Էլցանցի հետ պայմանագիր չկնքած բաժանորդները կհոսանքազրկվեն

ՀԷՑ-ում բաժանորդների հետ պայմանագրերի կնքման վերջնաժամկետը հուլիսի 1-ին էր, բայց Շիրակի մարզում գործընթացը սահմանված ժամկետում լիարժեք ավարտված չէ: Խանգարում են հիմնականում բնակիչ-բաժանորդների փաստաթղթային անհամապատասխանություններն ու դրանք ներկայացնելու ուշացումները:Մարզում մոտ 30 հազար բաժանորդ ընկերության հետ պայմանագիր չի կնքել, ստիպված գնացել են պայմանագրերի կնքման ժամկետների երկարաձգման, որի ավարտը օգոստոսի 12-ն է: Այս ժամկետում էլ փաստաթղթերը  չներկայացնելու դեպքում էլցանցը կսկսի տվյալ բաժանորդներին հոսանքազրկել։«Հայաստանի էլեկտրական ցանցեր ընկերությունը» բաժանորդների հետ նոր պայմանագրերի կնքումը սկսել էր երկու տարի առաջ: Այն իրավական փաստաթուղթն է, որով կարգավորվում են բաժանորդ-մատակարար հարաբերություններն ու պարտականությունները: Պայմանագրեր մարզի 30 հազար բաժանորդներ երկու տարի անց դեռ չեն կնքել: Հիմնական պատճառը, որ բերում են բնակիչները՝ փաստաթղթերի ձեռքբերման դժվարություններն են:«Ավտոտնակների, շինությունների վրա կառուցված ինչ-որ կացարաններ են, որոնք չունեն հաշվառում, տնակներ կան, որոնք հաշվառում ունեն, բայց ուրիշ մարդիկ են բնակվում և իրենց անունով տեղեկանքներ չեն կարող ներկայացնել»,- պարզաբանել է «Հայաստանի էլեկտրական ցանցեր» ՓԲԸ «Ղարս» մասնաճյուղի իրացման գծով փոխտնօրեն Սեյրան Յայլոյանը։Դարձյալ խնդրահարույցը տնակային թաղամասերն են: Դրանցում ապրողների, ինչպես նաև բնակեցված տնակների թվի մասին քաղաքապետարանի և էլցանցի տվյալները չեն համապատասխանում: Էլցանցի բազայում է 3700 տնակային հասցե: Շատ ընտանիքների բնակության վայրի ու գրանցման մասին տեղեկանքներ չեն տրվում։«Մենք այսօր ունենք քաղաքում 3700-ի կարգի տնակային սպառողներ, որոնք հոսանք են էս պահին օգտագործում, իսկ քաղաքապետարանով էդ թիվը մոտ 2800-2850 է, այսինքն՝ կան մեծ թվով մարդիկ, որոնք տեղեկանք են ներկայացրել քաղաքապետարան, որ իրենց տնակները բնակարան ստանալուց հետո քանդված են, բայց իրականում այդ տնակները գոյություն ունեն և մեր մոտ էդ մարդիկ սպառողներ են»,- տվյալների անհամապատասխանության մասին է բարձրաձայնում Սեյրան Յայլոյանը։Բնակարանի, աղբի և կոմունալ այլ ծառայությունների դիմաց քաղաքացիների կուտակած պարտքերը ևս պատճառ են տեղեկանքներ տրամադրելը մերժելու համար: Քաղաքապետարանում պահանջում են ամբողջությամբ վճարել ունեցած պարտքերը:«Քանի որ տեղեկանքները ժամանակավոր են տրվում, մենք պայմանագրերը կնքում ենք մեկ տարի ժամկետով, դրա համար էլ խուսափում են, թե ամեն տարի հո մենք չենք գնալու տեղեկանք վերցնենք, դա էլ է իրենց համար հանդիսանում դժվարություն»,- ասել է «Հայաստանի էլեկտրական ցանցեր» ՓԲԸ «Ղարս» մասնաճյուղի իրացման  բաժնի ճարտարագետ Սիրանույշ Սամվելյանը։Կանաչ գոտիներում առանց թույլտվության կառուցված տներն ու տեղադրված տնակները, ինչպես նաև կրպակների ու առևտրի տաղավարների, այսպես ասած, հանրային բաժանորդների խնդիրներն էլ այլ բնույթի են: Կանաչ գոտիներում ապրողներն առանց սեփականության վկայականի են, իսկ սպասարկման օբյեկտները՝ առանց վարձակալության պայմանագրերի: Նման դեպքերում էլցանցը նրանց հետ պայմանագիր կնքելու իրավունք չունի: Երկու տարվա մեջ ընկերությունը բոլոր բաժանորդներին փաստաթղթերը կարգավորելու հնարավորություն տվել էր, մի քանի անգամ երկարաձգել ժամկետները: Էլցանցը ևս մեկ հնարավորություն է տալիս՝ նշելով, որ  այս անգամ վերջին երկարաձգումն է լինելու : «Բոլոր այն սպառողները, որոնք մինչև օգոստոսի 10-12-ը պայմանագրեր չեն ունենա, մենք բոլորին անխտիր հոսանքազրկելու ենք, այսինքն՝ առանց պայմանագրի մենք իրավունք չունենք որևէ մեկին հոսանք մատակարարելու»,- նախազգուշացնում է «Հայաստանի էլեկտրական ցանցեր» ՓԲԸ «Ղարս» մասնաճյուղի իրացման գծով փոխտնօրենը։Մինչև օգոստոսի 12-ը պայմանագրերի կնքման աշխատանքները հասցնելու համար մատակարարն ինքն է արդեն հարմարվում բաժանորդներին: Նրանք կարող են փաստաթղթերով գնալ թաղամասային սպասարկող տեղամաս:

Մյուս տարբերակն էլ կա՝ էլցանցի աշխատողները կարող են այցելել բնակարաններ ու տեղում կնքել պայմանագրեր: Վերջնաժամկետից հետո մատակարարը նշում է՝ զիջումներ չեն լինելու, խիստ մոտեցումը բոլոր անպարտաճանաչ բաժանորդների հանդեպ կլինի։