Ի՞նչ փոփոխություններ են նախատեսվում գույքի կադաստրային գների հարցում. Սարհատ Պետրոսյանի պարզաբանումը

Այսօր կառավարության նիստից հետո Կադաստրի կոմիտեի նախագահ Սարհատ Պետրոսյանը պատասխանել է նաև լրագրողների այն հարցերին, որոնք վերաբերել են կադաստրային արժեքին ու սպասվող փոփոխություններին.

«Մենք ունենք անշարժ գույքին վերաբերող կադաստրային գներ, որոնք հնացած են: Վերջին շտկումները կատարվել են 2002 թվականին: Մենք ուսումնասիրել ենք շուկան, ուսումնասիրությունների հիման վրա կադաստրային արժեք հասկացությունը, որն էականորեն զիջում էր շուկայում եղած թվերին, մոտեցրել ենք շուկային: Դրա կիրառման տեղերից և ձևերից մեկն անշարժ գույքի հարկումն է: Դա դեռևս չի քննարկվում»,- ասել է Պետրոսյանը:

Լրագրողները հետաքրքրվել են, թե ինչպես է գնահատվելու շուկայական արժեքը:

«Շուկայական արժեքն անկախ գնահատողներ կան, որոնք իրականացնում են գնահատումները: Նրանք մեզ մոտ որակավորում են անցնում և գնահատում են: Եթե դուք բանկից վարկ եք վերցնում կամ գրավադրում եք ձեր վարկը, տեղի է ունենում շուկայական գնահատում: Հիմա մենք ողջ հանրապետության տարածքում իրականացրել ենք բազմաթիվ գնահատումներ, դրա հիման վրա ողջ ինֆորմացիան վերլուծվել է տարածության մեջ, նոր տվյալներ են ավելացվել և մենք ստացել ենք գնահատման, այսպես ասած, նոր տրամաբանություն»,- նշել է Կադաստրի կոմիտեի նախագահը:

Ինչ վերաբերում է այն հանգամանքին, թե որ ժամանակաշրջանում են ուսումնասիրությունները կատարվել: Պետրոսյանը հարցին այսպիսի պատասխան է տվել.

«2018 թվականին Հայաստանի ողջ տարածքում գնահատվել է 51 հազար գույք: Դրան ավելացվել են նաև Կադաստրի կոմիտեում եղած գույքերի վաճառքների մասով էն տվյալները, որոնք հավաստի են, և հիմնականում այս երկու տվյալների վերլուծության արդյունքում, մենք ստացել ենք մեկ այլ պատկեր»:

Լրագրողների այն դիտարկմանը, թե ստացվում է՝ հիմք է ընդունվել այն շրջանը, երբ հեղափոխություն էր, կար ոգևորություն, հայրենադարձության մեծ ցանկություն: Այսինքն՝ այն շրջանը, որը բերել է գույքի գների աճի: Անշարժ գույքի գործակալները պնդում են, որ բնակարանների գները հիմա արհեստականորեն բարձրացված են:

«Գնահատումը սկսվել է հեղափոխությունից մի քիչ առաջ: Այո, ավարտվել են հոկտեմբեր ամսին, բայց մենք ինքներս մեզ ստուգել ենք: Երևանի կենտրոնում շուկայական արժեքը 5000 դրամով ավելի է, քան այն արժեքը, որը ֆիքսել ենք հիմա, որը սկսելու է գործել մեկուկես տարի հետո: Այդ գները կառավարության որոշմամբ դեռևս պետք է հաստատվեն: Նախագիծն է դրված շրջանառության մեջ: Եթե մենք տեսնենք, որ շուկայում գներն ընկան 25 տոկոսով, ապա կիջեցնենք 25 տոկոսով: Շփոթն էստեղ հենց դրանում է կայանում, որ մարդիկ մտածում են, որ մենք սա արել ենք, որպեսզի գույքահարկ գանձենք: Պետությունը և դուք բոլորդ պետք է ունենաք մեկ տվյալ, որը ճշգրիտ է և հանրապետության էսինչ հատվածում, էս, էս պարամետրերով գույքի արժեքը սա է: Մենք բերում ենք մի ընդհանրական գին ենք ֆիքսում, որպեսզի անընդհատ չգնանք, գնահատողին չբերենք ասի, թե ինչ արժե: Իմանանք, որ էս հատվածում, էս պարամետրերով գույքն արժե էսքան»,- ասել է Կադաստրի կոմիտեի նախագահը՝ կրկին վստահեցնելով, որ եթե շուկայում մեծ տատանումներ լինեն, իրենք վերանայումներ կանեն: Փոփոխությունը կիրառության մեջ է մտնելու 2012 թվականի հունվարի 1-ից:

Ինչ վերաբերում է այն հանգամանքին, որ մոտ 240 մլն դրամ է հատկացվել գնահատման աշխատանքների համար: Եթե որոշեք, որ սխալ եք, նորից միջոցներ են տրամադրվելու ու կրկնակի աշխատանք պետք է արվի. նկատել են լրագրողները:

«Շատ քիչ գործարքներ կան, որ հիմա մենք կարող ենք համարել հավաստի: Դրանք հիմնականում նրանք են, որոնք լինում են հիպոթեքի շուկայի կոնտեքստում: Գիտենք, որ առուվաճառքի ժամանակ չի նշվում այն գինը, որը պետք է, որովհետև եկամտային հարկի խնդիր կա և այլն: Էն տվյալները, որոնք մենք ի վերուստ ունենք մեր բազայում, դրանց շատ փոքր տոկոսն է հավաստի և չենք կարող տարածել ողջ հանրապետության վրա: Դրա համար մենք էդ գործի մի մասը պատվիրակել ենք շուկայական գնահատողներին, որպեսզի ունենանք ամբողջական պատկեր՝ ողջ հանրապետության տարածքում, որպեսզի կարողանանք օբյեկտիվորեն, ճիշտ անել: Էդ 240 մլն կառավարության որոշմամբ կարգավորվող շրջանակների համար է ծախսվել: Սա երկար պրոցես է, որի առաջին քայլը կատարել ենք այսօր: Մենք ասում ենք, որ անշարժ գույքի գնահատման միասնական տրամաբանությունը սա է: Եթե ԱԺ-ն վավերացրեց, մենք կվերադառնանք և կմշակենք արդեն դրույքաչափը, գոտիներ: Ուզում եմ ֆիքսել, որ սա դեռևս անշարժ գույքի հարկը չէ: Այս օրենքը ենթադրում է, որ գույքահարկ չպետք է լինի, լինելու է անշարժ գույքի միասնական հարկ»,- հավելել է Սարհատ Պետրոսյանը՝ նաև նշելով, որ իր կարծիքով՝ կառավարությունը կանի այնպես, որ այդ հարկը ռիսկային չդառնա: Հիմնական թիրախը կլինի թանկարժեք գույքը: