Քաղաքացուն հետաքրքրում է իր բարեկեցիկ կյանքը. Վահագն Խաչատրյան

Տնտեսագետ Վահագն Խաչատրյանը համոզված է` այսօր շատ կարևոր է իմանալ, թե ինչ տնտեսություն ունենք, քանի որ մինչ օրս թվանկարչությամբ տնտեսության իրական պատկերը խեղաթյուրվել է:

«Առանց իրական պատկերի հնարավոր չէ տնտեսությունը բուժել, հակառակ դեպքում թվերի հետ վիճաբանությունը էական չէ, բոլորս մի խնդիր ունենք, ուզում ենք ապրել բարեկեցիկ կյանքով: Որևէ քաղաքացու, երբ հարցնեք` լա՞վ է ապրում, չի ասելու` «ՀՆԱ-ն աճել է 5 տոկոսով», պիտի ասի` «աշխատավարձս բարձրացել է», «հեռուստացույց եմ գնել, մեքենա», քաղաքացուն հետաքրքրում է իր բարեկեցիկ կյանքը, Կառավարության համար սա պետք է լինի խնդիր»,- Երևանում տնտեսության զարգացմանը նվիրված գիտաժողովի ժամանակ նշեց Խաչատրյանը:

Տնտեսագետը հիշեցրեց` Ապրիլյան պատերազմի ժամանակ պարզվեց, որ մենք պարզապես մերկ ենք, քաղաքացիների տված ու նրանցից գրպանված գումարները նպատակին չեն ծառայել ու հենց այդտեղ էր, որ ժողովուրդն ընդվզեց: Նա չբացառեց, որ Ադրբեջանն էլ էր այդ հանգամանքը հաշվի առել, բայց սխալվեց. ՀՀ արժանապատիվ քաղաքացին իր արժանապատվությունը գնահատեց ու հաղթեց:

«Այն, ինչ տեղի ունեցավ այս ապրիլին, ես գնահատում եմ, որ տեղի է ունեցել հեղափոխություն, որը դեռ շարունակվում է: Այն հեղափոխությունը, որի արդյունքում տեղի է ունեցել իշխանափոխություն, մեր մտքերում, մոտեցումներում դեռ տեղի չի ունեցել: Մենք 2013-ին լռելյայն համակերպվել էինք, որ հերթական անգամ, մեզ արժանապատվությունից զրկելով, իշխանության են եկել, բայց 2018-ին գնալու են: Խոստացան, բայց չգնացին, ես ուրախ եմ, որ այդ ազատությունը վերադարձվեց մեզ, վստահ եմ, որ դուք` գործարարներդ, այդ ազատությունը պետք է զգաք»,- ասաց նա:

Գործարարներին մտահոգող «ի՞նչ անել» հարցի պատասխանը գտնելու համար, ըստ տնտեսագետի, պետք է հնարավորություն տալ, այդ հնարավորությունը տալիս է իշխանությունը կամ քաղաքական այն ուժը, որն իշխանության է եկել: Խաչատրյանի խոսքերով` 20 տարի այդ հնարավորությունից զրկել են, ու թեպետ եղել են հասարակական-քաղաքական խմբեր, որոնք պայքարել են, բայց մինչև ապրիլը հաջողության չեն հասել: Այժմ, ըստ Խաչատրյանի, մի իրավիճակ է, երբ բոլորն ազատություն են ստացել, և պետք է իրենց հարց տան` արդյո՞ք պատրաստ են այն գնահատել և այդ պայմաններում գործել:

Խաչատրյանն ընդգծեց, որ ցանկացած երկխոսության մեջ կա երկու կողմ, պատասխանատվությունը երկու կողմն է կրում, եթե կա իշխանություն, կա նաև ժողովուրդ, որին հնարավորություն են տվել ընտրել իշխանություն:

«Մենք երջանիկ ենք, որ հնարավորություն ստացանք ազատ ընտրելու, ոչ թե կաշառքի և այլնի միջոցով: Այսօր հիմնական խնդիրը փիլիսոփայական առումով բոլորիս համար այդ պատասխանատվության հանգամանքն ամրապնդելն է»,- ասաց տնտեսագետը: