Այս ընտրությունը բոլորիս քննությունն է. Զարուհի Փոստանջյան

«Երկիր ծիրանի» կուսակցության քաղաքապետի թեկնածու Զարուհի Փոստանջյանի գնահատմամբ` Երևանի ավագանու արտահերթ ընտրությունները քննություն են գործող իշխանության համար:

«Դեռ հեղափոխություն տեղի չի ունեցել, ամենակարևորն այս իշխանության ստանձնած պարտականությունն է` արդար, թափանցիկ ընտրությունների անցկացումը: Սա այս իշխանությունների քննությունն է, ոչ թե մեր պայքարը ընտրակեղծարարության դեմ, հետևաբար, մենք սպասում ենք, թե ինչպես են քննությունները հանձնում իշխանությունները»,- ասաց նա:

Փոստանջյանի խոսքով` եթե անգամ լինեն ընտրախախտումների դեպքեր, կանխարգելիչ գործիքը գործող իշխանությունների ձեռքին է: Նա ասաց, որ ընտրակաշառք բաժանելու մասին տեղեկություններ իրեն էլ են հասել, լսել է, սակայն ընդգծեց` ընտրակաշառք բաժանելու և վերցնելու գործընթացն օպերատիվ հետախուզական ծառայությունների իրավասության մեջ է մտնում, ոչ թե քաղաքացիների, և եթե կան հիմնավոր կասկածներ, պետք է հարուցվեն քրգործեր, մեղադրանք առաջադրվի և սկսվի քրեական հետապնդում:

Քաղաքապետի թեկնածուն նշեց, որ ցանկալի է`ընտրապայքարին մասնակցած բոլոր քաղաքական ուժերն ունենան ժողովրդի քվեն, վստահությունը, քանի որ ավագանու բոլոր ցուցակների մեջ կան մարդիկ, որ իրոք սրտացավ են Երևանի համար, և պետք է բոլորը հնարավորություն ունենան կյանքի կոչելու իրենց ներկայացրած ծրագրերը:

«Սա մի հոգու գործ չէ, այս պահին անգամ կառավարությունն իր գործառույթները լիարժեք չի կարողանում իրականացնել: Երկիրը երբ քանդված է, բոլորը պետք է աշխատանքներին մասնակցեն, Երևանի կառավարման մեջ պետք է մեր ազգի ողջ ներուժը կիրառենք: Ես կցանկանայի, որ բոլորս ներկայացված լինեինք, և մեր ներկայությունը լիներ բազմազանության և բոլորիս ուժերի կոնսոլիդացման միջոցով»,- ասաց նա:

Ընտրություններում չհաղթելու դեպքում Փոստանջյանը պատրաստ է շնորհավորել հաղթող ուժին, հետագայում էլ պահանջել ծրագրերի իրականացում:

«Սա բոլորիս քննությունն է, մենք այլևս իրավունք չունենք այս քառորդ դարի ընթացքում եղած արատավոր երևույթները կրկնել, սա քննությունն է գործող իշխանության, մասնավորապես դրանում ընդգրկված կոալիցիայի»,- նշեց Փոստանջյանը:

Որքանով էին այս ընտրությունները պատմական, այդ մասին, ըստ թեկնածուի, հնարավոր կլինի դատել որոշ ժամանակ անց: