Եթե իշխանափոխություն չլիներ, հինգ շրջանների վերադարձի հարցը լուծված կլիներ. Ալեքսանդր Դուգին

Ռուս քաղաքագետ, հասարակական գործիչ, Եվրասիական շարժման ղեկավար Ալեքսանդր Դուգինը կարծում է, որ Հայաստանի նոր իշխանությունները շարունակում են ԼՂ հակամարտության կարգավորման գործընթացն այն պայմաններով, որոնք ՀՀ երրորդ նախագահ Սերժ Սարգսյանի իշխանության օրոք համաձայնեցված են եղել ԵԱՀԿ Մինսկի խմբի հետ:

Այդ ժամանակ ձեռք բերված պայմանավորվածությունները, որոնք ենթադրում էին Ադրբեջանի հինգ, իսկ հեռանկարում` յոթ «գրավյալ» շրջանների վերադարձ, քաղաքագետը կարևոր սկիզբ է համարում «ԼՂ հակամարտության հարցը փակուղուց հանելու առումով»:

Մեկնաբանելով իրավիճակը, որ ստեղծվել է ԼՂ հակամարտության կարգավորման հարցում Նիկոլ Փաշինյանի՝ իշխանության գալուց հետո, Դուգինը հայտարարել է, որ երկրի նոր ղեկավարն ի սկզբանե, փաստացի, հրաժարվել է հետևել այդ պայմանավորվածություններին, սակայն այժմ, հարցին ավելի պրագմատիկորեն նայելու, գուցե նաև ավելի պատասխանատու մոտեցման շնորհիվ Փաշինյանը բանակցային գործընթացը շարունակում է նույն ուղղությամբ:

«Բանակցային գործընթացը նախևառաջ ընդհատվել է Հայաստանում բազմաթիվ ներքին խնդիրների պատճառով, սակայն որևէ հիմք չկա ենթադրելու, թե ԼՂ խնդրի կարգավորման գործընթացը դադարել է»,- նշել է նա:

ԱՄՆ նախագահի ազգային անվտանգության հարցերով խորհրդական Ջոն Բոլթոնի այցը ռուս քաղաքագետը հոռետեսորեն է ընդունում:

«ԱՄՆ-ը բացարձակապես հետաքրքրված չէ ԼՂ խնդրի կարգավորմամբ, հակառակը, լարվածության աճը նրանց ձեռնտու է հակաիրանական քաղաքականության համատեքստում: ԼՂ խնդրի կարգավորման հարցով կառուցողական երկխոսության վերականգնման համար կարևոր է այն երկրների մասնակցությունը, որոնց այս հակամարտությունն անմիջականորեն առնչվում է: Այդ երկրներն են Ռուսաստանը, Թուրքիան ու Իրանը»,- ասել է նա:

Այսուհանդերձ, քաղաքագետը նշում է, որ Հայաստանն այժմ խիստ անկայուն քաղաքական վիճակում է, և եթե չլիներ իշխանափոխությունը, շատ կարևոր արդյունքներ կգրանցվեին ԼՂ խնդրի կարգավորման գործընթացում: Նրա խոսքով` փաստացի, նախորդ փուլում համաձայնեցրել էին այս հակամարտության խաղաղ կարգավորման ճանապարհային քարտեզը:

«Այո՛, Հայաստանը մնում է Ռուսաստանի ռազմավարական դաշնակիցը, սակայն դա չի նշանակում, որ Երևանը կարող է փորձեր ձեռնարկել` Մոսկվային մանիպուլացնելու: Չի կարելի Ռուսաստանի հետ գործընկերությունն օգտագործել Ադրբեջանի դեմ: Ռուսաստանը Հայաստանի ձեռքում խաղալիք չի դառնա Բաքվի հետ հակամարտության հարցում: Այժմ Ռուսաստանի Դաշնությունը Ադրբեջանի հետ ռազմավարական գործընկերությունն է զարգացնում: Հայ-ռուսական հարաբերությունները երբեք չեն եղել հակաադրբեջանական: Մոսկվան միշտ ճանաչել է Լեռնային Ղարաբաղի` Ադրբեջանին պատկանելը: Մենք Հայաստանի հետ դաշնակից ենք, սակայն այդ դաշինքն ուղղված չէ Ադրբեջանի դեմ, իսկ Ադրբեջանի հետ Ռուսաստանի հարաբերությունների սերտացումը ոչ մի կերպ կախված չէ Հայաստանի հետ հարաբերություններից»,- ասել է Դուգինը:

Ռուս քաղաքագետը նաև նշել է, որ չի կարելի հայ-ռուսական և ռուս-ադրբեջանական հարաբերությունները դիտարկել ԼՂ հակամարտության համատեքստում: