Իշխող կուսակցության հավանությանն արժանացած Սալոմե Զուրաբիշվիլին մեղադրվում է Ախալքալաքում քսենոֆոբիայի տարածման մեջ

Նախագահական  ընտրություններում առաջադրված անկախ թեկնածու Սալոմե Զուրաբիշվիլիի հոկտեմբերի 2-ին Ջավախքում անցկացրած քարոզարշավն ավարտվել է սկանդալով, ինչպես Ջավախքում, այնպես էլ`Թբիլիսիում: Նա մեղադրվում է քսենոֆոբիայի մեջ:

Զուրաբիշվիլիի քարոզարշավը Ջավախքում, մասնավորապես` Ախալքալաքում, տեղի է ունեցել է բողոքի ակցիայի ֆոնին: «Ազգային շարժում» կուսակցության անդամ կանայք դեմ են արտահայտվել Զուրաբիշվիլիի թեկնածությանը: Քաշքշուկ է եղել ընդդիմադիրների և ոստիկանության աշխատակիցների միջև:

«Դավաճաննե՜ր, դավաճաննե՜ր: Դավաճանը «Վրացաական երազանք» կուսակցությունն է, Սալոմե Զուրաբիշվիլին: Նա երբեք չի դառնա մեր երկրի նախագահը: Ինչո՞ւ է այստեղ եկել այս դավաճանը, եթե նա Վրաստանին մեղադրում է  2008թ․ պատերազմը սկսելու մեջ: Նա ընդհանրապես վրացերեն չգիտի և ոչինչ չի արել Վրաստանի համար»,- դժգոհել են ակցիայի մասնակիցները:

Ախալքալաքի շրջանում  բնակչության հետ հանդիպմանը՝ անդրադառնալով  Վրաստանի քաղաքացիություն հատկացնելու թեմային, նա ընդգծել է , որ գործընթացը եղել է նախագահի մասնավորապես՝ Միխեիլ Սաակաշվիլիի իրավասության ներքո, ով հարցը քննարկելիս առաջնահերթությունը տվել է թուրքերին:

«Մինչև օրս քաղաքացիություն հատկացնելը կատարվել է միայն նախագահի որոշմամբ: Նախկին նախագահը, ով իմ հակառակորդն է, քաղաքացիություն է շնորհել շատ թուրքերի, սակայն  ձեզ  քաղաքացիություն չի տվել »,- ասել է Զուրաբիշվիլին:

Ընդգծելով  իր դերը սահմանադրական փոփոխությունում` նա հայտարարել է , որ շուտով Վրաստանի քաղաքացիներին կթույլատրվի ստանալ նաև երկրորդ երկրի քաղաքացիություն:

Զուրաբիշվիլիի  Ջավախքում արած հայտարարությունները սուր քննադատության են արժանացել ընդդիմադիրների կողմից: Նա մեղադրվել է ազգերի միջև ատելություն հրահրելու մեջ:

«Նման հայտարարությունները տարածաշրջանում հղի են լուրջ վտանգներով»,- հայտարարել է «Եվրոպական Վրաստան» կուսակցության կողմից առաջադրված նախագահի թեկնածու Դավիթ Բաքրաձեն:

Զուրաբիշվիլիի հասցեին ավելի սուր հայտարարություններ է արել«Ազգային Միացյալ շարժման» առաջնորդ , նախագահի թեկնածու Նիկա Մելիան:

«Մենք ստացանք անհերքելի ապացույցներ, որ Զուրաբիշվիլին սովորական թշնամի է: Ինչպես կարող է նախագահ դառնալու ցանկություն  հայտնել և միաժամանակ ասել՝ մեր հայ հայրենակիցներ, նախկին իշխանությունները քաղաքացիություն են շնորհել թուրքերին, իսկ ձեզ՝ հայերին, ոչ», – ասել է Նիկա Մելիան «Ռուսթավի 2» ՀԸ-ի եթերից:

Հասարակական կազմակերպությունների ներկայացուցիչները մեծապես համամիտ են ընդդիմության հետ: «Վրաստանի ժողովրդավարական նախաձեռնության» ՀԿ-ի նախագահ Գեորգի Մշվենիրաձեն նշել է, որ թեև «Զուրաբիշվիլու հայտարարությունը  օրենքի սահմաններից դուրս չէ, այնուամենայնիվ, կործանարար է հանրության համար»:

«Նման հայտարարությունները շատ վտանգավոր են, քանի որ թուրքաֆոբիա են հրահրում: Նրա հայտարարության մեջ թուրքերը ներկայացվել են որպես վտանգի ռիսկ կրողներ: Սա միանշանակ քսենոֆոբիա է: Ավելին, կրկնակի վտանգավոր է, երբ նման հայտարարություններ են արվում էթնիկ խմբին դիմելիս, որը որոշակի ցավագին կապ ունի ներկայիս Թուրքիայից առաջ գոյություն ունեցող Օսմանյան կայսրության հետ», – ասել է Մշվենիրաձեն Netgazeti- ին տված հարցազրույցում:

Աննա Հարությունյան