Շիրակի մարզում սպանդանոց չկա, բայց մսավաճառներին պարտադրում են վաճառել միայն սպանդանոցային մորթի ենթարկված միս

Հունվարի 15-ին շուկայում և հասարակական սննդի օբյեկտներում թույլատրելի է միայն սպանդանոցային ծագման մսի վաճառքը և այսուհետ պարտադիր է դառնում հինգերորդ ձևի տեղականքի առկայությունը, որը տրամադրելու են սպանդանոցները: Նման պահանջներով աշխատել Շիրակի մարզում առայժմ անհնար է, գործող սպանդանոցներ չկան: Իսկ որպես ժամանակավոր այլընտրանք՝ տեղի մսավաճառներին առաջարկել են սպանդանոցային միս ձեռք բերել այլ մարզերից, որից էլ ծախսատարության պատճառով շուկայի մսավաճառները հրաժարվում են:

2018 թվականի մարտից սպանդանոցային միսը պարտադիր դարձավ պետական գնումներով ձեռք բերած հաստատությունների համար, իսկ 2020 թվականի հունվարի 15-ը նոր վերջնաժամկետն է, որը վերաբերում է արդեն  բոլոր տնտեսվարողներին, շուկաներում ու վաճառակետերում վաճառվող մսին ու մսեղիքին: Գյումրիի շուկայի Լաչինի միջանցքում են կենտրոնացած մսի վաճառակետերը, որոնք Ամանորից հետո գնորդներ գրեթե չունեն: Մինչև առևտուրն աշխուժանա, մսավաճառաների ներկայացված պահանջները ավելի կխստանան: Թեև հունվարի 15-ից է գործում արգելքը, սակայն տաղավարներում եղածը սպանդանոցից բերված չէ:

«Մեզի ասել են, որ առանց էդ հինգերորդ ձևի միս չբերեք, բայց հինգերորդ ձև մենք ոչ կրնանք ճարենք, ոչ էլ կհասկնանք՝ ըդիգ ինչ է»,-նշում էր մսավաճառներից մյուսը:

Հիգերորդ ձևի տեղեկանքն ապացույց է լինելու, որ միսը ձեռք է բերվել սպանդանոցից: Մարզում գործող գոնե մեկ սպանդանոց չկա, իսկ մսավաճառից հինգերորդ ձև պահանջելն առայժմ անիմաստ է: Միսը վաճառողները գնում են գյուղացուց ավելի էժան, երբեմն ապառիկ տարբերակով: Մսավաճառներին ձեռնտու չէ նաև առայժմ  առաջարկվող տարբերակը, որ թույլատրելի է հարևան մարզերում գործող սպանդանոցներից միս գնել: Ոչ միայն ծախսատար է, մի մասը նաև չի վստահում սպանդանոցում մորթված մսի որակին:

«Էս անասունը ես երեք անգամ կերթամ, կտեսնիմ, դուրս կուգա, կմորթեմ, չի գա, ուրիշ տեղ կերթամ: Հմի էրթամ, ըսեն՝ մորթել եմ, ըսիգ է, բդի տանիս, կամ ես ինչով բեռնամ, ինչխ տանիմ իմ անասունս հասցնեմ սպանդանոց»,-իրեն անհայտ մնացած հարցերի պատասխաններն էր բարձրացնում 20 տարի մսավաճառությամբ զբաղվող գյումրեցի տղամարդը:

Դժգոհող մսավաճառների հետ  հանդիպման եկած Սննդի անվտանգության տեսչական մարմնի մարզային ծառայության աշխատակիցները մորթ կազմակերպելու համար մսավաճառներին ուղղորդեցին Ամասիայի տարածաշրջանի Բանդիվան գյուղ, որտեղ եղած սպանդանոցն էլ միայն կաթ մթերող ընկերությանն է պատկանում:

Հետո որպես այլընտրանք առաջարկեցին մինչև հունվարի վերջ օգտվել Լոռու մարզի սպանդանոցներից, մինչև մարզում խնդիրը կկարգավորվի: Փորձագետները վստահեցրին, որ մինչև այս ամսվա վերջ գոնե երկու սպանդանոց կհասցնեն գործարկել:

«Արդեն կա 22 սպանդանոց, որից 20-ը պատրաստ կեղնի, աշխատանքները սաղ կերթա, արդեն կառուցման փուլում է, 2 հատը պատրաստ է»,-դժգոհող մսավաճառների հետ հանդիպմանը փոխանցեց ՍԱՏՄ Շիրակի մարզային ծառայության փորձագետ Արտուշ Հովհաննիսյանը:

Մսավաճառներին մինչև հունվարի վերջ ժամանակ տրվեց` նախապես ձեռք բերած մսի քանակությունը սպառելու համար, որից հետո տեսչական մարմինը կանցնի տուգանքների ու  կասեցումների կիրառմանը: