Շիրակի մարզում այս տարի հիմնանորոգվել կամ մասնակի նորոգվել են 10 դպրոցներ, հաջորդ տարի երեք գյուղերում կկառուցվեն նոր դպրոցներ

Շիրակի մարզի 164 դպրոցներից այս տարվա շինարարական ծրագրերում էին 10-ը: Գյուղական ու քաղաքային բնակավայրերի դպրոցներից մի մասում կապիտալ նորոգումներ էին, մի քանիսում՝ մասնակի շինաշխատանքներ: Մինչև տարեվերջ 10-ը դպրոցում էլ նորոգումները կավարտվեն։Արթիկի տարածաշրջանի Տուֆաշեն գյուղի միջնակարգ դպրոցի հիմնանորոգումը ընդգրկված էր 2018 թվականի հրատապ խնդիրների լուծման ծրագրում, բայց այն մեկնարկեց մեկ տարի ուշացումով՝ արդեն Տարածքային զարգացման հիմնադրամի պատվերով:Տուֆաշենի դպրոցի շենքը 1965 թվականի կառույց է: Միջնակարգ դպրոցի շենքը, ինչպես որ հանձնել են 60-ականներին, այդպես էլ մնում էր ՝ նույն դուռ-պատուհաններով, տանիքով ու փայտե հատակով: Որպես գյուղական դպրոց՝ իր տարածքով աշակերտության թվին համապատասխան է, բայց պայմաններով ՝ ոչ : Քայքայված հատակն ու պատերը հիմա արդեն չկան: Շինարարը դրանք հիմնովին նորոգել է ամռանը, երբ աշակերտներն արձակուրդում էին: Աշխատանքները դեռ շարունակվում են: Դպրոցը բաժանված էր հին ու նոր մասնաշենքերի, հիմա երկուսը միացրել են: Ամենադժվար ու մեծ ծավալի աշխատանքներն ավարտված են: Հիմքն ու պատերն են ամրացրել, տանիք են կառուցել, փայտե հատակն են փոխել: Ներքին հարդարումը դասասենյակներում վերջացրել են: Միակ հատվածը, որտեղ դեռ շինարարություն է ընթանում՝ սանհանգույցն է: Դպրոցը սանհանգույց չի էլ ունեցել, օգտվել են մոտ 100 մետր հեռու գտնվող դրսի զուգարանից:Գյուղում չկա կոյուղատար ցանց, միայն դպրոցի համար կոյուղագիծ են անցկացրել, որն էլ միանում է ընդամենը 50 մետր հեռավորության սեպտիկ հորին: Սանհանգույց աշխատեցնելու այլ տարբերակ չի եղել:

Սանիտարական պայմանները պահպանելն արդեն դպրոցից է կախված, կարևորը սանհանգույցը շենքի ներսում է ու մշտական ջրով: Կապիտալ նորոգումներից հետո միակ մեծ խնդիրը, որ դարձյալ չի լուծվի, կենտրոնացված ջեռուցումն է: «Վեց կոմպլեկտ դասարանում ջեռուցում  ենք դիզվառելիքով, հինգ կոմպլեկտ դասարանները և ուսուցչանոցը ջեռուցում ենք հոսանքով»,- ասում է Տուֆաշենի միջնակարգ դպրոցի տնօրեն Ժան Ոսկանյանը։Գյուղը գազաֆիկացված է, իսկ դպրոցը բնական գազ չի ստանում, ավելին՝ գազատար խողովակներն անցնում են անմիջապես դպրոցի  կողքով: Նախկին ու ներկա տնօրենները շատ են դիմել դպրոցը գազաֆիկացնելու խնդրով, բայց ծրագրեր այդ ուղղությամբ չեն եղել: Ստիպված են  նորոգված դասասենյակներում նորից վառարաններ դնել: «Ջերմային ռեժիմը կարողանում ենք ապահովել, միայն ջեռուցում ենք դասասենյակները, բայց սա իր մեջ վտանգ է պարունակում»,- նշել է դպրոցի տնօրենը։

Տուֆաշենի դպրոց են գալիս նաև հարևան Հայկասարի  դպրոցականները: Աշակերտների թիվն էլ այս տարի ավելացել է երեքով, ընտանիքներ են գյուղ վերադարձել Ռուսաստանից: Դպրոցաշինական ծրագրերը մարզի գյուղական համայնքների համար շարունակելի կլինեն նաև 2020 թվականին: Առայժմ հայտնի է, որ հաջորդ տարի մարզի երեք գյուղական համայնքներում կկառուցվեն նոր դպրոցներ:«Նոր կառուցվող մոդուլային դպրոցներ են, ՀՀ-ում նմանատիպ դպրոցներ հաջորդ տարվա համար նախատեսված է կառուցել 21 հատ, որից երեքը մեր մարզում ՝ Կապսում, Արեգնադեմում և Բերդաշենում»,- հաջորդ տարվա դպրոցաշինական ծրագրերի մասին է խոսել Շիրակի մարզպետարանի ճարտարապետաշինական բաժնի գլխավոր մասնագետ Մկրտիչ Ասատրյանը։Կապսի, Արեգնադեմի և Բերդաշենի դպրոցների նախագծային աշխատանքներն են տարվում: 2020 թվականի ծրագրում է նաև Գյումրու թիվ 1 ավագ դպրոցը, այստեղ նորոգվելու է դպրոցի պատշգամբը: «Տնտեսական զարգացման հիմնադրամի միջոցներով մենք ներկայացրինք թիվ 1 ավագ դպրոցը,այնտեղ հարկավոր է իրականացնել պատշգամբի վերանորոգման աշխատանքներ։ Այն հուշարձան կառույց է, պատշգամբը վատ վիճակում է, ընդգրկվել է ծրագիր»,- նշել է Մկրտիչ Ասատրյանը։Հովունի և Գեղանիստ գյուղերի վթարային դպրոցները, որոնք մինչ այս կապիտալ նորոգումների տարբեր ծրագրերից դուրս են մնացել  աշակերտների քիչ թվաքանակ ունենալու պատճառաբանությամբ, մարզպետարանի քաղաքաշինության վարչությունը նախատեսում  է ներկայացնել հաջորդ տարվա հրատապ ծրագրում: