Էկոնոմիկայի նախարարության բյուջեն 2020 թվականի համեմատ ավելացել է շուրջ 22,5 տոկոսով

ՀՀ ԱԺ տնտեսական ու ֆինանսավարկային եւ բյուջետային հարցերի մշտական հանձնաժողովների համատեղ նիստում Բաբկեն Թունյանի եւ Գեւորգ Պապոյանի նախագահությամբ շարունակվել են 2022 թվականի պետական բյուջեի կատարողականի քննարկումները:

Բյուջեի կատարման վերաբերյալ Էկոնոմիկայի նախարարության տեղեկանքը ներկայացնելով` ՀՀ ֆինանսների նախարար Վահե Հովհաննիսյանը նշել է, որ նախարարությունն ունի օրենքով հաստատված 13 ծրագիր եւ 58 միջոցառում, սակայն փաստացի իրականացվել է 12 ծրագիր եւ 63 միջոցառում: Նախարարության տարեկան բյուջեն սահմանվել էր 42,2 մլրդ դրամ, սակայն փաստացի իրականացվել է 53 մլրդ դրամի ծախս: Տարվա ընթացքում ճշտված պլանը կազմել է 55,7 մլրդ դրամ: Ճշտված պլանի նկատմամբ կատարողականը կազմել է 95 տոկոս:

«Եթե համեմատենք 2020 թվականի հետ, ապա Էկոնոմիկայի նախարարության բյուջեն ավելացել է շուրջ 22,5 տոկոսով»,- արձանագրել է նախարարը:

Հարցուպատասխանի ձեւաչափում ԱԺ ֆինանսավարկային եւ բյուջետային հարցերի մշտական հանձնաժողովի նախագահ Գեւորգ Պապոյանը փորձել է հասկանալ, թե որն է ընթացքում Էկոնոմիկայի նախարարության բյուջեի ճշտման եւ հավելյալ գումար հատկացնելու պատճառը:

Նախարարի պարզաբանմամբ կա երկու հիմնական պատճառ. հաճախ նախարարության կողմից իրականացվող սուբսիդավորման ծրագրերն ավելի մեծ պահանջարկ ունեն, քան պլանավորված էր, եւ տարվա վերջին հավելյալ գումարի պահանջ է լինում: Հաջորդը` տարվա ընթացքում տնտեսության այս կամ այն ճյուղին աջակցելու հարցեր են առաջանում, եւ այս ավելացումների մի մասը նաեւ դրանով է պայմանավորված:

«Եթե մենք տնտեսությունից ավելի փող ենք հավաքում, եւ մյուս կողմից այդ փողը չենք ծախսում, ապա Ձեր կարծիքով այս համատեքստում ավելի հարկեր հավաքելը նպատակահարմար է ու ճի՞շտ, եւ արդյոք դա տնտեսությանն ավելի շատ օգնո՞ւմ է, թե` վնասում»,- նման հարց է հնչեցրել Տնտեսական հարցերի մշտական հանձնաժողովի նախագահի տեղակալ Բաբկեն Թունյանը:

Կարեւորելով հարցադրումը` նախարարը նշել է, որ պատասխանն այս հարցում միանշանակ չէ: «Անցած տարի մեր քաղաքականությունը տնտեսության վրա ունեցել է զսպող ազդեցություն, այսինքն` բյուջետային ազդակը եղել է 2,1 եւ այդ կետով զսպող ազդեցություն ենք ունեցել: Կարելի է հարցնել` սա լա՞վ է, թե` վատ: Կարծում եմ` եթե անցած տարվա համատեքստում նայենք, լավ է, քանի որ եթե այդ զսպող ազդեցությունը չունենայինք, ավելի մեծ գնաճ կունենայինք: Այստեղ այլ հարցեր էլ են առաջանում` արդյո՞ք հարկում ենք այն ճիշտ ոլորտներում, որոնք գերտաքացած են: Այստեղ պատասխանը միանշանակ չէ»,- նշել է Ֆինանսների նախարարը: Այս համատեքստում Վահե Հովհաննիսյանը կարեւորել է հարկային համակարգն առավել ճկուն դարձնելը, որ հնարավոր լինի ավելի արագ արձագանքել տնտեսության արագ փոփոխվող միջավայրին:

Անդրադառնալով այս տարվա առաջին երեք ամիսների կատարողականին` նախարարն ընդգծել է, որ կա կատարողականների խնդիր, ինչը, սակայն, միայն կատարման խնդիր չէ, այլ մասամբ պայմանավորված է եռամսյակային պլանավորման խնդիրներով: «Անցած տարի էլ ունեինք նման վիճակ, բայց տարվա վերջում այդ կատարողականների ցուցանիշներն էականորեն բարելավվեցին, եւ մենք ունեինք շատ ավելի լավ ցուցանիշներ, քան նախորդ տարիներին: Քաղաքականության շնորհիվ տարեցտարի այս ցուցանիշները բարելավվելու ենք: Կապիտալ ծախսերի մասով մեր պլաններն առաջանցիկ տեմպերով են առաջ գնում, եւ մեր կարողությունների զարգացումը կարեւոր մարտահրավեր է: Այս ուղղությամբ էլ մենք հիմա ջանքեր ենք գործադրում, որ մյուս տարի նաեւ նոր մեխանիզմներ ներդնենք այն գերատեսչություններում, որոնք կապիտալ ներդրումներ կատարող են»,- փաստել է զեկուցողը: Նախարարը խոսել է նաեւ կապիտալ ներդրումների մասով իրականացված եւ մարդկային ներուժի ու կարողությունների զարգացման հարցում առաջիկայում նախատեսվող քայլերի մասին: