«Սպասուհու պատմությունները»` «Էմմի» մրցանակաբաշխության մրցանակակիր

Գիշերը Լոս Անջելոսում տեղի է ունեցել «Էմմի» մրցանակաբաշխությունը, որի ընթացքում շնորհում են հեռուստատեսային բնագավառում ձեռքբերումների համար: Մրցանակը կարող են ստանալ փրայմ թայմում եթեր գնացած շոուները, հեռուստասերիալները, մինի սերիալները, վավերագրական հաղորդաշարերը և այլն: Եթե անցած տարի «Էմմիի» բոլոր անվանակարգերում հաղթել էր հայտնի «Գահերի խաղը»,  ապա այս տարի էստաֆետը փոխանցել է «Սպասուհու պատմությունները» դրամատիկ հեռուստասերիալին: Սերիալը հաղթել է մրցանակաբաշխության գլխավոր անվանակարգերում ՝ «Լավագույն դրամատիկ սերիալ»,  «Դրամատիկ սերիալի լավագույն դերասանուհի»՝ Էլիզաբեթ Մոսս և «Երկրորդ պլանի լավագույն դերասանուհի»՝ էնն Դաուդ:

Էլիզաբեթ Մոսսը «Սպասուհու պատմությունները» հեռուստասերիալում

Էնն Դաուդը «Սպասուհու պատմությունները» հեռուստասերիալում

«Սպասուհու պատմությունները» կանադացի գրող Մարգարեթ Էթվուդի համանուն հակաուտոպիստական վեպի էկրանավորումն է: Սերիալում ներկայացվում է տոտալիտար հասարակության ապագան, որտեղ մարդկանց գլխավոր խնդիրը  չբերությունն է: Փոխնակ մայրերը դառնում են հարուստ ընտանիքների սեփականությունը և նրանց գլխավոր խնդիրն է այդ ընտանքին զավակներ պարգևելը: Այս հեռուստասերիալը միանգամից մեծ աղմուկ բարձրացրեց և հասարակական քննարկման թեմա դարձավ: Իր վարկանիշով գերազանցեց այնպիսի հայտնի սերիալների, ինչպիսիք են «Վայրի արևմուտքի աշխարհը», «Խաղաքարտերի տնակը», «Տարօրինակ դեպքեր» հեռուստասերիալններն են:  Իրավիճակն այլ է կատակերգություն ժանրում: Երրորդ տարին անընդմեջ լավագույն կատակերգական սերիալ անվանակարգում հաղթում է «Փոխնախագահ» հեռուստասերիալը, որը քաղաքական երգիծանքի ժանրում է և պատմում է ԱՄՆ փոխնախագահի «լուրջ» գործերի մասին:

«Փոխնախագահ» հեռուստասերիալի պոստերը

«Լավագույն մինի սերիալ» անվանակարգում հաղթող է ճանաչվել «Մեծ փոքր սուտը», որտեղ գլխավոր դերերը մարմնավորում են Նիկոլ Քիդմանը, Ռիզ Ուիթերսփունը և Շեյլին Վուդլին: Նիկոլ Քիդմանը, որը ժամանակին այս դերի համար հրաժարվել էր ֆիլմային  լուրջ առաջարկներից, հաղթել է «Մինի սերիալի լավագույն դերասանուհի» անվանակարգում:

Նիկոլ Քիդման

«Մեծ փոքր սուտ» մինի սերիալի դերասանական կազմը:

Քաղաքականությունը, մասնավորապես Դոնալդ Թրամփն ամենուր է: Ալեք Բոլդուինը «Էմմի» է ստացել «Շաբաթ երեկոն ուղիղ եթերում» հեռուստաշոուում ԱՄՆ նախագահի ծաղրանմանության համար.

«Հավանաբար ես պետք ասեմ, որ այս էմմին ձերն է պարոն նախագահ»,-  մրցանակը ստանալիս կատակել է Բոլդուինը:

Նույն շոուում Հիլարի Քլինթոնի պարոդիայի համար մրցանակ է ստացել Քեյթ Մաքինոնը: 

Քեյթ Մաքինոնը և Ալեք Բոլդուինը «Շաբաթ երեկոն ուղիղ եթերում» (Saturday night live)  հեռուստաշոուում