Ղազանչի գյուղի բնակիչների մոտ խմելու ջրից թունավորումներ են արձանագրվել

Շիրակի մարզի Ղազանչի գյուղի վարչական ղեկավար Լուսինե Սիմավոնյանը համացանցով հայտարարություն էր տարածել այն մասին, որ գյուղում խմելու ջրից թունավորման դեպքեր են գրանցվել, կան հիվանդանոցներ դիմած անձինք, որոնք մեղադրում են «Վեոլիա ջուր» ընկերությանը, որը անփութություն ու անտարբերություն է ցուցաբերում, չի վերացնում ջրագծերի վթարները:

Մարզի 80 տոկոս բնակավայրերին ջուր մատակարարող Ղազանչիում ջրագծերի ներքին ցանցի քայքայման պատճառով հաճախակի վթարներ են:

Տիկին Գոհարը խոսում է երկու ամսական իր երեխայի մասին: Երեք օր է, որ դուրս են գրվել հիվանդանոցից։ Երեխային բարձր ջերմությամբ տեղափոխել էին Գյումրի: Գյումրու «Մոր և մանկան ավստրիական հիվանդանոցում» ախտորոշել էին, որ փորացավն ու բարձր ջերմությունը խմելու ջրից է:

«Ես երեխային ջուր խմեցրեցի, աղիքներում շանջու սկսվեց, լուծ, տարել եմ Գյումրու «Մոր և մանկան ավստրիական հիվանդանոց», ասացին, որ երեխան հենց ջրից աղիքային սեպսիս է ընկել: Հիմա երեխայիս սովորական մեր ջուրը չեմ խմցնե, խանութից առած ջուր կուդանք»,- ասում է փոքրիկի մայրիկը:

Երեխայից բացի, տան մյուս անդամների մոտ ևս նույն գանգատներն են եղել, բայց մեծահասակները հիվանդանոց չեն դիմել, ինքնաբուժությամբ են զբաղվել: Բայց շարունակում են նույն ջուրն օգտագործել: Ասում են՝ ծորակներից ամեն առավոտ անհայտ բաղադրության ու գույնի ջուր է գալիս:

«Գուգա դեմ կառնի կեղտը ծորակի դեմը, կհանենք, կմաքրենք, կդնենք տեղը: Հետո էլ վրեն շոր կկախենք, շորի մեջը գուգա կեղտը կհավաքվի, ոնց որ չամուռ էղնի»,- նկարագրում է Ղազանչիի բնակչուհիներից մեկը:

«Մամուռի նման կարմիր լորձ էդպես գուգա, հետո կմաքրվի»,- ասում է ղազանչեցի տանտիրուհիներից մյուսը:

Մի տնով չէ, որ կասկած ունենային, որ խնդիրը միայն իրենց ջրագծից է: Նույն վիճակն է նաև հարևան տներում։ 7 տարեկան Մանուշակին այսօր դպրոց չեն ուղարկել:

 Մեկ շաբաթ է, որ Ղազանչիում դժգոհում են ջրից: Երբ հաճախակի են դարձել առողջական գանգատները, գյուղի վարչական ղեկավարն ահազանգել է «Վեոլիա ջուր» ընկերությանն ու մարզի համաճարակաբաններին: Երկու կառույցներից էլ եկել են գյուղ: Տների հոսող ջրից ու դիտահորերից նմուշառումներ են կատարել: Դրանից անցել է երեք օր, ուսումնասիրություններից դեռ պատասխան չկա:

«Մեր պրոբլեմն արդեն երկար տարիների պատմություն ունի: Ամբողջ տարին նորմալ ջրամատակարարում չունենք, քանի որ մեր գյուղի ներքին ցանցը շատ վատ վիճակում է, անընդհատ վթարներ են լինում, ահազանգում ենք, գալիս են փայտասեպեր խփում, գնում են, քանի որ կողքի մասն էլ վթարված է, մյուս տեղից է ջուրը դուրս տալիս»,- գյուղի ջրամատակարարման խնդիրները ներկայացնում է Ղազանչիի վարչական ղեկավար Լուսինե Սիմավոնյանը:

«Խնդիրը եղել է 5-6 ընտանիքի հետ, երևի մի երկու ընտանիք էլ ավելի՝ մոտ 30-35 հոգի»,- բնակիչների առողջական վիճակի մասին մանրամասներ է հաղորդել գյուղի բուժքույր Նինա Պողոսյանը։

1961 թվականին կառուցված ջրամատակարարման ներքին ցանցը երբևէ չի նորացվել: Շարքից դուրս եկած, փտած խողովակներում էլ վթարներն են հաճախակի դարձել: «Վեոլիա ջուր» ընկերության բրիգադներն էլ, գյուղացիների պատմելով, վթարը վերացնելու փոխարեն, խողովակներին փայտե սեպեր են խփում ու հեռանում:

Շիրակի մարզի բնակավայրերի 80 տոկոսը սնուցվում է Ղազանչիի ջրով, բայց սառնորակ բնական աղբյուրներով հայտնի Ղազանչի գյուղում շուրջօրյա ջրամատակարարում չկա։ Ջրհավաք ջրամբար չունեն, իսկ եղած ջուրն էլ բնակիչներին է հասնում օրվա մեջ մի քանի ժամ։

Մի քանի դիտահորեր գտնվում են գյուղի տարբեր հատվածներում, որոնք մաշված խողովակների պատճառով ջրով են լցված, ինչ էլ նեխում է ու խողովակների վնասված հատվածներից անցնում է ջրագիծ: «Վեոլիա ջուր» ընկերության բրիգադը հերթական վթարի վերացման համար նորից գյուղ էր եկել: Երկու օր առաջ ջրից վերցրած նմուշների հետազոտման պատասխանն էլ հետներն էին բերել, ըստ որի՝  Ղազանչիի ջուրը վտանգավոր չէ:

«Ընձի կթվա սխալ ինֆորմացիա է բոլորը: Ահազանգը ստացել ենք, Համաճարակաբանության և հիգիենայի կենտրոնի աշխատակիցների հետ երկու օր համատեղ ջրի նմուշի անալիզներ ենք վերցրել, քլորի և բակ անալիզի, շեղումներ չկան»,- պարզաբանել է «Վեոլիա ջուր» ընկերության Արևմուտք ՏՏ-ի համակարգող ինժեներ Սարիբեկ Պեպանյանը։ Հետո պատասխանատուն ավելացնում է՝ բոլորը երևի մրգից կամ սննդից են թունավորվել: Ստացվում է, որ համագյուղացիները նույն միրգն ու սնունդ են օգտագործել։ Բայց նորից պատրաստվում էին նմուշառում կատարել, իսկ ներքին ցանցի վերանորոգումներ ջրմուղը գյուղին չի խոստանում: