Անթույլատրելի է ապրանքների շրջանառության արգելքը անգամ պանդեմիայի պայմաններում. Փաշինյան

Վարչապետ Նիկոլ Փաշինյանը իր ֆեյսբուքյան էջում հրապարակել է իր ելույթը Եվրասիական միջկառավարական խորհրդի տեսակոնֆերանսին: Իր խոսքում Նիկոլ Փաշինյանը ներկայացրել է Հայաստանում տիրող իրավիճակը պանդեմիայի շրջանակներում և վերջում պատրաստակամություն հայտնել այս աշնանը Հայաստանում ընդունել միջկառավարական խորհրդի հերթական նիստը՝ հույս հայտնելով, որ մինչ այդ պանդեմիան հաղթահարված կլինի:

«Մենք ապրում ենք դժվար ժամանակներ, և պետք է անել հնարավոր ամեն բան, որ մեր կազմակերպությունը ոչ մի վայրկյան չխաթարի իր բնականոն աշխատանքի ռիթմը: Մենք ողջունում ենք նման կերպով հանդիպման անցկացումը բոլոր հարթակներում: Ես ցանկանում եմ ներկայացնել Հայաստանում տիրող իրավիճակը կորոնավիրուսի և պանդեմիայի շրջանակներում:

Առաջին հերթին ուզում եմ նշել, որ իրավիճակը Հայաստանում գտնվում է հսկողության տակ, մարտի 16-ից գործում է արտակարգ դրություն, իսկ մարտի 24-ից՝ խիստ կարանտինային ռեժիմ: Մենք խիստ սահմանափակումներ ենք մտցրել օդային և ցամաքային հաղորդակցության մեջ: Երեկվա դրությամբ ունեցել ենք 937 վարակվածության դեպք, 149 առողջացած և, ցավոք, 11 մահ:

Վարակվածների մեծ մասի մոտ հիվանդությունը շատ թեթև է արտահայտված, նույնիսկ առանց ախտանշանների, բայց մենք չենք թուլացնում հսկողությունը և մտադիր ենք խստացնել հսկողությունը նաև թեստավորման քանակի ավելացմամբ: Այս պայքարում մենք համագործակցում ենք մեր հիմնական միջազգային գործընկերների հետ և օգտվելով առիթից՝ ուզում եմ շնորհակալություն հայտնել նաև մեր ռուս գործընկերներին արդյունավետ համագործակցության համար:

Ուզում եմ նշել, որ Հայաստանը իր հնարավորությունների չափով պատրաստ է ԵԱՏՄ-ի գործընկերներին աջակցություն ցուցաբերել: Երկրորդ՝ ուզում եմ հայտնել, որ ՀՀ կառավարությունը 9 փաթեթ է ընդունել ճգնաժամի սոցիալ-տնտեսական հետևանքների մեղմման համար, ինչպես հասարակության, այնպես էլ բիզնեսի համար: Մասնավորապես, մենք առանձնացրել ենք 50 մլն դոլար՝ օգնության համար: ՀՀ կառավարությունը նաև միջոցներ է ձեռնարկում տնտեսության կարգավորման և ծանր ճգնաժամային վիճակների հետևանքները հաղթահարելու համար:

Ոչ ոք չգիտի՝ ինչպիսին կլինի այդ ճգնաժամի սցենարը և դեռ որքան կձգվի այս պանդեմիան, և որքան խորը կլինի ճգնաժամը, ինչպիսին կլինի համաշխարհային տնտեսության վարքագիծը այդ պայմաններում: Մենք կարծում եք, որ ստեղծված իրավիճակում անհրաժեշտ է ապահովել ԵԱՏՄ-ի շրջանակում ազատ առևտրի անխափան աշխատանքը, անթույլատրելի է ապրանքների շրջանառության արգելքը անգամ պանդեմիայի պայմաններում:

Բացի դրանից՝ ծայրահեղ կարևոր է ապահովել պայմաններ բեռնափոխադրումների իրականցման համար, անխափան բեռնափոխադրումը ԵԱՏՄ-ում առաջնային նշանակություն է ձեռք բերել Հայաստանի համար, ռուս-վրացական սահմանը այս պլանում ունի ռազմավարական նշանակություն մեզ համար:

Վերջապես, ինչպես տեսնում ենք, անհրաժեշտ է նաև միջոցներ ձեռնարկել ԵԱՏՄ-ի շրջանակներում ազգային արժույթների վճարումների մասնաբաժնի ավելացման համար: Մենք պետք է ապացուցենք մեր կազմակերպության կենսունակությունը նաև ճգնաժամի պայմաններում»,- ասել է վարչապետն իր ելույթում: