Legatum վերլուծական ինստիտուտի զեկույցում ո՞ր երկրներն են հատուկ առանձնացվել

Արդեն հայտնի է՝ բրիտանական Legatum վերլուծական ինստիտուտի 2019 թվականի Բարգավաճման ինդեքս վարկանիշում (The Legatum Prosperity Index) Հայաստանն առաջ է անցել հետխորհրդային տարածքի բոլոր պետություններից՝ բացառությամբ Բալթյան պետությունների և Վրաստանի: Իսկ որո՞նք են լավ ու վատ իմաստով  հատուկ առանձնացված երկրները զեկույցում.

Ըստ զեկույցի՝ Արևելյան Եվրոպայում Վրաստանն իր դիրքերն առավել բարելավված երկիրն է: 2009 թվականից ի վեր այդ երկիրն իր դիրքերը բարելավել է 11 աստիճանով: Դա հիմնականում  տնտեսության ամրապնդման, ահաբեկչական և բռնության հետևանքով հանցագործությունների կրճատման արդյունք է:

80-րդ տեղը զբաղեցրած Էկվադորի բարգավաճման ինդեքսը ամենամեծն է Լատինական Ամերիկայի կամ Կարիբյան որևէ այլ երկրի համեմատությամբ: Բարգավաճման հիմքում ապահովության և անվտանգության մակարդակի բարձրացումն է վերջին 10 տարվա ընթացքում՝ 40 աստիճանով: Նպաստող հանգամանք է եղել նաև այն իրողությունը, որ սպանությունների ցուցանիշը կրճատվել է երկու երրորդով:

Տոգոն երկրորդն է աշխարհի՝ զարգացում ապրած երկրների շարքում: Այդ երկրում վերջին տասնամյակում զգալիորեն բարելավվել են կենսապայմանները: Խոսքը 17 աստիճանով բարելավման մասին է: Հիմքում սննդամթերքի պակաս ունեցող մարդկանց թվի կրճատումն է:

Բարգավաճման ինդեքս վարկանիշում 157-րդ տեղը զբաղեցրած Սիրիան 2009 թվականից գրանցել է ամենամեծ անկումը՝ բոլոր երկրների մակարդակում: Դա հիմնականում պայմանավորված է անվտանգության և սոցիալական կապիտալի ապահովության պայմանների վատթարացմամբ: Այն զբաղեցնում է 4-րդ հորիզոնականը, ամենաթույլը՝ թույլերի մեջ:

Հարավային Սուդանը 2019 թվականին բարգավաճման ինդեքսի ամենացածր ցուցանիշն ունեցողն է: Բարգավաճումը ցածր է թե՛ ապահովության ու անվտանգության, թե՛ առողջապահության ու կրթության ոլորտներում:

Բարգավաճման ինդեքսում 71-րդ հորիզոնականը զբաղեցրած Սաուդյան Արաբիան ունեցել է ամենաբարձր աճը Արաբական պետությունների լիգայում՝ տասը տարվա ընթացքում բարձրանալով 14 աստիճանով: Նկատվել է ներգաղթյալների և էթնիկ փոքրամասնությունների նկատմամբ ավելի մեծ հանդուրժողականություն: Չնայած այս բարելավմանը՝ անհատական ազատության հարցում Սաուդյան Արաբիան դեռ 10-րդ հորիզոնականում է:

Բարգավաճման վարկանիշում 124-րդ տեղը զբաղեցրած Մյանման ունեցել է ամենամեծ աճը նախորդող տասը տարվա ընթացքում: Դա պայմանավորված է տնտեսության հզորացմամբ ու անձնական ազատությունների բարելավմամբ: Ամեն դեպքում, ռազմական որոշակի խմբերի դեմ գործողությունները զանգվածային միգրացիայի են հանգեցնում:

Բարգավաճման ինդեքսը գլխավորող երկրների ցանկը 2019 թվականին գլխավորում է Դանիան: Վերջին 10 տարվա ընթացքում այն լավագույն պայմաններն է ունեցել բոլոր չափանիշներով: Դանիան լավագույնն է նաև կենսապայմանների առումով: