Բանավեճ Արարատ Միրզոյանի և Կարեն Ավագյանի միջև

ԱԺ գիտության, կրթության, մշակույթի, երիտասարդության և սպորտի հարցերի մշտական հանձնաժողովը այսօր դրական եզրակացությամբ առաջիկա լիագումար նիստերի օրակարգ է ընդգրկել «Բարձրագույն կրթության մասին» օրենքի նախագիծը:

Հիշեցնենք, որ ամիսներ շարունակ քննարկվող այս նախագիշը բավականին վիճելի դրույթներ ուներ ու դարձել էր կռվախնձոր ԱԺ ՀՀԿ և «Ծառուկյան» խմբակցությունների միջև:

Քննարկման սկզբում ՀՀ ԿԳ նախարար Լևոն Մկրտչյանը տեղեկացրել է, որ խմբակցությունների հետ ունեցած աշխատանքային քննարկումների արդյունքում եկել են փոխզիջման ու գտել շատ վիճելի հարցերի լուծումներ: Դա հաստատեց նաև հանձնաժողովի նախագահ, «Ծառուկյան» խմբակցության անդամ Վարդան Բոստանջյանը:

«Ելք» խմբակցության ներկայացուցիչ Արարատ Միրզոյանը իր հերթին արձագանքել է, որ իրենց խմբակցությունը քննարկումներին չի մասնակցել ու կոնկրետ իրենք որևէ մեկի հետ փոխզիջման չեն եկել:

Ըստ էության, վիճելի բոլոր հարցերը գրեթե լուծվել են: Օրինակ բուհերի ռեկտորների տարիքային շեմը, որը նախագծի նախնական տարբերակում նշվել էր 70 տարեկանը, ինչն էլ դարձել էր վեճերի առարկա, իջեցվել ու սահմանվել է 65 տարեկանը:

Հանձնաժողովում, սակայն, բանավեճի առարկա դարձավ ԱԺ ՀՅԴ խմբակցության անդամ Արմենուհի Կյուրեղյանի առաջարկը բուհերի կառավարման խորհրդի կազմի նշանակման մասով: Պատգամավորն առաջարկել էր այդ լիազորությունները տրամադրել ԿԳ նախարարին: Նախարար Լևոն Մկրտչյանը տեղեկացրել է, որ այդ հարցը քննարկել է վարչապետի հետ ու սկզբունքային խնդիր չեն տեսնում, այսինքն կառավարությունը պատրաստ է ընդունել առաջարկը:

Առաջարկը սակայն անընդունելի են համարում ԱԺ ՀՀԿ խմբակցության ներկայացուցիչները, պնդելով, որ դա գործադիրի ղեկավարի լիազորությունների հարց է:

«Ելք» Խմբակցության անդամ Արարատ Միրզոյանը հորդորել է գործընկերներին ընդունել Կյուրեղյանի առաջարկը, պնդելով, որ թեև հարցը ավելի շատ տեխնիկական բնույթի է, սակայն հանրապետականների այս մոտեցումից տպավորություն ունի, որ հարցի տակ թաքնված քաղաքական ենթատեքստ կա:«Եթե քաղաքական մեծամասնությունը չի անսում գործադիրի կարծիքին, խորհրդարանական գործընկերների՝ Դաշնակցության և «Ելք»-ի ներկայացուցիչների կարծիքին և պնդում է, ուրեմն թույլ տվեք մի քիչ անմեղ շանտաժ անել ու ասել, որ դա ինձ հիմք կտա ենթադրությունների ճանապարհով գնալ»- հայտարարել է Միրզոյանը:

ՀՀԿ-ական պատգամավոր Կարեն Ավագյանը նշեց, որ ընդդիմադիր գործընկերոջ դիրքորոշումը ավելի շատ կապրիզ է հիշեցնում, քան բովանդակային քննարկում: Ավագյանի պնդմամբ, եթե նման փոփոխություն կատարվի այս օրենքում, ապա պետք է վեարանայվեն նաև բոլոր հիմնադրամներին վերաբերող որոշումները, ինչպես նաև բուհերի կառավարման խորհուրդների կանոնադրությունները:

Պատգամավոր Արմենուհի Կյուրեղյանի առաջարկը դրվել է քվեարկության ու չի ընդունվել: Դեմ են քվեարկել հանձնաժողովի ՀՀԿ 5 անդամները, իսկ Ծառուկյան , Ելք և ՀՅԴ խմբակցությունները ՝ կողմ: