Դատապարտյալների խնդիրների 50 տոկոսից ավելին առնչվում են բուժսպասարկմանը

ՔԿՀ-ում գտնվող անձանց համար բուժսպասարկման ոլորտը շարունակում է խնդիր մնալ: ՀՀ ԱՆ ՔԿՀ-ներում հասարակական վերահսկողություն իրականացնող հասարակական դիտորդների խմբի նախագահ Հասմիկ Հարությունյանն ասել է, որ նաև վիճակագրությունն է խոսում այն մասին, որ բուժսպասարկումը ՔԿՀ-ներում խնդրահարույց հարցերից է։

«Եթե 2017 թվականին խումբն ունեցել է շուրջ 80 այցելություն, որոնց հետ կապված տարբեր հարցեր են քննարկվել, բարձրաձայնվել, բուժսպասարկման հետ կապված Արդարադատության նախարարությանը ներկայացվել է 23 գրություն: 2018 թվականին՝ մինչև նոյեմբեր ամիսը, մենք ունեցել են շուրջ 70 այցելություն՝ տարբեր հարցերի կապակցությամբ: Այս պահին ես կարող եմ արձանագրել, որ մինչև դեկտեմբեր ամիսը խմբի կողմից բուժսպասարկման հարցերով ներկայացվել է շուրջ 41 գրություն: Որոշ հարցեր լուծվել են, որոշ հարցեր մնացել են ինչ-ինչ պատճառներով անլուծելի»,- ասել է Հարությունյանը:

Ըստ Հարությունյանի՝ խնդիրներից յուրաքանչյուր երկրորդն առնչվում է բուժսպասարկմանը: Շարունակում է  ոչ լիարժեք գործել ծանր հիվանդության հիմքով ազատ արձակելու ինստիտուտը: Բողոքների մի զգալի մասն առնչություն ունի սիրտ-անոթային համակարգի հիվանդությունների հետ: Բայց լուծումներ հիմնականում չեն տրվում, քանի որ բժշկական միջոցների բացակայություն է նկատվում կամ խնդիրներին ժամանակին չեն արձագանքում:

«Խնդիրների մասին հիմնականում ահազանգում են «Նուբարաշեն» և «Արմավիր» ՔԿՀ-ներից: 10-ական գրություն է համապատասխանաբար ներկայացվել արդարադատության նախարարություն: Սրանց հաջորդում է «Դատապարտյալների հիվանդանոց» ՔԿՀ-ը:  Ե՛վ 2017, և՛ 2018 թվականներին առաջին տեղ է զբաղեցնում ծանր հիվանդության հիմքով պատժից ազատման հարցը, շատ հաճախ այն հարցերը, որոնք բարձրաձայնվում են, տեղ չեն գնում կառավարության կողմից նախատեսված հիվանդությունների ցանկում»,- հավելել է դիտորդների խմբի նախագահը:

Հարությունյանը հավելել է, որ իրենք նաև գրություններում են նշել, որ եթե անձը բավարար բուժօգնություն ստանալու հնարավորություն չունի, ապա պետք է ազատ արձակվի: Խմբի ներկայացուցիչները հիշեցրել են, որ միջազգային ստանդարտներն են ասում այն մասին, որ ժամանակին բուժօգնություն չստանալը հավասարազոր է անմարդկային վերաբերմունքի:

Չլուծված էական խնդիր է շարունակում մնալ նաև բուժսպասարկման ոլորտի կադրային հագեցվածության հարցը: ՔԿՀ-ներում հաճախ են պատահում այնպիսի իրավիճակներ, երբ հաստիքները բավարար համալրվածություն չունեն, ինչը պայմանավորված է բավարար սոցիալական երաշխիքների բացակայությամբ, այն ծանր աշխատանքով, որն իրականացվում է ՔԿՀ-ներում՝ երբեմն նույնիսկ չկարգավորված գրաֆիկով:

Բարձրացված խնդիրներին պատասխանել է  ՀՀ արդարադատության նախարարի պաշտոնակատարի տեղակալ Սուրեն Քրմոյանը, որը մասնակցել է քննարկմանը: Ըստ Քրմոյանի՝ նաև 2016 թվականի զեկույցում է ասվել, որ դիտորդների կողմից արձանագրված խնդիրների 50 տոկոսից ավելին վերաբերել են բուժսպասարկմանը, ուստի՝ կառավարությունը ուշադրություն է դարձրել խնդրին դեռ 2016 թվականին.

«Չխոսվեց դեղորայքային ապահովումից, իսկ դժգոհությունների մեծ մասը դրան էր առնչում: Բյուջետային հատկացում է  կատարել կառավարությունը, և նախկին 43 մլն դրամի փոխարեն՝ 2018 թվականին ՔԿՀ-ին հատկացվել է 150 մլն դրամ՝ դեղորայքի ձեռք բերման համար: Այսինքն՝ շուրջ 3.5 անգամ ավելացրել է պետական ֆինանսավորումը, որն աննախադեպ է: Դեղորայքի հետ կապված բողոքներ ՔԿՀ-ներում գրեթե չունեն: Ինչ վերաբերում է հագեցվածությանը, ապա ՔԿՀ-ներում պոլիկլինիկական հատվածն ամբողջությամբ հագեցված է քաղաքացիական բուժհիմնարկների պահանջներին համապատասխան»,- ասել է Քրմոյանը՝ հավելելով, որ  բոլոր սարքավորումները փոխված են, բժշկական կահույքն է անգամ նորը տեղադրվել:

Ըստ ՀՀ արդարադատության նախարարի պաշտոնակատարի տեղակալի՝ հիմա բանակցություններ են տարվում նոր լրացուցիչ ֆինանսական միջոցներ ունենալու համար, 2019 թվականի հունվարի 15-ից նոր կենտրոն է գործելու:

Մանրամասները՝ տեսանյութում։