«Ուոթֆորդ» «Չելսի». կարմիր քարտ, միջնամատ, ջախջախիչ պարտություն…

Երեկ Անգլիայի Պրեմիեր լիգայի 26-րդ տուրի խաղում «Ուոթֆորդը» սեփական հարկի տակ 4:1 հաշվով հաղթանակ է տարել «Չելսիի» նկատմամբ:  Այս հանդիպումը աչքի է ընկել ոչ միայն անսպասելի խոշոր հաշվով, այլև սկանդալով։

«Չելսին» 30-րդ րոպեից հանդես էր գալիս 10 խաղացողներով, դաշտից հեռացվել էր «ազնվականների» կիսապաշտպան Տյեմուե Բակայոկոն:

Խաղի ամենահիշվող դրվագներից մեկը 42-րդ րոպեն էր. «Ուոթֆորդի» ավագ Տրոյ Դինին 11 մետրանոց հարվածով «Չելսիի» դարպասը գրավելուց հետո միջնամատ էր ցույց տվել տրիբունաներին: Ըստ  Daily Mail-ի՝ Անգլիայի ֆուտբոլային ասոցիացիան կքննարկի այդ միջադեպը:

«Չելսիի» գլխավոր մարզիչ Անտոնիո Կոնտեն հանդիպուց հետո մեկնաբանել է իր թիմի կրած ջախջախիչ պարտությունն  ու թիմի կիսապաշտպան Տյեմուե Բակայոկոյի հեռացումը.

«Մի քանի րոպեի ընթացքում երկու դեղին քարտ … իհարկե, նման իրավիճակներից պետք է խուսափել: Մեզ համար շատ ծանր պահ էր, մնացինք 10 հոգով և շատ վատ խաղացինք:

 Ջանում էինք, բայց այսօր մեզ մոտ ոչինչ չստացվեց, վատ էինք վարվում գնդակի հետ:

Նման իրավիճակում մեղավոր է մարզիչը: Հնարավոր է` ես սխալվեցի մեկնարկային կազմի հարցում: Երբ այդպես սկսում ու խաղում ես հետագայում, կասկածներ են առաջանում: Խաղի ընթացքում արդեն դժվար էր ինչ-որ բան փոխելը. ֆուտբոլիստները դա հասկանում են և սխալ որոշումներ են կայացնում: 

Երկրորդ կեսում թիմը ահռելի կամք ցուցաբերեց, բայց միևնույն ժամանակ` եղան շատ ցնցումներ: Մենք այսպես չենք խաղում: Պետք է սա ընդունել. ընթացիկ մրցաշրջանում դեռ ստիպված կլինենք շատ պայքարել: Չափազանց դժվար կլինի»,- ասել է Կոնտեն:

The Telegraph պարբերականի հաղորդմամբ՝ «Չելսիի» գլխավոր մարզիչ Անտոնիո Կոնտեն կարող է հեռանալ զբաղերած պաշտոնից, և հրապարակել է մարզիչների ցանկը, ովքեր կարող են գլխավորել լոնդոնյան ակումբը: Առաջատարը «Բարսելոնայի» նախկին մարզիչ Լուիս Էնրիկեն է, նրան հաջորդում են՝ Գուս Հիդինկը, ով նախկինում գլխավորել է «Չելսին» և  Թուրինի «Յուվենտուսի» գլխավոր մարզիչ Մասիմիլիանո Ալեգրիին:

 «Ուոթֆորդ» «Չելսի» հանդիպման կարևոր պահերը կարող եք դիտել ստորև։