«Ավրորա» մարդասիրական մրցանակի 2022թ.-ի դափնեկիրը Ջամիլա Աֆղանին է

«Ավրորան» ապացուցել է, որ հայերը չեն հանձնվել և չեն հանձնվելու. Իտալիայում, Մխիթարյան միաբանության հարկի տակ, հոկտեմբերի 14-16-ը, տեղի է ունեցել «Ավրորա» համաշխարհային մարդասիրական արդեն 7-րդ մրցանակի շնորհման արարողությունը: Գիտելիքի և իմաստնության տաճարում հավաքվել են մարդասերներ ամբողջ աշխարհից՝ արժանին մատուցելու մարդկային ոգու տոկունությանն ու համամարդկային արժեքներին և 2022 թ.-ի մրցանակը շնորհելու դափնեկրին:

Վենետիկի Սան Թեոդորոյի մեծ դպրոցում նախ տեղի ունեցավ քննարկում՝ «Ի պատիվ 2022 թ. «Ավրորայի» հերոսների», որի ընթացքում էլ ներկայացվեցին 2022 թ. «Ավրորայի» հերոսներն ու նրանց խիզախ մարդասիրական գործունեությունը.

Ջամիլա Աֆղանի -Աֆղանստան. Ջամիլան 25 տարի պայքարում է Աֆղանստանի կանանց կրթությունը հասանելի դարձնելու համար:
Եմենից Հադի Ջումանը վտանգելով սեփական կյանքը, իրականացնում է ռազմագերիների փոխանակում և առաջնագծից զոհվածների մարմինների դուրսբերում: Եգիպտոսից Մահինուր էլ-Մասրին էլ կազմակերպում է բողոքի խաղաղ ակցիաներ և դատարանում պաշտպանում քաղբանտարկյալների շահերը։

Մարդասիրական նախաձեռնության համահիմնադիրների խոսքով, «Ավրորայի» հերոսներն արտասովոր մարդիկ են, որոնք ամեն օր վտանգում են իրենց կյանքն ու ազատությունը՝ հանուն այլոց։ Վհատեցնող մարտահրավերի բախվելիս նրանք կատարել են աներևակայելի դժվար ընտրություն. օգնել կարիքավորներին՝ նրանց վեր դասելով սեփական անձից: Զուգահեռներ անցկացնելով նկատեցին՝ ինչպես ավելի քան 100 տարի առաջ, Հայոց ցեղասպանության ժամանակ շատ-շատերը ձեռք են մեկնել ցեղասպանությունից մազապուրծ մեր նախնիներին՝ օգնելով նրանց երկրորդ անգամ նոր կյանք սկսել, այնպես էլ այսօր «Ավորայի» հերոսներն են ձեռք մեկնում ծանր վիճակում հայտնված մարդկանց:

«Ավրորա» մրցանակի շնորհման արարողությունն այս տարի ևս, արդեն երկրորդ անգամ անցկացվեց հայ ժողովրդի համար մշակութային ու հոգևոր կենտրոններից մեկում՝ Վենետիկի Սուրբ Ղազար կղզում, Մխիթարյան միաբանության հարկի տակ: «Ավրորա»-ի համահիմնադիր Նուբար Աֆեյանը նախ խոսեց «Ավրորայի» ստեղծման և նշանակության մասին:

«Ավրորայի» համահիմնադիր Ռուբեն Վարդանյանն էլ նշեց, որ «Ավրորան» հիմք է տալիս վստահ լինելու, որ անկախ բոլոր մարտահրավերներից, անկախ բոլոր ճգնաժամերից, որոնց «Ավրորայի» հերոսները բախվում են ողջ աշխարհում, նրանք այն մարդիկ են, որոնք հիանալի աշխատանք են կատարում և առաջնորդների այն օրինակն են, որոնց պետք է հետևել:

«Ավրորա» մրցանակի ընտրող հանձնաժողովի նախագահ և Լոնդոնի Կայսերական քոլեջի Համաշխարհային առողջապահական նորարարությունների ինստիտուտի համաղեկավար Լորդ Արա Դարզին էլ նշեց, որ ամեն տարի ավելի ու ավելի շատ թեկնածուների անուններ են ստացվում, հերոսներ, որոնք աշխարհի տարբեր ծայրերում արտասովոր մարդկանց տոկունության և ուժի վկայությունն են:

Եվ ահա եկավ այդքան սպասված պահը. 2022 թ.-ի մրցանակի դափնեկրի անունը հնչում է փոքրիկի շուրթերից.

Մանրամասները՝ ռեպորտաժում: