Քննարկում չի եղել Գևորգ Կոստանյանին պաշտոն տալու կամ որևէ տեղ նշանակելու մասին. Ալեն Սիմոնյանը պարզաբանում է

Քիչ առաջ ԱԺ փոխնախագահ Ալեն Սիմոնյանը ֆեյսբուքյան ուղիղ եթեր է ունեցել, որի ընթացքում անդրադարձել է վերջերս քննարկվող երկու կարևոր հարցի՝ ՀՀ օրհներգի փոփոխության ու Գևորգ Կոստանյանի մասին իր հնչեցրած կարծիքներին:

Նշենք, որ այսօր էր Սիմոնյանն ասել, որ Գևորգ Կոստանյանն ամենաարհեստավարժ իրավաբաններից է, դեռ կարող է ծառայել Հայաստանին: Կարճ ժամանակում քննարկումների տեղիք տված այս հայտարարությունն ուղիղ եթերի ժամանակ այսպես մեկնաբանեց Սիմոնյանը.

«Գևորգ Կոստանյանը լավ իրավաբան է, քաղաքական առումով ներկայացրել է այլ թիմ ու պաշտպանել Նիկոլ Փաշինյանին՝ որպես ժողովրդի կողմից ներկայացված թեկնածու, բարձր եմ գնահատում, չեմ ուզում խոսել պարոն Կոստանյանի արժանիքների կամ հակառակը` բացասական կողմերի մասին, ասել ու ասում եմ. եթե ՀՀ-ի դեմ մի որևէ հարձակում է կազմակերպվում, և եթե Կոստանյան Գևորգը կարող է օգուտ տալ միջազգային հարթակներում, Արցախին պաշտպանելու հարցում, ես դեմ չեմ, որ այդ օգուտը տրվի: Սա է իմ դիրքորոշումը»,- ասաց Սիմոնյանը:

ԱԺ փոխնախագահը նշեց, որ դա իր կարծիքն է և գուցե քննարկումների ընթացքում պարզվի, որ սխալ է: Բայց մի հարցում վստահ է, որ պետք է իրենց քայլերն ուղղված լինեն երկրի շահերի պաշտպանմանը:

«Քննարկում չի եղել պաշտոն տալու կամ որևէ տեղ նշանակելու մասին: Ես պնդել եմ, որ Գևորգ Կոստանյանը լավ իրավաբան է, և եթե կարող է պաշտպանել Ադրբեջանի կողմից Արցախի դեմ ներկայացված հայցը, ես պատրաստ եմ իր օգնությանը դիմել, յուրաքանչյուրի օգնությանը դիմել պաշտպանելու համար իմ Արցախը, իմ երկիրը, իմ ժողովրդին, իմ յուրաքանչյուր զինվորի կյանքը, եթե դա մեկ կյանք կփրկի, պատրաստ եմ դա անել: Ես կարծում եմ` դուք նույնպես պատրաստ եք, մեր համար կարևորը մեր երկիրն է, մեր երկրի անվտանգությունը, մեր երիտասարդ տղաների կյանքն ու անվտանգությունը: Խնդրում եմ հասկանալով մոտենալ և հիշել, որ պատրաստ եմ յուրաքանչյուր քննարկման ու քննադատության»,- ասաց ԱԺ փոխնախագահը:

Անդրադառնալով օրհներգի փոփոխության շուրջ բարձրացած աղմուկին՝ ասաց.

«Օրհներգի հետ կապված` ուզում եմ ասել, որ միջանկյալ լուծում եմ գտել, հաշվի եմ առնում բոլորի կարծիք, ի սկզբանե ասել եմ, որ որոշողը ՀՀ ժողովուրդը, հայ մարդն է լինելու, քննարկում եմ առաջարկելու և կարծում եմ` քննարկումը ստացվեց: Միջանկյալ լուծման հետ կապված` տեղյակ կպահեմ, պատրաստման փուլում է»: