Ուսուցողական և հանրային իրազեկմանը նվիրված միջոցառումներ Արմավիրի և Կոտայքի մարզերում

ՆԳՆ փրկարար ծառայության Արմավիրի և Կոտայքի մարզային փրկարարական վարչությունների ծառայողները մի շարք կազմակերպություններում, բնակավայրերում, ուսումնական հաստատություններում կազմակերպել և անց են կացրել հատուկ տակտիկական ուսումնավարժություններ, գործնական պարապմունքներ, սեմինար-դասախոսություններ և իրազեկման աշխատանքներ՝ միտված բարձրացնելու բնակչության պատրաստվածությունը և աղետներին դիմակայունությունը։

Հունիսի 21-ին Արմավիրի մարզի Արմավիր համայնքում անցկացվել է «ՀԱԷԿ-ում միջուկային և (կամ) ճառագայթային վթարի դեպքում բնակչության պաշտպանության կազմակերպումը» թեմայով շտաբային ուսումնավարժություն:
Ուսումնավարժության անցկացման նպատակներն էին կատարելագործել համայնքի ղեկավար կազմի ունակությունները բնակչության պաշտպանության միջոցառումների իրականացման, որոշումների ընդունման, բարելավել ուժերի պատրաստականությունն աղետի գոտում՝ փրկարարական և անհետաձգելի վթարավերականգնողական աշխատանքների իրականացման գործում:

Մասնակցում էին ՄՓՎ անձնակազմը, համայնքապետարանի աշխատակազմը, համայնքի արտակարգ իրավիճակների և տարահանման հանձնաժողովները, Արմավիր համայնքի մի շարք բնակավայրերի վարչական ղեկավարները:
Քննարկվեցին բնակչության պաշտպանության, արձագանքող ուժերի առկա հնարավորությունների և արտակարգ իրավիճակներում փոխհամագործակցության վերաբերյալ հիմնահարցեր:
Հունիսի 17-ից 21-ը ՀՀ ՆԳՆ Ռուս-հայկական մարդասիրական արձագանքման կենտրոնի կողմից Արմավիրի մարզային փրկարարական վարչությունում անցկացվել է «Փրկարարական աշխատանքների իրականացումը ՃՏՊ-ի ժամանակ» թեմայով վերապատրաստման դասընթաց, որին մասնակցել են ստորաբաժանումներից թվով 6 փրկարարական ծառայողներ:

Հրդեհների դեմ պայքարելու կարողությունների հզորացումը և հրդեհների առաջացման սկզբնական փուլում արագ արձագանքման կազմակերպումը կարևորելով ամսվա ընթացքում «Քարակերտի թիվ 2-րդ միջնակարգ դպրոց» ՊՈԱԿ-ում, «Շուշան» մանկապարտեզ ՀՈԱԿ-ում և «Անուլ-Հ» ՍՊԸ-ի ԱԳԼՃԿ-ում անց են կացվել համապատասխանաբար «Հրդեհաշիջումը տանիքում», «Տարհանում և հրդեհաշիջում պահեստում բռնկված հրդեհի ժամանակ» և «Հրդեհ գազալցակայանի լիցքավորման կետում» թեմաներով հատուկ տակտիկական ուսումնավարժություններ:

Դասախոսություններ, տեսական և գործնական պարապունքներ են անցկացվել նաև Կոտայքի մարզի մի շարք օբյեկտներում՝ մասնավորապես մի շարք կրթական և նախակրթական ուսումնական հաստատություններում, «Ռուբիկ Հարությունյանի անվան Աբովյանի բժշկական կենտրոն» ՓԲԸ-ում, «Գազպրոմ Արմենիա» ՓԲԸ-ի «Տրանսգազ» ՍՊԸ-ի Աբովյանի գազի ստորգետնյա պահեստավորման կայանում։

Դասախոսությունների ժամանակ ուսումնասիրվել են «Օդային տագնապ ազդանշանի ժամանակ վարվելակերպի կանոնները», «Օդային տագնապ ազդանշանի դեպքում անձնակազմի պատսպարման կազմակերպումը և իրականացումը», «Երկրաշարժի ժամանակ բնակչության վարվելակերպի կանոնները» և «Բնակչության տարահանման կազմակերպում» թեմաները, որոնք անց են կացվել ինտերակտիվ տարբերակով և միաժամանակ ուսուցանվողները քննարկումների և հարց-պատասխանի միջոցով հնարավորություն են ստացել ամրապնդել ստացած գիտելիքները։

«Եղվարդի մարզակոշիկների ֆաբրիկա» ԲԲԸ-ում և «ՀրազՋԷԿ»-ի տարածքում համապատասխանաբար ստորաբաժանումների կողմից կազմակերպվել և անց են կացվել նաև «Հրդեհաշիջման և տարահանման աշխատանքների կազմակերպում և իրականացում արտադրական օբյեկտում բռնկված հրդեհի դեպքում» և «Հրդեհաշիջման և տարհանման աշխատանքների կազմակերպումն ու իրականացումը բլոկային մասի կաթսատուրբինային արտադրամաս-2-ի 3-րդ գազաագրեգատի յուղի բաքի արտահոսքից բռնկված հրդեհի դեպքում» թեմաներով հատուկ տակտիկակական ուսումնավարժություններ՝ հրդեհների կանխարգելման, հրդեհաշիջման, ինչպես նաև դրանց հետ կապված վթարային-փրկարարական աշխատանքներ անցկացնելու նպատակով։

Կոտայքի մարզային փրկարարական վարչության կողմից մարզային քաղաքացիական պաշտպանության ծառայությունների շտաբի պետերի հետ անցկացվել է 2024թ. 2-րդ եռամսյակի հրամանատարական պատրաստության պարապմունքներ՝ ՀՀ օրենքը «Արտակարգ իրավիճակներում բնակչության պաշտպանության մասին» և ՀՀ օրենքը «Քաղաքացիական պաշտպանության մասին» թեմաներով, որոնք նպատակ ունեին կատարելագործել ղեկավար կազմի ունակությունները՝ ՔՊ միջոցառումների իրականացման ընթացքում որոշումների կայացման ուղղությամբ։