Նույնիսկ նրանք, ովքեր նախկինում կաշառք են վերցրել, այսօր արդար ընտրությունների ցանկություն ունեն. Մհեր Շահգելդյան

ՕԵԿ քաղաքապետի թեկնածու Մհեր Շահգելդյանը կարծում է, որ Երևանի ավագանու այս ընտրություններն ըստ էության հեղափոխությունից հետո առաջին ընտրությունն են, և դրանով իսկ կարևոր են: Այս մասին Շահգելդյանը նշեց «Ազատության» հետ զրույցում:

«Մենք աջակցել և աջակցելու ենք հեղափոխությանը, որովհետև Հայաստանում ժողովրդավարության կայացումը կարևորագույն խնդիրներւց մեկն է: Այս ընտրությունները, որ պետք է անցնեն առանց ընտրակաշառքների, վարչական ռեսուրսների կիրառման, առանց կեղծիքների, կարևոր են Հայաստանի ապագա քաղաքական համակարգի ձևավորման, իրական ժողովրդավարության կայացման տեսանկյունից»,- ասաց նա:

Շահգելդյանն այս ընտրություններից դրական ակնկալիքներ ունի, նա մասնավորեցրեց` ըստ օրենքի` նվազագույնը երեք կուսակցություն պետք է լինի Ավագանիում, որպեսզի ավագանին կարողանա աշխատել. «Օրինաց երկիր»-ն ակնկալում է լինել այդ երեք քաղաքական ուժերից մեկը: Քաղաքապետի թեկնածուն կարծում է` սրանք հենց այն ընտրությունները պետք է լինեն, որոնք անհրաժեշտ են լինելու Հայաստանի Հանրապետությանը:

Լրագրողի հարցին` այն ուժերը, որոնք նախկինում ընտրակաշառքի մեջ են մեղադրվել, պահածոներ են բաժանել և այլն, այս անգամ կկարողանա՞ն ձայներ ապահովել առանց այդ ամենի, Շահգելդյանը պատասխանեց, որ չի ցանկանում առաջ անցնել ու կանխորոշել որևէ քաղաքական ուժի ստացած ձայները և քվեները:

«Պետք է ժողովուրդը որոշի, ինչպես ասում են` ժողովրդի ձայնով և Աստծո կամոք: Նույնիսկ այն քաղաքացիները, որոնք նախկինում գայթակղվել և կաշառք են վերցրել, այսօր ցանկություն ունեն նորմալ, օբյեկտիվ, արդար, մաքուր ընտրությունների»,- նշեց նա:

Դիտարկմանը, թե` ինչպե՞ս են աջակցել հեղափոխությանը, քանի որ իրենց փողոցում չեն տեսել, Շահգելդյանը նշեց, որ աջակցությունը եղել է առաջին հերթին հայտարարություններով, առավել քան 9 հայտարարություն է եղել, իրենք եղել են հանրահավաքներին, հազարավոր կուսակցականներ մասնակցել են գործընթացներին, 12-ի նկատմամբ քրգործեր են հարուցվել, բռնություն է կիրառվել:

«Մենք այսօր էլ աջակցում ենք հեղափոխությանը և աջակցելու ենք կաշառակերության, կոռուպցիայի դեմ պայքարին, մարտի 1-ի դեպքերի, քրեական հանցագործությունների բացահայտմանը, աջակցում ենք հեղափոխության գաղափարախոսությանը»,- ասաց ՕԵԿ քաղաքապետի թեկնածուն:

Շահգելդյանը կարծում է, որ իրենք Ավագանիում բարձր ներկայացվածություն կունենան: