45 000-ից ավելի դիմում՝ 1 օրում. Զարուհի Բաթոյանը ներկայացրել է աջակցության ծրագրերը

Կառավարությունն ամենօրյա ռեժիմով աշխատում է կորոնավիրուսի տնտեսական հետևանքների վերացման ծրագրեր մշակելու ուղղությամբ: Այս պահին էլ քննարկումները ընթանում են նաև օնլայն հարթակում: Այս մասին այսօր՝ ապրիլի 14-ին, Կառավարության մամուլի կենտրոնում կայացած ասուլիսի ժամանակ ասաց ՀՀ աշխատանքի և սոցիալական հարցերի նախարար Զարուհի Բաթոյանը:

Նախարարը հակիրճ ևս մեկ անգամ ներկայացրեց այս պահին կառավարության կողմից հաստատված 11 ծրագրերը և դրանցից օգտվելու կարգը:

«Այս պահին հաստատվել է 11 ծրագիր՝ 5-ը տնտեսական բլոկին է վերաբերում, 6-ը սոցիալական ծրագրեր են: Գիտեք, որ միջոցառումները համարակալել ենք: Ծրագրերից 4-րդը վերաբերում է մինչև 14 տարեկան երեխա ունեցող, աշխատանքից ազատված մայրերին, 6-րդը մասնավոր սեկտորում աշխատանքից ազատվածներին է վերաբերում, 7-րդը՝ հղի կանանց, որ չեն աշխատում և նաև ամուսինը չի աշխատում, 8-րդը տուժած ոլորտների աշխատակիցների համար է, որոնք դեռ գրանցված են, բայց աշխատանքի չեն հաճախում ստեղծված իրավիճակից ելնելով, 9-րդը վերաբերում է երեխաներին, որոնց ծնողները չեն աշխատում և 11-րդը երեկ է հաստատվել կառավարության կողմից, և վերաբերում է բնական գազի և էլեկտրաէներգիայի վճարներին: Այս ծրագրից շուրջ 220 000 բաժանորդ կօգտվի»,- ասաց նախարարը:

Նախարարը ներկայացրեց ծրագրերի իրականացման մանրամասները: Մասնավորապես, 4-րդ ծրագրով, որով փոխհատուցման չափը 100 000 դրամ է, ընթացքի մեջ է: Ծրագրի համար դիմելու անհրաժեշտություն չկա, պարզապես պետք է մուտք գործել ssa.am կայք, մուտքագրել տվյալները և տեսնել՝ շահառու հանդիսանո՞ւմ են, թե՞ ոչ: Հանդիսանալու դեպքում վճարումներն իրականացվում է բանկում:

6-րդ ծրագրով ևս փոխանցումները իրականացված են: Շահառուների թիվը 6 723-ն է:

4-րդ միջոցառման շահառուների ցանկը, որը վերաբերում է հղի կանանց, թարմացվում է, 7-րդ ծրագրի շրջանակը ընդլայնվել է և այստեղ ծրագրի շահառու կհանդիսանան ոչ միայն այն կանայք, որ չեն աշխատում և որոնց ամուսինը ազատված է աշխատանքից, այլ նաև նրանք, ում ամուսինը չի աշխատել մարտի 30-ի դրությամբ: Ծրագրի շահառու հանդիսանում է 5957 քաղաքացի, բայց ցանկը նորից թարմացվում է:

8-րդ ծրագրի համար, որից կարող են օգտվել այս փուլում տուժած համարվող ոլորտների աշխատակիցները, այսինքն՝ այն մարդիկ, ովքեր գրանցված աշխատողներ են, 1 ժամում ավելի քան 45 000 դիմում է ստացվել, որից 27 000-ը հաստատվել է: Շահառուները ընդհանուր 1.8 մլրդ դրամի չափով աջակցություն կկարողանան ստանալ արդեն այսօր: Այս ծրագիրը ևս շարունակվում է, դիմումների հիման վրա է իրականացվում:

9-րդ ծրագիրը, որ անչափահաս երեխաներին է վերաբերում, դիմումների ընդունումը երեկ է մեկնարկել: Այս ծրագրի շահառուների ցանկը դեռևս կազմվում է: Համակարգը այս պահին ժամանակավորապես դադարեցվել է սխալներ թույլ չտալու համար: Վերջին երկու ծրագրերի դեպքում նաև հրապարակվելու է շահառուների ցանկը:

Հիշեցնենք, որ նախորդ ծրագրերի դեպքում դիմում գրելու անհրաժեշտություն չկար: