Ո՞ր ապրանքների արտահանումն է արգելվում, և ո՞ր ապրանքները կներմուծվեն զրոյական մաքսատուրքով. էկոնոմիկայի փոխնախարար

ԵԱՏՄ կոլեգիայի կողմից ընդունված որոշման համաձայն՝ արգելվում է առաջին անհրաժեշտության ապրանքների արտահանումը ԵԱՏՄ տարածքից: Սահմանափակումը գործում է երեք ամիս ժամկետով, փոխարենը ընդլայնվում է զրոյական մաքսատուրքով ներմուծվող ապրանքների շրջանակը: Եթե նախկինում միայն բժշկական սարքավորումներն էին ԵԱՏՄ տարածքից ներմուծվում Հայաստան առանց մաքսատուրքի, ապա այժմ նաև դեղորայքի արտադրությունում գործող նյութերը: Այս փոփոխություններն ու պարետի որոշումներն այսօր պարետատանը հրավիրված ասուլիսի ժամանակ ներկայացրել է էկոնոմիկայի փոխնախարար Վարոս Սիմոնյանը:

«Մարտի 16-ին ԵԱՏՄ հանձնաժողովի կողմից որոշում է կայացվել, որ բժշկական նշանակության ապրանքների վերաբերյալ ներմուծման մաքսատուրքերը զրոյացվել են: Ապրիլի 3-ին նույնպես որոշման մեջ փոփոխություն կատարվեց, ցանկը ընդլայնվեց, այն վերաբերում է բժշկական նշանակության ապրանքների ու դեղորայքի մեջ կիրառվող նյութերին»,- ասել է Սիմոնյանը:

Նա նշել է, որ ներմուծման ժամանակ այդ ապրանքների հետ կապված տնտեսվարողը դիմում հայտ է ներկայացնում ՀՀ առողջապահության նախարարություն, դրական եզրակացություն ստանալուց հետո այդ ապրանքները ներմուծվում են:

«Ցանկում առկա են գրեթե բոլոր այն բժշկական սարքավորումներն ու հումատեսակները այս շրջանակում կարող են ներմուծվել ՀՀ տարածք զրոյական մաքսատուրքով: Ժամկետը գործում է մինչև սեպտեմբերի 30-ը, 6 ամսով և տարածվում է մարտի 16-ից ծագած իրավահարաբերությունների վրա: Կարող են տնտեսավարողները դիմել առողջապահության նախարարություն, և համապատասխան մեխանիզմների միջոցով ունենալ զրոյական մաքսատուրք»,- ասել է նա:

Մյուսը ԵԱՏՄ կոլեգիայի կողմից ընդունված որոշումն է, որով արգելվում էր ապրանքատեսակների արտահանումը ԵԱՏՄ-ից, առաջին անհրաժեշտության պարենային ապրանքատեսակների մասին է խոսքը:

«Այս սահմանափակումը 3 ամիս ժամանակով է, գործում է ԵԱՏՄ տարածքից դուրս, ԵԱՏՄ-ի տարածքում արգելքը չի տարածվում։ Մյուսը հումանիտար նշանակության բեռների փոխադրման մասին է: Հումանիտար ձևով կարող ենք արտահանել երրորդ երկիր և օգնել գործընկերներին: Երրորդ որոշումը ապրիլի 3-ին ԵԱՏՄ խորհրդի կողմից ընդունված որոշումն է, այն զգայուն ապրանքների վերաբերյալ է, որոնց ներմուծման մաքսատուրքերը կզրոյացվեն, որոշումը դեռ չի հրապարակվել, ուժի մեջ է մտնում ապրիլի 1-ից հունիսի 30-ը, խոսքը կարտոֆիլ, սոխ, սխտոր, գազար և այլ մի շարք ապրանքատեսակների մասով, որոնց ներմուծումը ԵԱՏՄ տարածք կիրականացվի զրոյական մաքսատուրքով»,- ասել է էկոնոմիկայի փոխնախարարը:

3 միջոցառումներից բացի, նա պարետի որոշումն է ներկայացրել:

«Դուք գիտեք, որ կա համար 6 որոշում, որով բժշկական նշանակության սարքավորումները և դեղամիջոցների արտահանումը սահմանափակված էր, ԱՆ գրավոր համաձայնությամբ էր արտահանվում, և գործում էր մեկ այլ որոշում, համաձայն որի՝ Իրանից ապրանքների փոխադրումն իրականացվում էր համաձայն գործող ցանկի, այս պահին գործում է միայն ապրանքների սահմանափակում բժշկական սարքավորումների և դեղամիջոցների, մոտ 64 տող ունի ցանկը»,- ասել է բանախոսը: