Հերոս Տիգրան Մանսուրյանը և նրա հերոսը

«Մեր ժամանակի հերոսը» կոչմանն արժանացած Ռուբեն Գևորգյանին մրցանակը հանձնեց մաեստրո Տիգրան Մանսուրյանը: SHANTNEWS.am-ը զրուցել է երկու հերոսների հետ, որոնցից յուրաքանչյուրը պնդում է, որ հերոսը դիմացինն է:

«Իմ հերոսը պարոն Մանսուրյանն է, ես իրեն էլ ասացի, որ ես իր ստեղծագործությունների տակ եմ մեծացել, այն երաժշտության, որի մեջ կա շատ սեր, շատ միտք, շատ մեծ իմաստ»,- ասում է Ռուբեն Գևորգյանը և պատմում այսօր տեղի ունեցած անակնկալի մասին, երբ հենց մեծանուն կոմպոզիտորն իրեն հանձնեց մրցանակը:

«Իմ համար դրանից ավելի բան չէր կարող լինել, բայց որ պարոն Մանսուրյանը ինձ փոխանցեց, քիչ առաջ ընկերջոս հետ մտածում էինք՝ ոնց մոտենամ, խոսեմ, բայց ահա քեզ մոտենալ»,- ասում է նա:

«Մեր ժամանակի հերոսի» մասին խոսեց նաև Տիգրան Մանսուրյանը, ասաց.

«Մենք այսօր ունենք իրականությունից ծնված հերոսներ, բանն այն է, որ այսօր հիմք դրվեց այս արարողությանը՝ իրականությունից առանձնացնել մի խումբ մարդկանց, որոնք իրենց գործի լավագույն դրսևորողներն են, և եղավ ահավասիկ Ռուբեն Գևորգյանը ինձ բաժին հասավ, իմ երաժշտությունը իրեն ծանոթ է եղել, ես այսուհետ իր աշխատանքներին պիտի հետևեմ, որ գանք հավասարակշռության: Իր անուշ ժպիտը, կենսախինդ ժպիտը, արտիստիզմն այն է, որ ինչ էլ ձեռքը վերցնի՝ կավ և այլն, պիտի շունչ տա, դա իր էությունից, մենք այս առիթը պիտի օգտագործենք»:

Մաեստրոն անդրադարձավ նաև անկախության խորհրդին:

«Մանավանդ արևմտահայերի համար սա մեծագույն նվաճում է, մենք հողի վրա ենք, նրանք՝ ոչ: Ես մաղթում եմ բոլորիդ լավագույնը»,- կարծում է Տիգրան Մանսուրյանը:

Իսկ երիտասարդ հերոսի համար անկախության այս օրն ավելի է արժևորվելու:

«Երևի պատասխանատվությունն ավելանալու է, ոգևորիչ է ու պատասխանատու, որ դու քո փոքրիկ արվեստանոցում ես գործ անելու, դրա մասին գիտես դու, քո ընկերները, հիմա շատ երիտասարդներ են նայելու, կտեսնեն, ինձ համար կարևոր կլինի, որ շատերը որոշում կայացնեն զբաղվել արհեստներով: Ես փոքր եմ եղել, երբ անկախությունը հռչակվել է, 10-11 տարեկան էի, առանց անկախության քո ազգությունը չես կարող պահես, տեսել ենք Խորհրդային Միություն, որ քայքայվել է, անկախությունը թույլ է տալիս, որ մշակույթը զարգացնես ու աշխարհին ցույց տաս, կեղծավոր հպարտությունները մի կողմ դնես, թե հայ ես, իրապես գործով ցույց տաս»,- կարծում է Ռուբեն Գևորգյանը: