Շիրակի մարզի Բասեն գյուղում բիովառելիքի արտադրությունը վերականգնվել է

Ախուրյան խոշորացված համայնքի Բասեն գյուղում վերականգնվել է բիովառելիքի արտադրությունը: Հիշեցնենք՝ այս գյուղում ծղոտից վառելիք ստանալու տեխնոլոգիան ներդրվել է 2016-ին: Սա հանրապետությունում այլընտրանքային վառելիքի ստացման առաջին փորձն էր: Փայտին ոչնչով չզիջող ջերմատվությամբ բիովառելիք խոտից ու ծղոտից.  2 տարի առաջ այն այլընտրանքային վառելիքի ստացման իսկական հեղափոխություն էր Հայաստանի հյուսիսի համար:

Բասենի նախկին գյուղապետ Համլետ Պետրոսյանն էր նախաձեռնողը. «Բասենի զարգացման հիմնադրամ» էր ստեղծել: Գլոբալ էկոլոգիական հիմնադրամի ֆինանսավորմամբ սարքեր էին ձեռք բերել, արտադրություն սկսել: Պելետի արտադրամասը փորձացուցադրական էր: Փորձարկեցին,  ցուցադրեցին, բազմաթիվ սպառողներ նաև ձեռք բերեցին մինչև 2017-ը, երբ քամին վնասեց արտադրամասի տանիքը: Նման վիճակում տեսնելով արտադրամասը՝ դոնոր կազմակերպությունը  որոշում էր կայացրել սարքերը  Ախուրյան տեղափոխելու մասին, այնինչ շենքի տանիք կառուցելու համար ընդամենը 400 հազար դրամ էր անհրաժեշտ: Այդ գումարը առանց դոնորի «Բասենի զարգացման հիմնադրամը» գտել է ու սարքերն ու արտադրությունը գյուղում են պահել:

«Մեր համայնքից տարածվեց ոլորտի զարգացումը: Մեզ անհանգստացնում էր այն, որ ամբողջ աշխատանքը պետք է տեղափոխվեր մեկ այլ վայր՝ Ախուրյան, ու պատճառը ֆինանսական խնդիրն էր: Իրոք, մենք չունեինք ֆինանսներ տանիքը վերանորոգելու համար: Օգնեց մեր համագյուղացիներից մեկը՝ վարկային միջոցներ հայթայթեց, արդյունքում կարողացանք նոր տանիք կառուցել»,- SHANTNEWS.am-ի hետ զրույցում ասել է Բասենի նախկին գյուղապետ Համլետ Պետրոսյանը:

Վերականգնումից հետո հզորություններն ավելացնելու մասին են մտածում: Էկոլոգիապես մաքուր ցանկացած հումքից կարող են բիովառելիք ստանալ: Այս տարի խոտը շատ էր՝ պելետները ծղոտի փոխարեն խոտից են ստանում:

Հիմնադրամն ի սկզբանե ստեղծվել էր այն նպատակով, որ իր գործունեությունից ստացված հասույթը օգտագործեր գյուղում համաֆինանսավորում պահանջող ծրագրեր իրականացնելու համար: Հիմա հիմնադրամը գումար չունի: Արտադրությունն ընդլայնելու համար ներդրումներ են անհրաժեշտ: Նույն դոնոր կազմակերպությունը դարձյալ բիովառելիքի՝ բրիկետների արտադրություն սկսելու ծրագրեր ունի, բայց արդեն Ախուրյանում, իսկ Բասենի նույն այդ արտադրամասում նաև համակցված կերեր են նախատեսում արտադրել:

«Հիմքը դրել ենք, ստարտը կա արդեն: Ավելի մեծ հզորության սարքավորումներ է հարկավոր ձեռք բերել: Ինչ-որ բանով կառավարությունը մեզ, եթե աջակցի, օրինակ՝ անտոկոս վարկ տրամադրի հիմնադրամին, կկարողանանք ժամում 500կգ արտադրողականության հոսքագիծ ձեռք բերել»,- SHANTNEWS.am-ի հետ զրույցում ասել է «Բասենի զարգացման հիմնադրամի» նախագահ Գուրգեն Պետրոսյանը:

Բասենը նաև Շիրակի մարզում առաջին գյուղն էր, որտեղ արևային էներգակայաններ են տեղադրվել ու դրանցով ջեռուցվող ջերմոցներ հիմնել: Այս ծրագիրը նույնպես շարունակական է, այժմ Պետրոսյան եղբայրներն իրենց ունեցած 3 կիլովատտ արևային կայանի հզորությունը մինչև 10 կիլովատտի հասցնելու ծրագրեր ունեն: