Իտալիայի նախագահությունը լիովին սատարում է ԵԱՀԿ Մինսկի խմբի ջանքերին. Իտալիայի դեսպան

Իտալիան ստանձնել է նախագահությունը Եվրոպայի անվտանգության և համագործակցության կազմակերպությունում: Այս առիթով NEWS.am-ին տված հարցազրույցում Հայաստանում Իտալիայի դեսպան Ջովաննի Ռիչուլլին խոսել է Իտալիայի նախագահության առաջնահերթությունների, ինչպես նաև Հայաստանի և ԵՄ միջև կնքված նոր համաձայնագրի վերաբերյալ Իտալիայի դիրքորոշման մասին:

«Իտալիան միշտ էլ աջակցել է Հայաստանի և եվրոպական ուղղության միջև առավել սերտ կապերին՝ դրա ամենատարբեր դրսևորումներում: Հարկ է նաև հիշեցնել, որ 2000 թվականի նոյեմբերին ԵԽ-ում Իտալիայի նախագահության ընթացքում Հայաստանը հրավիրվել էր միանալու Խորհրդին՝ 2001 թվականի հունվարին դառնալով կառույցի 42-րդ անդամ երկիրը: Համապատասխանաբար, Իտալիան անկեղծորեն ողջունել է ԵՄ-ի և Հայաստանի միջև Համապարփակ և ընդլայնված գործընկերության մասին համաձայնագրի ստորագրումը: Համաձայնագիրը փոխշահավետ ձեռքբերում է, քանի որ այն նպատակ է հետապնդում միջավայր ստեղծել Հայաստանի Հանրապետության և Եվրոպական Միության միջև հարաբերությունների զարգացման համար, որն ավելի արդյունավետ և նպատակաուղղված կլինի, քան նախկինում: Նոր համաձայնագիրը համապատասխանում է Եվրոպական հարևանության նոր քաղաքականությանը, որն ուղղված է անհատական համաձայնագրերին յուրաքանչյուր երկրի հետ և հաշվի է առնում յուրաքանչյուր գործընկերոջ կոնկրետ պայմանները: Իհարկե, համաձայնագրի այդ առավելությունից կարող են օգտվել ոչ միայն Հայաստանն ու Եվրամիությունը, այլ նաև ԵՄ մյուս անդամ պետությունները՝ Հայաստանի հետ իրենց փոխգործակցության համատեքստում: Ես համոզված եմ, որ դա կվերաբերի նաև Իտալիային: Մենք նոր գործիք  ունենք, որը նախորդից ավելի լավն է, և մենք պետք է ձգտենք ավելի հանգամանորեն օգտագործել դրա բոլոր առավելությունները»,-ասել է Իտալիայի դեսպանը:

Նրա խոսքով՝ ԵԱՀԿ-ի գոյությունից ի վեր կառույցը պահպանում է շփումներն ու երկխոսությունը՝ որպես կայունության, անվտանգության և խաղաղության միջոց: «Իտալիան, որը կազմակերպության կանոնավոր բյուջեի հիմնական մասնակիցներից մեկն է՝ ինչպես հաստատությունների, այնպես էլ դրա դաշտային գործողությունների համար, միշտ պահպանել է իր ամուր կողմնակցությունը ԵԱՀԿ-ի նպատակներին և գործունեությանը: Հետևաբար, մեր ներկայիս նախագահությունը կհետևի այս ավանդույթին: Ինչպես դուք գիտեք, իտալական նախագահության առաջնահերթություններից մեկը նաև ԵԱՀԿ-ի դերն է «ձգձգված հակամարտություններում», որոնք, ցավոք, շարունակում են իրենցից լուրջ մարտահրավերներ ներկայացնել եվրոպական տարածաշրջանում: Ինչ վերաբերում է Լեռնային Ղարաբաղին, ապա որոշման պատասխանատվությունը չի կարող դրսից լինել, քանի որ խաղաղությունը, այնուամենայնիվ, կախված է շահագրգիռ կողմերից: Այս առումով թույլ տվեք հիշեցնել, որ մեր նախագահությունը հավատարիմ է «Երկխոսություն, սեփականության իրավունք, պատասխանատվություն» կարգախոսին: Այսպիսով, բոլոր կողմերը պետք է համոզված լինեն, որ միայն բանակցությունների վրա հիմնված խաղաղ կարգավորումը կլուծի խնդիրը, և ամբողջ տարածաշրջանը կայունության, առաջընթացի և բարգավաճման առումով կշահի այդպիսի արդյունքից: Իհարկե, այս որոշման առաջխաղացման գործընթացը բավականին ձգձգվել է, ինչի կապակցությամբ ես կցանկանայի ընդգծել, որ ԵԱՀԿ-ում Իտալիայի նախագահությունը լիովին աջակցում է ԵԱՀԿ Մինսկի խմբի երեք համանախագահների ջանքերին, ինչպես նաև այն սկզբունքներին և տարրերին, որոնց վրա հիմնված են նրանց համբերատար և կառուցողական գործունեությունը: Ավելացնեմ, որ Իտալիան մտադիր է վերակենդանացնել ԵԱՀԿ-ի ոգին: Սա այն ոգին է, որը հաստատել է շփման և երկխոսության կարևորությունը դեռ 1975 թվականին, երբ աշխարհը խորապես պառակտված էր, իսկ որոշ թեժ կետեր վտանգում էին խաղաղությունն ամբողջ աշխարհում: Իտալիայի արտաքին գործերի նախարար Ալֆանոն վերջերս մեջբերել էր մեր նախկին վարչապետ Ալդո Մորոյի խոսքերը, որը հելսինկյան ոգին բնութագրել էր որպես «ապագա տեղափոխվելու կետեր»: Իրոք, այլընտրանք չկա: Իտալիայի՝ որպես ԵԱՀԿ գործող նախագահի գործողությունները կարտացոլեն այս ոգին»,-ասել է Իտալիայի դեսպան Ջովաննի Ռիչուլլին: