Հրթիռային հարվածներից հետո Սիրիայի շուրջ տագնապային-սպասողական վիճակ է

Գիշերը ԱՄՆ, Մեծ Բրիտանիայի և Ֆրանսիայի զինուժը հրթիռակոծել են Սիրիայի տարածքը։ Թիրախում եղել են օդանավակայաններ, ռազմաբազաներ, հետազոտական կենտրոններ։ Ավելի քան 100 հրթիռ է արձակվել, որոնց զգալի մասը հասել է նպատակակետերին։ ShantNews.am-ը հետևում է իրադրությանն իրական ժամանակում ու պարբերաբար թարմացնում այս հրապարակումը։

14։58. Ասադի վարչակազմը կշարունակի պայքարը ահաբեկչության դեմ

Սիրիայի նախագահ Բաշար Ալ Ասադը հայտարարել է, որ Սիրիան կշարունակի պայքարը ահաբեկչության դեմ: Մասնավորապես ըստ նրա՝ շաբաթ օրվա օդային հարվածները չեն կանգնեցնի երկրում «ահաբեկչության դեմ պայքարը»: Այս մասին հայտնել է Սիրիայի պետական հեռուստատեսությունը:

«Այս ագրեսիան միայն կավելացնի Սիրիայի և նրա ժողովրդի վճռականությունը՝ շարունակելու պայքարն ու արմատախիլ անելու ահաբեկչությունը երկրի ամեն մի անկյունում»:

14։53. Իրանը կշարունակի աջակցել Սիրիային. Հասան Ռոհանի

Իրանի նախագահ Հասան Ռոհանին հայտարարել է, որ Իրանը կշարունակի աջակցել Սիրիային: Եռյակի հարվածներից հետո Սիրիայի նախագահ Բաշար Ալ Ասադը հեռախոսազրույց է ունեցել Իրանի նախագահ հասան Ռոուհանիի հետ: Այդ մասին հայտնել է Սիրիայի պետական հեռուստատեսությունը:

Զրույցի ժամանակ Ռոհանին նշել է. «Իրանը կշարունակի կանգնել Սիրիայի կողքին»:

Միաժամանակ Իրանական պետական լրատվական գործակալությունը հայտնել է, որ երկրի առողջապահության նախարարությունը առաջարկել է անհրաժեշտության դեպքում բուժօգնություն տրամադրել Սիրիային:

14:45. ՌԴ ՊՆ․ 103 հրթիռներից 71-ը չեզոքացվել է

Սիրիայի տարածքի ուղղությամբ ԱՄՆ և դաշնակիցների արձակած 103 հրթիռներից 71-ը որսացել ու չեզոքացրել է Սիրիայի հակաօդային պաշտպանությունը։ Այս մասին ճեպազրույցի ժամանակ հայտարարել է ՌԴ ԶՈՒ ԳՇ օպերատիվ վարչության պետ Սերգեյ Ռուդսկոյը։ Կիրառվել են Ս-125, Ս-200, «Բուկ», «Կվադրատ», «Օսա» ՀՕՊ զինատեսակներ։

Զինվորականի խոսքով՝ հրթիռներն արձակվել են Սիրիայի 6 ռազմական օդանավակայանների ուղղությամբ։ Դրանցից չորսի ուղղությամբ արձակված բոլոր հրթիռները չեզոքացվել են, մյուս երկուսի՝ Մեզզեի ու Հոմսի օդանավակայանների ուղղությամբ արձակված հրթիռների մի մասը հասել է թիրախին։

14։30․ Իրաքը «հստակ դիրքորոշում» է ակնկալում արաբ լիդերներից

Իրաքը կոչ է արել արաբական լիդերներին կիրակի օրը Սաուդյան Արաբիայում պլանավորված գագաթաժողովի ժամանակ հստակ դիրքորոշում արտահայտել Սիրիա հարցում: Այդ մասին հաղորդել է Իրաքի պետական հեռուստատեսությունը՝ հղում անելով երկրի ԱԳՆ-ին:

14:25. ՌԴ ՊՆ. Օդային հարվածները քիմիական հարձակման պատասխան չեն

ՌԴ ՊՆ-ն հայտարարել է, որ ԱՄՆ-ի Մեծ Բրիտանիայի և Ֆրանսիայի իրականացրած օդային հարվածները կապ չունեն Դումայի ենթադրյալ քիմիական հարձակման հետ: Փոխարենը դրանք պատասխան են միջազգային ահաբեկչությունից տարածքները ազատագրելու սիրիական բանակի հաջողությունների: Այդ մասին մամուլի ասուլիսում հայտարարել է ՌԴ ԶՈՒ ԳՇ օպերատիվ վարչության պետ Սերգեյ Ռուդսկոյը: Նա նաև նշել է, որ հարվածները հասցվել են ճիշտ այն օրը, երբ Քիմիական զենքի արգելման կազմակերպությունը պետք է սկսեր աշխատել Դումայում:

«Ամերիկյան ագրեսիայի աստը ցույց տվեց, որ ԱՄՆ հետաքրքրված չէ օբյեկտիվ հետաքննության անցկացմամբ, ցանկանում է խաթարել Սիրիայում խաղաղ հանգուցալուծման գործընթացը և ապակայունացնել իրավիճակը տարածաշրջանում և ոչ մի կապ չունի միջազգային ահաբեկչության դեմ պայքարի հայտարարված նախկին նպատակների հետ»:

14։15․ ՆԱՏՕ-ում արտակարգ նիստ կլինի

ՆԱՏՕ-ի գլխավոր քարտուղար Յենս Ստոլտենբերգն իր աջակցությունն է հայտնել Միացյալ Նահանգներին, Ֆրանսիային ու Բրիտանիային՝ Սիրիայի տարածքի հրթիռակոծության հարցում։ Մինչ այդ էլ ՆԱՏՕ-ն դատապարտել էր Սիրիայի վարչակարգի կողմից քիմիական զենքի օգտագործումը, որը, ինչպես նշում են Արևմուտքում, ապացուցված փաստ է։

«Ես աջակցում եմ Միացյալ Նահանգների, Միացյալ Թագավորության և Ֆրանսիայի նախաձեռնած գործողություններին՝ ուղղված Սիրիայի վարչակարգի քիմիական զենքի ենթակառուցվածքների դեմ։ Սա կնվազեցնի ապագայում Սիրիայի ժողովրդի դեմ քիմիական զենքով հարձակվելու վարչակազմի կարողությունները», – հայտարարել է Յենս Ստոլտենբերգը։

Այսօր ավելի ուշ հրավիրված է ՆԱՏՕ-ի արտակարգ խորհրդակցություն, որի ժամանակ հրթիռային հարվածներն իրականացրած երկրների ներկայացուցիչները ՆԱՏՕ-ի դաշնակիցներին ներկայացնելու են իրենց հարձակման մանրամասներն ու արդյունքները։

14։00․ Գերմանիան ողջունում է Սիրիայի հարվածները

Գերմանիայի կանցլեր Անգելա Մերկելը հրթիռային հարձակումները քիմիական զենքի կիրառման կասկածների «անհրաժեշտ և հիմնավորված» պատասխան է համարել:

«Մենք աջակցում ենք այն փաստը, որ մեր ամերիկյան, բրիտանական և ֆրանսիական դաշնակիցները իրենց վրա են վերցրել այս պատասխանատվությունը: Ռազմական միջամտությունը անհրաժեշտ էր և հիմնավորված», – հայտարարել է Գերմանիայի ղեկավարը:

12։30․ ՄԱԿ ԱԽ արտակարգ նիստ է հրավիրել Ռուսաստանը

Ռուսաստանը խստորեն դատապարտել է ԱՄՆ, Ֆրանսիայի և Բրիտանիայի հրթիռային հարվածները՝ դրանք համարելով միջազգային նորմերի կոպիտ խախտումներ։

«Ռուսաստանը հրավիրում է ՄԱԿ Անվտանգության խորհրդի արտակարգ նիստ՝ ԱՄՆ և նրա դաշնակիցների ագրեսիվ գործողությունների քննարկման համար», – ասվում է ՌԴ նախագահի աշխատակազմի հայտարարության մեջ։

12։00․ Իրանը դատապարտում է, Թուրքիան՝ ողջունում

Սիրիայի գործող վարչակազմի դաշնակից Իրանի արտաքին գործերի նախարարությունը դատապարտել է հրթիռային հարվածներն ու դրանք անվանել միջազգային նորմերի խախտում։

Իսկ Թուրքիան պաշտոնապես ողջունել է ՆԱՏՕ-ի դաշնակիցների գործողությունները։ Թուրքական ԱԳ նախարարությունը սա «պատշաճ պատասխան է» անվանել։

9։00․ Ռուսներին չեն հարվածել, ռուսները չեն միջամտել

Հրթիռային հարվածների թիրախները չեն եղել Ռուսաստանի զինուժի՝ Սիրիայում եղած բազաների մոտակայքում։ Ռուսական պաշտոնական աղբյուրները հայտնել են, որ իրենց հարվածներ չեն հասցվել։

Սիրիական մյուս տարածքների հարվածներին ռուսական հակաօդային պաշտպանությունը չի միջամտել, քանի որ, ըստ նրանց, հարվածները չեն հասցվել ռուսական ՀՕՊ պատասխանատվության գոտում։

Ռուսական լրատվամիջոցներն այժմ ցուցադրում են «խաղաղ» Սիրիայի համայնապատկերներ՝ ներկայացնելու համար, թե այնտեղ ամեն ինչ հանգիստ է։

#ПРЯМАЯТРАНСЛЯЦИЯ Ситуация в Дамаске после удара по Сирии https://t.co/J3iHymXJpU

— РИА Новости (@rianru) April 14, 2018

8։30․ 3 տուժա՞ծ Սիրիայում

Սիրիայի պետական լրատվական աղբյուրները հայտարարել են, որ արձակված հրթիռների մեծ մասը սիրիական բանակի կողմից ոչնչացվել է երկնքում։ Սակայն հրթիռային հարվածների հետևանքով կա երեք տուժած։

Արեւմտյան երկրների ռազմական գործողության  պատճառը պաշտոնական Դամասկոսը համարում է հիասթափությունը Սիրիայի հանդեպ դավադրության ձախողումից ու ահաբեկիչների դեմ Սիրիայի բանակի պայքարի հաջողություններից։

«Սիրիան դատապարտում է ԱՄՆ-ի, Մեծ Բրիտանիայի ու Ֆրանսիայի ուխտադրուժ եռյակի ագրեսիան Սիրիայի դեմ, ինչը միջազգային իրավունքի, ՄԱԿ սկզբունքների ու կանոնադրության կոպիտ խախտում է», – ասվում է Սիրիայի ԱԳՆ տարածած հայտարարության մեջ։

Միաժամանակ խուճապ ցույց չտալու համար Սիրիայի նախագահի աշխատակազմը հրապարակել է Բաշար Ասադի՝ սովորական աշխատանքի գնալու վերաբերյալ տեսանյութ։

صباح الصمود..

رئاسة الجمهورية العربية السورية pic.twitter.com/hhIZT6cOTe

— Syrian Presidency (@Presidency_Sy) April 14, 2018

5։30․ Որոնք են եղել հրթիռային հարվածների թիրախները

• Դամասկոսի հետազոտական կենտրոն
• Արևմտյան Հոմսի քիմիական զենքի պահեստ
• Արևմտյան Հոմսի մոտ պահեստ, հրամանատարական կետ։

Tir d’un missile de croisière naval depuis une de nos frégates multimissions cette nuit en Méditerranée. Objectif : un site de production d’armes chimiques du régime syrien. pic.twitter.com/A4hO0EtkvQ

— Florence Parly (@florence_parly) April 14, 2018

Այս թիրախներին են ուղղված եղել ամերիկյան, ֆրանսիական ու բրիտանական ուժերի հրթիռային հարվածները, որոնք ներկայացրել է ԱՄն զինված ուժերի միացյալ շտաբի պետը։

Նրա խոսքով՝ ամերիկյան կողմը կապի մեջ է եղել ռուսական կողմի հետ ու տեղեկացրել է հարվածների մասին, որպեսզի խուսափեն ռուսաստանցի զինծառայողների կորստից ու ավիացիոն միջադեպերից։

4։42․ ԱՄՆ, Ֆրանսիայի և Բրիտանիայի զինուժը հարվածներ է հասցրել Սիրիայի տարածքին

ԱՄՆ-ն, Մեծ Բրիտանիան ու Ֆրանսիան օդային հարված են հասցրել Սիրիային: Սիրիայի պետական հեռուստատեսությունը հայտնել է, որ կա 3 տուժած: Հարվածները հասցվել են այն ժամանակ, երբ ԱՄՆ նախագահ Դոնալդ Թրամփը հեռուսատեսությամբ ելույթ է ունեցել: Նույն այդ ժամանակ Ֆրանսիան եւ Մեծ Բրիտանիան հայտնել են, որ իրենք ևս միացել են հարվածներին:

«Մենք պատրաստ ենք շարունակել պատասխան գործողությունները այնքան ժամանակ, քանի դեռ սիրիական ռեժիմը չի դադարեցրել քիմիական արգելված միջոցների կիրառումը», – հայտարարել է ԱՄՆ նախագահը։

Բրիտանիայի վարչապետ Թերեզա Մեյն իր հերթին հայտարարել է, որ արվում է ամեն ինչ խաղաղ բնակչության շրջանում տուժողներ չունենալու համար։ Ֆրանսիայի նախագահն էլ հաստատել է ֆրանսիական զինուժի մասնակցությունը հարվածներին ու նշել, որ իրենք չեն կարող հանդուրժել Սիրիայում քիմիական զենքի կիրառումը։

RAF Tornados launched Storm Shadow missiles at a regime chemical weapons facility fifteen miles west of Homs, Syria. See images and video here: https://t.co/uSI3loV6Q0 pic.twitter.com/Rd85WLScSR

— Ministry of Defence ???????? (@DefenceHQ) April 14, 2018