Ռուսական պատվաստանյութը, թերահավատ արևմտյան երկրները, կորոնավիրուսի դեպքերի աճը. ի՞նչ պետք է իմանալ կորոնավիրուսի մասին այսօր

Աշխարհում մինչև օրս արձանագրված կորոնավիրուսի դեպքերի թիվը գերազանցել է 20 մլն 800 հազարը, որոնցից գրեթե 750 հազարը՝ մահվան ելքով: Կորոնավիրուսի դեմ արդեն 7 ամսից ավելի շարունակվող պայքարը որոշ երկրներում, կարծես, շոշափելի արդյունքներ է տալիս, մինչդեռ մյուսներում նոր դեպքերի թիվն ավելանում է:

Իրավիճակը եվրոպական երկրներում

Գերմանիայում 3 ամսվա ընթացքում 1 օրում նոր դեպքերի ամենաբարձր թիվն է արձանագրվել, հաղորդում է The Guardian պարբերականը: 1000-ից ավելի նոր վարակվածների մեծ մասը երկտասարդներ են: Երկրի իշխանություններն այս աճը կապում են արտասահմանում գտնվող զբոսաշրջիկների վերադարձի, խնջույքների և ընտանեկան հավաքույթների հետ:

Իսկ Բելգիայի մայրաքաղաք Բրյուսելում օգոստոսի 12-ից դիմակ կրելը պարտադիր է դարձել բոլոր հանրային վայրերում: Այս նոր սահմանափակումը մտցվել է այն բանից հետո, երբ Բրյուսելում 100 հազար բնակչին բաժին ընկնող հիվանդների թիվը գերազանցել է 50-ը:

Իտալիան մի քանի շրջաններում պարտադիր կարանտին է սահմանել ռիսկային երկրներից, օրինակ՝ Իսպանիայից վերադարձողների համար: Գերմանիան իր հերթին Իսպանիայի մի շարք շրջաններ ներառել է սև ցուցակում: Իսպանիան վերջին շաբաթների ընթացքում դեպքրի աճ է արձանագրել, կորոնավիրուսի նոր օջախներ են հայտնաբերվել Մադրիդում, Կաստիլիա-Լեոնում և Բալեարյան կղզիներում:

Ֆրանսիա, Շվեյցարիա, Նիդերլանդներ, Ավստրալիա, Նոր Զելանդիա. այս երկրներում ևս վերջին օրերի ընթացքում կորոնավիրուսի նոր դեպքերի թիվն ավելացել է. այս շարքը դեռ կարելի է երկար շարունակել:

Ռուսական «Սպուտնիկ V» պատվաստանյութը

Ստեղծված իրավիճակի գլխավոր լուծումը, թերևս, վիրուսի դեմ պատվաստանյութի ստեղծումն է, ինչն առաջինը արել է Ռուսաստանը: Պատվաստանյութն էլ անվանվել է «Սպուտնիկ V»՝ Երկրի առաջին արհեստական արբանյակ «Սպուտնիկի» անունով, որը Խորհրդային Միությունն ուղեծիր էր ուղարկել 1957թ.-ին:

Պատվաստանյութը ներարկում են 2 անգամ, 21 օրվա ընդմիջմամբ: Այն պարունակում է ադենովիրուսի հիմքի վրա ստեղծված ոչ կենդանի մասնիկներ: Նյութում առկա է կորոնավիրուսի Spike կոչվող սպիտակուցի գեն, որի միջոցով վիրուսը մտնում է մարդու բջիջներ և իմունիտետ ստեղծում:

Ռուսական պատվաստանյութի անվտանգության և արդյունավետության մասին հավաստիացումներ են արել Ռուսաստանի նախագահը, առողջապահության նախարարը և Ռուսաստանի առողջապահական ոլորտի տարբեր այլ մասնագետներ: Ավելին, Վլադիմիր Պուտինը նույնիսկ հայտարարել է, որ պատվաստվել է իր սեփական դուստրերից մեկը, սակայն արևմտյան աշխարհը, միևնույնն է, կասկածներ ունի:

Արևմտյան մասնագետների արձագանքը ռուսական պատվաստանյութին

Reuters լրատվական գործակալության փոխանցմամբ՝ քննադատների հիմնական փաստարկներն այն են, որ ռուսական պատվաստանյութը շատ արագ անցել է կլինիկական փորձարկումների միայն առաջին և երկրորդ փուլերը, փորձարկմանը մասնակցել են փոքրաթիվ մարդիկ: Շուտով կսկսվի փորձարկումների երրորդ փուլը, սակայն Ռուսաստանն արդեն սեպտեմբերին մտադիր է սկսել պատվաստանյութի արտադրությունը:

Առողջապահության համաշխարհային կազմակերպությունը հայտնել է, որ սերտ կապի մեջ է գտնվում Ռուսաստանի իշխանությունների հետ և անհամբերությամբ սպասում է, թե երբ կարող է ուսումնասիրել կլինիկական հետազոտությունների արդյունքները:

Գերմանիայի առողջապահության նախարար Յենս Սպահնի խոսքով՝ կարևորը ապահով, ստուգված արտադրանք ունենալն է, ոչ թե առաջինը լինելը:

ԱՄՆ գլխավոր վարակաբան Էնթոնի Ֆաուչին նույնպես կասկած է հայտնել ռուսական պատվաստանյութի ապահովության և արդյունավետության մասին:

Ռուսաստանի առողջապահության նախարար Միխայիլ Մուրաշկոն արտասահմանցի մասնագետների քննադատությունները համարում է անհիմն:

«Ուզում եմ շեշտել, որ մեր արտասահմանցի գործընկերները, որոնք ըստ երևույթին, զգում են ռուսական պատվաստանյութի ակնհայտ մրցակցային առավելությունները, փորձում են այնպիսի կարծիքներ արտահայտել, որոնք, մեր կարծիքով, բացարձակ անհիմն են», – ասել է Մուրաշկոն:

Ի դեպ, ռուսական պատվաստանյութի 2 չափաբաժինը կարժենա 10 ԱՄՆ դոլար, այն դեպքում, երբ ամերիկահայ գործարար Նուբար Աֆեյանի Moderna ընկերությունն իր կողմից մշակվող պատվաստանյութի յուրաքանչյուր չափաբաժնի համար պահանջելու է 32-37 դոլար: