2017-ը բրիտանական թագավորական ընտանիքի աչքերով

Անցած տարվա ընթացքում բրիտանական թագավորական ընտանիքի կյանքում տեղի ունեցան մի շարք իրադարձություններ, որոնք քննարկման առիթ եղան:

ShantNews-ը ներկայացնում է 2017-ի ընթացքում թագավորական ընտանիքի կյանքի ամենակարևոր դրվագները:

Անցած տարվա հունվարին Cheffins աճուրդների տունը աճուրդի հանեց Բուքինգհեմյան պալատի նախկին կառավարիչ Սիրիլ Դիկմանի իրերը, որոնք նա ձեռք էր բերել թագավորական ընտանիքից ավելի քան 50 տարի առաջ: Այդ իրերի մեջ էր նաև արքայադուստր Դիանայի նամակը ուղղված Դիկմանին:

Նամակում Լեդի Դիանան շնորհակալություն է հայտնում Դիկմանին արքայազն Հարիի ծննդյան օրը ուղարկված նվերի համար, ինչպես նաև Դիկմանին պատմել է արքայազն Հարիի դպրոցական ներկայացումների մասին: Նամակում արքայադուստր Դիանան գրել է, որ Հարին շատ փոփոխական երեխա է և դպրոցում ուսուցիչները անընդհատ բողոքում են նրա վարքից:

Հրապարակված նամակը ևս մեկ անգամ հիշեցրեց, թե ինչպիսի «վատ տղա է» եղել արքայազն Հարին, և ինչպես է թագուհին անհանգստացել նրա ճակատագրի համար:

Հունվարին թագուհի Եղիսաբեթ II-ը ռեկորդ է սահմանել: Նա բրիտանական կառավարիչների մեջ ամենաերկարն է գահին եղել՝ շուրջ 65 տարի:

Ապրիլին Եղիսաբեթ II-ը և արքայազն Ֆիլիպը Ուիփսեյդի կենդանաբանական այդում բացեցին փղերի խնամքի կենտրոն: Եվ հենց այս իրադարձության ժամանակ լուսնկարիչները հասցրին ֆիքսել այն դրվագը, թե ինչպես է թագուհին կերակրում կենդանաբանական այգու Դոննա անունով փղին:

Իսկ հունիսին արքայազն Հարին շատ անկեղծ հայտարարություն արեց՝ ասելով, որ իր ընտանիքում ոչ մեկը չի փափագում զբաղեցնել թագավորի կամ թագուհու գահը:

«Մերօրյա մոդերնիզացված միապետության համակարգը ուղղակի բարության համար աշխատող ուժի ցուցադրումն է կամ կախարդական մի երևույթ, որը պետք է մեր իրականությանը: Կա՞ արդյոք մեկը թագավորական ընտանիքում, որ ցանկանում է դառնալ թագավոր կամ թագուհի: Ես կարծում եմ, որ չկա: Մենք հիմա ուղղակի պետք է անենք մեր պարտականությունները և վերջ»,- ասել արքայազն Հարրին:

Հունիսին նաև թագուհու ծնունդն էր: Ծննդյան հանդիսավոր արարողության ժամանակ լուսանկարիչները հասցրել էին ֆիքսել փոքրիկ արքայազն Ջորջի դեմքի հոգնած արտահայտությունը: 3-ամյա Ջորջին ուղղակի ձանձրացրել էր այդ արարողությունը:

Այս տարվա օգոստոսին լրացավ Լեդի Դիանայի մահվան 20-րդ տարելիցը: Այս առիթով նրա որդիները՝ արքայազններ Ուիլիամը և Հարրին մի շարք հարցազրույցներ տվեցին և կիսվեցին մոր մասին իրենց հիշողություններով: Ավելի շատ արքայազն Հարրին պատմեց իր ապրումների մասին: Նա ասել է, որ այդ օրերին նա կարծես սպանված լիներ և այդ օրվանից հետո երկար ժամանակ ուղղակի խուսափում էր մտածել Լեդի Դիանայի մահվան մասին ու ցանկանում էր ջնջել բոլոր վատ հիշողությունները: Իր խոսքում Հարրին նաև վիրավորել է լուսանկարիչներին՝ ասելով, որ ավտովթարի ժամանակ օգնելու փոխարեն լուսնկարիչները տարված են եղել իրենց աշխատանքով:

Սեպտեմբերի սկզբին Ուիլիամը և Քեյթը պաշտոնապես հաստատեցին, որ ընտանիքի համալրում է սպասվում: Ըստ պաշտոնական տվյալների  Քեմբրիջի դուքսի և դքսուհու երրորդ երեխան կծնվի 2018-ի ապրիլին:

Իսկ նոյեմբեր ամսին Եղիսաբեթ II-ը և արքայազն Ֆիլիպը նշեցին իրենց ամուսնության 70-ամյակը: Համաշխարհային լրատվականների ուշադրության կենտրոնում հայտնվեց թագուհու և արքայազնի սիրո պատմությունը:

Դե իսկ վերջին և ամենաշատ քննարկված իրադարձությունը արքայազն Հարրիի և ամերիկացի դերասանուհի Մեգան Մարքլի նշանադրությունն էր: Նոյեմբերի 27-ին արքայազն Չարլզը  Բուքինգհեմյան պալատից պաշտոնական հայտարարություն արեց իր որդու նշանադրության մասին: