ունենք թափուր հաստիքներ տվյալագիտության բաժնում և շատ կուզենայինք, որ այս նյութը կարդացող տվյալագետները դիմեին այդ հաստիքներին»։

Մելքոնյանի խոսքերով՝ գիտահետազոտական կենտրոնն ու PMI-ն համագործակցում են մի շարք լոկալ հետազոտական ​​ինստիտուտների և համալսարանների հետ՝ համատեղ նախագծերի իրականացման համար: Ձեռնարկությունների ինկուբատոր հիմնադրամի հետ համագործակցությամբ PMI Science-ն աջակցում է ասպիրանտուրայի և դոկտորական կրթական ծրագրերին, խթանում է ֆակուլտետների հետազոտական ​​նախագծեր, աջակցում գիտական ​​և տեխնիկական գիտաժողովներին և իրականացնում դասընթացներ:

 Արտասահմանի հետ կապը

Ինչ վերաբերում է արտասահմանի հետ կապին՝ Նարեկ Մելքոնյանն ավելացրեց, որ գիտահետազոտական կենտրոնում զբաղվում են գլոբալ կորպորացիայի պրոյեկտներով և իրականում բոլոր նախագծերը կապված են արտասահմանի հետ և կապ չկա Հայաստանի տվյալների կամ պրոյեկտների հետ։

ՖՄԻ կանայք տվյալագիտության մեջ

Վանաձորում տեղի ունեցած գիտաժողովի ընթացքում իր բանախոսությամբ հանդես եկավ PMI Science հայաստանյան գիտահետազոտական կենտրոնի տվյալագետ, Time series analysis, Churn analysis և Natural language processing ուղղվածությունների մասնագետ Շահանե Առուշանյանը: Նրա ելույթը ձեռնարկատիրական տվյալագիտության մասին էր, և այն մասին, թե ինչով է այն տարբերվում ընդհանուր տվյալագիտությունից: Ելույթն անդրադարձավ մեծ կազմակերպություններում աշխատող տվյալագետների  հնարավորություններին ու նրանց առաջ ծառացած փորձություններին: «Ես խոսեցի այն կարևոր քայլերի մասին, որ ձեռնարկությունները պետք է իրականացնեն իրենց բիզնես մոդելում տվյալագիտությունը ներառելու մասին, ինչպես նաև այն բազմազան ուղղությունների մասին, որոնց վրա աշխատում են մեր տվյալագետները ՖՄԻ-ում»:

Շահանե Առուշանյանը միաժամանակ նշեց. «Ես նկատում եմ, որ ՏՏ ոլորտում և մասնավորապես տվյալագիտության բնագավառում աշխատող կանանց թիվն աճում է օր օրի: Սա մեր երկրի համար մեծ ձեռքբերում է: Իհարկե, միաժամանակ կանայք հանդիպում են որոշ փորձությունների հիմնականում այն ընդհանուր կարծիքի պատճառով, որ տեխնիկական ոլորտում ավելի ուժեղ են տղամարդիկ: Մեր հասարակությունն աստիճանաբար սկսում է գիտակցել, որ մասնագիտությունը կախված չէ սեռից, այն կախված է մարդու բնավորությունից և նրա ունակություններից ու հետաքրքրություններից»: