Սա ևս մի ակնհայտ հաղթանակ էր. ռուս լրագրող Ալեքսեյ Ռոմանովի անդրադարձը հայաստանյան վերջին իրադարձություններին

Վրաստանում բնակվող ռուս լրագրող Ալեքսեյ Ռոմանովը, որը հետխորհրդային երկրների տարածքում ծավալվող քաղաքական իրադարձությունների մասին տեսանյութեր է նկարահանում, անդրադարձել է հայաստանյան վերջին ներքաղաքական իրադարձություններին:

Լրագրողն անձամբ եկել է Հայաստան և այստեղ տեսանյութ նկարահանել:

«Նախարարների հրաժարականներ, հանրահավաք, որը նման է Ազգային ժողովի շենքի գրավմանը»,- այսպես է բնութագրել լրագրողը Հայաստանում տեղի ունեցած վերջին հանրահավաքը:

Ալեքսեյ Ռոմանովը տեսանյութում ցույց է տվել Ազգային ժողովի այգին ՝արդեն հանրության համար բաց վիճակում:

Լրագրողը նշել է, որ Ազգային ժողովի շենքն անհիշելի ժամանակներից փակ է եղել այցելությունների համար:

«Երբ Փաշինյանը մտավ Ազգային ժողով՝ բանակցություններ վարելու, բացեցին դարպասները և Փաշինյանի հետ հազարավոր մարդիկ ներս մտան: Սա ակնհայտ հաղթանակ է»,- նշել է Ռոմանովը:

Նա ցույց է տվել, թե ինչպես են մարդիկ աղբամաններ բերում ԱԺ այգի և նշել, որ սա ենթադրում է, որ այգին երկար ժամանակ բաց կլինի:

Լրագրողը նաև հավելել  է, որ բացվել է Բաղրամյան 26-ը:

«Սա երկիշխանություն է, եթե մարդկանց առաջադրած թեկնածուն դարձել է վարչապետ, իսկ Ազգային ժողովում գտնվում են մարդիկ, որոնք այսօր չեն ներկայացնում հասարակության շահերը, ապա սա դասական երկիշխանություն է, որը աշխարհի ոչ մի երկրում լավ բանի չի հանգեցնի: Ազգային ժողովը թաքուն քվեարկություն է արել և դա ընկալվել է որպես հակահեղափոխական քայլ: Ոմանք այս քայլը համարել են հակահեղափոխական քայլ, ոմանք կարծում են, որ Նիկոլ Փաշինյանն այս քայլով ճնշում է օրենսդիր իշխանությունը, ոմանց կարծիքով էլ սա սադրանք էր, որպեսզի մարդիկ բախվեին պատագամավորների հետ»,- ասել է լրագրողը:

Ալեքսեյ Ռոմանովը նշել է, որ այս ամենից պետք է եզրակացնել, որ Նիկոլ Փաշինյանը կարող է իր «ատամները ցույց տալ», իսկ հաջորդ եզրահանգումը այն է, որ արտահերթ ընտրություններն անպայման պետք է կայանան:

Նա ներկայացրել է Նիկոլ Փաշինյանի հրաժարականի և դրանից հետո 2 շաբաթվա ընթացքում Ազգային ժողովում օրենսդրական ընթացակարգերը, որոնք կարող են հանգեցնել արտահերթ խորհրդարանական ընտրությունների: