Աջ ղեկով մեքենաներ ներկրել-չներկրելու հարցում կողմերը հայտարարի չեկան

Ինչպես արդեն SHANTNEWS.am-ը տեղեկացրել է, այսօր ՀՀ տրանսպորտի, կապի և ՏՏ նախարարությունում քննարկում է կազմակերպվել «Ղեկը աջ» նախաձեռնության մասնակիցների և աջ ղեկով մեքենաների արգելքի հետ առնչություն ունեցող գերատեսչությունների ներկայացուցիչների մասնակցությամբ:

Քննարկման ժամանակ ՊԵԿ-ի ներկայացուցչի կողմից առաջարկվել է աջ ղեկով մեքենաներ ներկրողներին լուծել խնդիրը հետևյալ տարբերակով՝ թույլատրել մեքենաների ներկրումը՝ պայմանով, որ դրանք չեն շահագործվի այնքան ժամանակ, քանի դեռ մեքենայի ղեկը փոխված չէ ձախի:

«Աշխարհում չկա մի կետ, որ զբաղվում է ղեկի լիցենզավորված տեղափոխմամբ: Ես իմ անձնական մեքենան չեմ տեղափոխի, քանի որ հնարավոր են անսարքություններ, խնդիրներ, ինչի՞ եք ստիպում մարդկանց տեղափոխել»,- ասել է նախաձեռնության անդամներից Արտյոմ Դավթյանը, ինչին ի պատասխան, պետական գերատեսչությունների ներկայացուցիչներն արձագանքել են, որ սա սոսկ առաջարկ է, ստիպելու որևէ խնդիր չկա:

«Սա ձեր միա՞կ առաջարկն է, թե՞ այլ առաջարկներ ունենք»,- հարցրել է «Ղեկը աջ» նախաձեռնության անդամ Արթուր Միսակյանը:

Պարզվել է, որ առաջարկը մեկն է, ուստի քննարկումը շարունակվել է այդ առաջարկի շուրջ:

«Առաջարկը ՊԵԿ-ի կողմից ողջունելի է, բայց կան ներկրողներ, որոնք չեն ցանկանում ղեկը փոխեն, դուք էլ չեք ցանկանում: Բացի դրանից՝ էդ ժամանակ նույն քաոսն է լինելու` առաջարկվում է մեկ տարվա ընթացքում ղեկը փոխել, եթե այնտեղ  500 վարպետ է փոխում, այստեղ այդքան վարպետ էլ չկա, հերթեր են լինելու»,- նկատել է նախաձեռնության անդամներից մեկը:

«Մեր ցանկությունն էլ այն է, որ ներկրելուց առաջ գայիք մեզ հարցնեիք՝ կարելի՞ է, թե՞ ոչ: Բայց դա չի եղել, բայց այսպես էլ չի լինի, ձեր առաջարկները ներկայացրեք, լուծում է պետք: Հանուն արդարության եկեք ֆիքսենք, որ դուք ուզում եք, որ օրենքը փոխվի, այսինքն՝ այս քննարկումն էլ է իզուր: Քննարկումը ոչ էֆեկտիվ եմ համարում, եթե միակ պահանջը օրենքի չեղարկումն է, խնդրում եմ անկեղծ ասեք, մենք հանդես կգանք հայտարարությամբ ու մեր շփումները կավարտվեն: Ես հիմա չեմ կարող խոսք տալ, որ այդ օրենքը կփոխվի»,- հակադարձել է փոխնախարարի պաշտոնակատար Արմեն Փամբուխչյանը:

«Ղեկը աջ» նախաձեռնության անդամներն ասել են, որ իրենք չեն եկել կոնկրետ խնդիր առաջ քաշելու: Դիտարկում են նաև միջանկյալ տարբերակները:

«Մենք կարող ենք ՃՈ-ի հետ քննարկումներ ունենալ և նաև նախարարության հետ` մեզ համար որոշակի անհասկանալի ձևակերպումների հետ կապված, որից հետո որոշակի միջանկյալ առաջարկություն կանենք: Մենք ունենք այդպիսի առաջարկներ, պարզապես մինչև պաշտոնապես ձևակերպելը խնդիր ունենք համոզվել դրանց հավաստիության մեջ», – ասել է նախաձեռնության անդամ Արթուր Միսակյանը:

Առարկություններ չեն եղել, ուստի պայմանավորվածություն է ձեռք բերվել քննարկումները շարունակել: ՀՀ տրանսպորտի, կապի և ՏՏ փոխնախարարն առաջարկել է «Ղեկը աջ» նախաձեռնության անդամներին հաջորդ հանդիպմանը ներկայացնել գոնե մեկ նախագիծ:

Հիշեցնենք, որ «Ղեկը աջ» նախաձեռնության անդամների խոսքերով` այս տարի Հայաստանում գնվել է 150-ից փոքր-ինչ ավելի մեքենա։ Այդ մեքենաները Բագրատաշենի անցակետում են, իսկ 2500 ավտոմեքենաները՝ Վրաստանի տարբեր քաղաքներում։

Նախաձեռնության անդամները քննարկման էին եկել առաջարկով, որ օրենսդրական փոփոխություններ նախաձեռնվեն, որպեսզի աջ ղեկով մեքենաների արգելքը կասեցվի մինչև 2020 թվականը: