ՄԻԵԴ-ը պատրաստում է Ադրբեջանում գերեվարված Կարեն Ղազարյանի գործով կոմունիկացիան. փաստաբան

«Եթե Բաքուն վկայակոչում է հումանիտար իրավունքը, ապա այն Կարեն Ղազարյանի վրա չի տարածվում, Բաքուն պետք է անվերապահորեն, միակողմանիորեն նրան ազատ արձակի, որովհետև նա անօրինական է գտնվում այնտեղ», – «Փաստինֆո»-ի հետ զրույցում նման կարծիք է հայտնել միջազգային իրավունքի մասնագետ, փաստաբան Արա Ղազարյանը։

Նա նշել է՝ պետական մարմինները, որոնք կոչված են ապահովելու ՄԻ եվրոպական կոնվենցիայով նախատեսված իրավունքներն իրենց տարածքում, պետք է ապահովեն Կարենի ազատությունը։ Նրա վրա տարածել հումանիտար իրավունքի դրույթները և ասել, որ մենք կատարում ենք գերիների փոխանակում, ոչ միայն անհիմն է ,այլև՝ անհեթեթ:

Փաստաբանի խոսքով՝ Կարեն Ղազարյանը զինվորական չէ, նա քաղաքացիական անձ է և որևէ կապ չունի զինված բախումների ու հակամարտության հետ, հետևաբար, անթույլատրելի է նրա նկատմամբ կիրառել «գերի» բառը։

Ադրբեջանի ռազմագերիների, պատանդների և անհայտ կորածների հարցերով պետական հանձնաժողովի հայտարարել է, թե Բաքուն պատրաստ է Ադրբեջանում գտնվող ՀՀ քաղաքացիներ Կարեն Ղազարյանին և Արայիկ Ղազարյանին փոխանակել ԼՂՀ-ում դատապարտված ադրբեջանցի դիվերսանտներ Դիլհամ Ասկերովի և Շահբազ Գուլիևի հետ։

Անդրադառնալով այս հայտարարությանը, փաստաբանը շեշտել է, որ դա ոչ թե իրավական, այլ ՝ քաղաքական գործընթաց է, որի հիմքում, սակայն, պետք է դրված լինի ոչ թե քաղաքական հաշվարկը, այլ՝ մարդասիրությունը։

«Բոլորս հասկանում ենք, որ հիմա քաղաքական հաշվարկներ են արվում, ուստի դրա վերաբերյալ չեմ ուզում կարծիք հայտնել, բայց ինձ հետաքրքրում է մարդասիրական իրավունքի ազդեցությունը։ Սխալ է, երբ Կարենին ներկայացնում են որպես գերի կամ նրա վրա տարածում են մարդասիրական իրավունքի նորմերը։ Նրա վրա տարածվում ՄԻ եվրոպական կոնվենցիան։ Նա անօրինական կալանավորված անձ է, նա զինծառայող չէր, նա մարտական դիրքերում չի գտնվել, նա գտնվել է իր տանը։ Այս դեպքի համար, երբ ես խոսում եմ մարդասիրության մասին, նկատի չունեմ պատերազմի օրենքը։ Ինչ վերաբերում է Արայիկ Ղազարյանին, նրա վերաբերյալ այնքան քիչ տեղեկություններ կան, որ դժվարանում եմ որևէ կարծիք հայտնել։ Պարզ չէ, թե նա ինչպես է հայտնվել այնտեղ, պարզ չէ, թե նա ցանկանո՞ւմ է վերադառնալ, թե՞ ոչ»,- ասել է Արա Ղազարյանը:

Փաստաբանը տեղեկացրեց, որ ՄԻԵԴ-ը պատրաստում է Ադրբեջանում գերեվարված Կարեն Ղազարյանի գործով կոմունիկացիան. այս գործով վերջին շրջանի զարգացումների մասին մեծ փաթեթ է ներկայացվել ՄԻԵԴ։

Զրույցն ամբողջությամբ՝ սկզբնաղբյուր կայքում: