Մենք ունենք բավական մեծ օրակարգ Միացյալ Նահանգների հետ. Զոհրաբ Մնացականյան

ՀՀ արտաքին գործերի նախարար Զոհրաբ Մնացականյանը «Իրականում» հաղորդմանը տված հարցազրույցի ժամանակ անդրադարձել է հայ-ամերիկյան հարաբերություններին, Փաշինյան-Թրամփ հանդիպման հավանականությանը: Դիտարկմանը, որ ՀՀ անկախության օրվա առթիվ ԱՄՆ նախագահի ուղերձն ավելի ջերմ բարեկամական էր, պատասխանելով հարցին` դա սպասելի՞ էր, Մնացականյանը պատասխանել է.

«Մենք ունենք բավական մեծ օրակարգ Միացյալ Նահանգների հետ: Այն մեր գործընկեր երկրներից մեկն է, որի հետ 27 տարիների ընթացքում կառուցել ենք բավական հարուստ օրակարգ: Իհարկե, շատ ոգևորիչ է: Միացյալ Նահանգները ողջունեցին այն իրադարձությունները, որոնք տեղի էին ունենում Հայաստանում, որոնք ուղղված էին ժողովրդավարության, օրենքի գերակայության ամրապնդմանը: Այդ բոլորն արժեքների վերահաստատման, ամրապնդման գործընթացներ էին: Միացյալ Նահանգները, այդ առումով լինելով մեր գործընկերը, մեզ ողջունում են, մեզ շնորհավորում: Իհարկե, այդ ջերմությունը շատ ոգևորիչ է, շատ լավ է»:

Լրագրողի հարցին` կարելի՞ է արձանագրել, որ սկսվում է հարաբերությունների նոր, ավելի դինամիկ փուլ, Մնացականյանը պատասխանել է, որ հայ-ամերիկյան հարաբերությունները շարունակական են, երկու երկրներն ունեն ընդլայնվող օրակարգ:

«Միացյալ Նահանգները բավական երկար աշխատել են մեզ հետ այս օրակարգի շուրջ, և մենք միանշանակ շարունակելու ենք: Մենք միայն ողջունում ենք և ասում, որ կկարողանանք առավել խորացնել և ամրապնդել մեր համագործակցությունը»,- նշել է նա:

Անդրադառնալով Արցախի խնդրի կարգավորման վրա այս հարաբերությունների ազդեցությանն ու ԱՄՆ նախագահի ուղերձում նշված հետևյալ ձևակերպմանը, թե «առաջիկա ամիսներին հնարավորություններ են բացվում Լեռնային Ղարաբաղի հակամարտության կարգավորման համար, որը կարող է նաև նոր հնարավորություններ բացել հայ-ամերիկյան գործակցության համար: Որպես ԵԱՀԿ Մինսկի խմբի անդամ-պետություն, Միացյալ Նահանգները պատրաստ է աշխատել՝ հակամարտության տևական խաղաղ լուծում գտնելու շուրջ», Մնացականյանը նշել է, որ նման ուղերձը շատ ողջունելի է այն առումով, որ Միացյալ Նահանգները հանդիսանում են երեք համանախագահ երկրներից մեկը, ունեն բավական մեծ ներդրում:

«Գիտեք մեր դիրքորոշումը, որ մենք վճռական ենք և հավատարիմ խնդրի բացառապես խաղաղ ճանապարհով հանգուցալուծմանը: Միացյալ Նահանգների ջանքերը շատ էական են, և, այո՛, մենք պատրաստ ենք շարունակել աշխատել՝ կառուցողական ուղին բռնած, առաջ տանել այս գործընթացը դեպի խաղաղ հանգուցալուծում: Միացյալ Նահանգները, համանախագահ են Ռուսաստանի և Ֆրանսիայի հետ միասին. այս ձևաչափը շարունակում է մնալ միջազգայնորեն ճանաչված և աջակցություն ստացած ձևաչափ: Այն իր մեջ ներառում է այդ երեք երկրները, որոնք ունեն ներկայություն այս տարածաշրջանում, ունեն կարողություն, ուժ՝ մեզ աջակցելու, լավագույնս կատարելու միջնորդության դերը: Եվ մենք ողջունում ենք, որ Միացյալ Նահանգները վերահաստատում են իրենց պատրաստակամությունը՝ շարունակելու այս աշխատանքը մյուս համանախագահ երկրների հետ միասին»,- ասել է նա:

Հարցին՝ hնարավոր համարո՞ւմ է ՄԱԿ-ի Գլխավոր ասամբլեայում Փաշինյան-Թրամփ հանդիպումը, ՀՀ արտաքին գերատեսչության ղեկավարը նշել է, որ դա շարունակական գործընթաց է, և նման հանդիպման համար իրենք շարունակում են պատրաստել բոլոր հիմքերը, որպեսզի այդ հանդիպումը կայանա, լինի բովանդակալից և արդյունավետ: