Համաձայնագրի վավերացումը պայմանավորված է Ռուս-հայկական համալսարանի կառավարման, կրթական եւ գիտահետազոտական գործունեության արդյունավետության բարձրացմամբ, ինչպես նաեւ գործընթացները ՀՀ եւ ՌԴ օրենսդրությանը համապատասխանեցնելու ձգտումով: Այս մասին ասել է ԿԳՄՍ նախարարի տեղակալ Արթուր Մարտիրոսյանը՝ հուլիսի 2-ին ԱԺ արտահերթ նստաշրջանում քննարկման ներկայացնելով ««Հայաստանի Հանրապետության կառավարության եւ Ռուսաստանի Դաշնության կառավարության միջեւ Հայաստանի Հանրապետությունում Ռուս-Հայկական համալսարանի գործունեության պայմանների մասին» համաձայնագիրը վավերացնելու մասին» օրենքի նախագիծը:
Համաձայնագիրը ստորագրվել է 2024 թվականի դեկտեմբերի 20-ին՝ Մոսկվայում: Այն կնքվում է 10 տարով, որից հետո այն կարող է երկարաձգվել:
Բուհը միջպետական համաձայնագրով հիմնադրվել է 1997 թվականին: Այս պահին բուհն ունի 5000-ից ավելի ուսանող, իսկ հիմնադրումից հետո՝ 1999-2000 թվականներին, ունեցել է 63 ուսանող:
Փաստաթղթով հստակեցվում են համալսարանի իրավական կարգավիճակը եւ այլ հարցեր: Մասնավորապես, հստակ արձանագրվում է, որ բուհը պետական է:
Համաձայնագրում հստակ ձեւակերպված են նաեւ համալսարանի ընդունելության կանոնները, ակադեմիական իրավունքներն ու ազատությունները:
Մասնավորապես, համալսարան ընդունվելու իրավունքից օգտվում են կրթության համապատասխան մակարդակ ունեցող Հայաստանի, Ռուսաստանի, այլ պետությունների քաղաքացիները եւ քաղաքացիություն չունեցող անձինք՝ անկախ սեռից, տարիքից, ռասայից, ազգությունից, լեզվից, ծագումից, գույքային, սոցիալական եւ պաշտոնեական դիրքից, բնակության վայրից, կրոնի նկատմամբ վերաբերմունքից, համոզմունքներից, հասարակական միավորումներին պատկանելությունից, ինչպես նաեւ կողմերի պետությունների օրենսդրությանը համապատասխան այլ հանգամանքներից:
Համալսարան ընդունելության կանոնները սահմանվում են համալսարանի կողմից՝ կողմերի պետությունների օրենսդրությանը համապատասխան: ՀՀ կրթական ծրագրերով ուսուցման համար ընդունելությունն իրականացվում է «ՀՀ կրթության մասին» օրենսդրությանը համապատասխան: ՌԴ կրթական ծրագրերով ուսուցման համար ընդունելությունն իրականացվում է ՌԴ կրթության մասին օրենսդրությանը համապատասխան:
Ռուսաստանի Դաշնության դաշնային բյուջեի բյուջետային հատկացումների հաշվին ուսուցման համար ընդունելության տեղերի քանակը յուրաքանչյուր տարի սահմանվում է ռուսական կողմի լիազորված մարմնի կողմից՝ համալսարանի հայտի հիման վրա, որը տրվում եւ քննարկվում է ռուսական կողմի լիազորված մարմնի կողմից սահմանված կարգով:
Հայաստանի Հանրապետության պետական բյուջեի միջոցների հաշվին ուսուցումը կազմակերպվում է ՀՀ օրենսդրությանը համապատասխան:
ՌԴ դաշնային բյուջեի բյուջետային հատկացումների հաշվին ուսուցումը կազմակերպվում է Ռուսաստանի Դաշնության օրենսդրությանը համապատասխան:
ԱԺ գլխադասային հանձնաժողովը նախագծին դրական եզրակացություն է տվել: Այն ներկայացրել է Ջուլիետա Ազարյանը:
