«Շիրակի ձմեռ» մարզամշակութային միջոցառումը կանցկացվի Աշոցքում

Ձմռան օրացուցային վերջին օրը՝ փետրվարի 29-ին, Աշոցքում կանցկացվի «Շիրակի ձմեռ» մարզամշակութային միջոցառումը։ Վերջին տարիներին մարզի տարածաշրջաններն իրենց բնակավայրերում առանձին էին կազմակերպում այդ միջոցառումը։ Այս տարի որոշվել է վերականգնել հին ավանդույթները և ընդհանուր անցկացնել՝ նաև հաշվի առնելով սակավաձյուն ձմեռը։ Թե ինչ միջոցառումներ են նախատեսված անցկացնել այդ օրը, ներկայացրել են կազմակերպիչները՝ Շիրակի մարզպետարանի և տուրիզմի զարգացման կենտրոնի պատասխանատուները։

Չորս տարին մեկ անգամ փետրվարը երկարում է մեկ օրով։ Այդ մեկ օրն էլ այս տարի ընտրել են «Շիրակի ձմեռ» միջոցառման օր։ Օրացուցային ձմեռն են փակում, թե գարունը դիմավորում, երկու դեպքում էլ գոնե մինչև մայիսի սկիզբ Աշոցքին չի վերաբերում։

Հայաստանի հյուսիսի ցրտաշունչ տարածքում՝ Աշոցքում, դեռ ամիսներն առջևում են՝ զգալու ձմռան շունչն ու վայելելու բարձր լեռնային բնակավայրի գեղեցկությունը։

Շիրակի ձմեռը կանցկացվի Աշոցքի դահուկային կենտրոնի հարակից տարածքում: Ըստ կազմակերպիչների՝ նախատեսված են մարզական  տարբեր միջոցառումներ։ Տեղի կունենան դահուկավազքի երկու մրցումներ, առաջինը՝ պրոֆեսիոնալ, երկրորդը՝ սիրողական։

Ավանդական ձմեռային սպորտաձևերից բացի, էքստրիմի սիրահարները լավագույն ժամանց կանցկացնեն։ Նոր ու ժամանակակից   տեխնիկական միջոցները թույլ կտան սահել Աշոցքի ձյունապատ ամենաբարձր գագաթներից ու նաև օդ բարձրանալ։

Միջոցառման տարածքը բաժանված կլինի հանգստյան հինգ գոտիների, որտեղ կլինեն մշտական վառվող խարույկներ ու վառարաններ, կգործեն նաև սննդի հանրային կետեր ու տաղավարներ։ Մարզամշակութային միջոցառմանը կմասնակցեն նաև Գյումրիի հայտնի մարզիկներն ու չեմպիոնները։

Կազմակերպիչները հոգացել են նաև գյումրեցիների և բոլոր ցանկացողների տեղափոխության հարցը։ Փետրվարի 29-ին Գյումրիից դեպի Աշոցք կլինեն ուղևորատար փոխադրամիջոցներ, որոնց ժամերը հարմարեցված են նաև երկաթուղու գրաֆիկի հետ։

«Ուղևորափոխադրում է տեղի ունենալու Գյումրիից Աշոցք: Երեք հատվածներից՝ քաղաքի Երկաթգծի կայարանից, Ավտոկայանից ու կենտրոնական հրապարակից լինելու են միկրոավտոբուսներ, որոնք տեղափոխելու են սիմվոլիկ գումարով`300 դրամով»,- ասաց Շիրակի տուրիզմի զարգացման կենտրոնի համակարգող Նաիրա Գրիգորյանը:

Շիրակի ձմեռ մարզամշակութային միջոցառմանն արդեն մասնակցության հայտ են ներկայացրել զբոսաշրջային 4 կազմակերպություններ, օտարերկրացի զբոսաշրջիկներ, որոնք ցանկություն են հայտնել իրենց հանգիստն անցկացնել Աշոցքում։