Մեր հիմնական ուղերձը ՀՀ քաղաքացիներին հետևյալն է՝ «Դուք ուժեղ եք և դուք կարող եք». Նիկոլ Փաշինյան

«Այսօր մեր հիմնական խնդիրն այն է, որ նախկինից եկած շատ իներցիոն գործընթացներ մեզ խանգարում են: Մարդիկ երբեմն չեն ուզում հավատալ իրենց տեսածին, երբեմն չեն ուզում հավատալ իրենց լսածին, շարունակում են երբեմն ունենալ համաձայնությունների, դաբրոների կարիք, և տնտեսական որևէ ներդրման ցանկություն ունեցող մարդկանց 90 և ավելի տոկոսը ուզում է անձամբ հանդիպել և համաձայնեցնել իր գործողությունները երկրի ղեկավարի կամ ղեկավարության հետ»,- «Իմ քայլը հանուն Արարատի մարզի» ներդրումային բիզնես-ծրագրերի համաժողովի ժամանակ այս մասին հայտարարեց ՀՀ վարչապետ Նիկոլ Փաշինյանը:

Նա նշեց՝ կառավարության աշխատանքն  է բոլոր մարդկանց քաջալերելը, լսելը: Կատակով հավելեց՝ պետք է նաև հասկանալ, որ օրն ունի 24 ժամ, շաբաթը` 7 օր, ամիսը՝ երբեմն 27-28, բայց առավելագույնը` 31 օր: Վարչապետի գնահատմամբ՝ սա է այն իներցիան, որ խանգարում է:

«Այն, ինչ դուք տեսնում և լսում եք Հայաստանի Հանրապետությունում, հարգելի՛ գործարարներ, իրականություն է: Կառավարության խնդիրն է այնպես անել, որ որևէ մեկը որևէ տնտեսական գործունեության դիմելու համար չունենա կառավարության կարիքը: Կառավարության մեծագույն առաքելությունն է, որ մարդիկ իրենց առօրյա կյանքում հնարավորինս ավելի ու ավելի քիչ ունենան կառավարության, պետական մարմինների հետ շփվելու, նրանցից բան հարցնելու, նրանցից թույլտվություն ստանալու կարիքը»,- ասաց նա:

Փաշինյանն ասաց՝ կառավարության հիմնական խնդիրը ոչ թե մարդկանց ղեկավարելն է, այլ նրանց չխանգարելը, ոչ թե մարդկանց կամքը ձևավորելն է, այլ քաջալերելը, նրանց ստեղծարար ունակություններն ու հմտությունները զարգացնելը: Նա նշեց՝ ասվածը Հայաստանում տասնյակ օրինակներ ունի:

«Երեկ, օրինակ, բոլորս մասնակցում էինք Երևանի գինու փառատոնին: Այն երեք տարում կրկնապատկվել, եռապատկվել է իր մասշտաբներով: Կառավարությունն այստեղ ունեցել է սիմվոլիկ դերակատարում. ընդամենը հնարավորություն է տվել, որ մարդիկ կարողանան իրենց ստեղծարար ընդունակություններն իրականացնել: Տեսնում ենք երևույթ, որն իսկապես հեղափոխական նշանակություն ունի, որը փոխում է ոչ միայն մարդկանց տնտեսական հարաբերությունները, ոչ միայն տրամադրությունը, այլև երկրի տրամադրությունը, իմիջը»,- ասաց վարչապետը:

Կառավարության ղեկավարն ասաց՝ իրենց հիմնական ուղերձը ՀՀ քաղաքացիներին հետևյալն է՝ «Դուք ուժեղ եք և դուք կարող եք: Կարող եք զարգացնել և իրացնել ձեր ստեղծարար տաղանդը, ընդունակությունները»: Նա կրկին հիշեցրեց՝  կառավարության հիմնական խնդիրը չխոչընդոտելն է, բոլոր նախաձեռնությունները քաջալերելը, նշեց, որ այսօր հենց այս քաղաքական ուղեգիծն են իրականացնում, այս խնդիրն են լուծում ամենօրյա ռեժիմով: