Գյումրիում սուբվենցիոն ծրագրով հիմնանորոգվող 17 փողոցների ընդհանուր բյուջեն կազմում է մեկ միլիարդ դրամ

Վերակառուցման և զարգացման եվրոպական բանկի ֆինանսավորմամբ ընթացող լայնածավալ փողոցաշինական աշխատանքներից բացի Գյումրիում սուբվենցիոն ծրագրով են փողոցներ հիմնանորոգվելու։

Պետական ծրագրի ընդհանուր արժեքը մոտ մեկ միլիարդ դրամ է, որում համաֆինանսավորման մասնաբաժին ունի տեղական բյուջեն։ Սուբվենցիոն ծրագրում են 17 փողոցներ, հիմնականում՝ երկրորդական, որոնք համարվում են գլխավոր փողոցների համար շրջանցիկ։ Փողոցների թիվը շատ է, բայց աշխատանքի ծավալները փոքր՝ ընդհանուրը 6,5 կիլոմետր երկարության։

Գրիբոյեդով փողոցի ընդհանուր երկարությունը 240 մետր է, ջրահեռացման ցանց առաջին անգամ է կառուցվում, տեղումներից հետո փողոցն ու տները անձրևաջրերով են լցվել։ Ջրահեռացման խողովակաշար անցկացնելուց հետո  սելավաջրերն իրենց ուղղությունը կփոխեն դեպի Գյումրի գետակ, որի հարևանությամբ տներն էլ հեղեղումներից ապահովագրված չեն։ Նորացվում են նաև փողոցի կոյուղատար հիմնական խողովակները։Մինչև ներքին ցանցի խողովակները չփոխվեն, շինարարը հիմնային աշխատանքներին չի անցնի։ Սուբվենցիոն ծրագրում եղած Շչերբինա փողոցում էլ մայթերի ամբողջական կառուցմանը խանգարում են տեղադրված տնակներն ու կցակառույցները, որոնք քանդելու հանձնարարական տրվել է շինարարին։

«Սա անելու բան չէ․ բնակիչը մեջը, էկել են, կքանդեն։ Ես 32 տարի ապրել եմ էս տնակի մեջ, ես կթողա՞մ, որ էդ տնակը քանդեն, որ իմ տնակիս հաշվին իրենց փողոցը մեծացնեն, որ սիրուն էղնի, հըբը մենք»,- ասում է տնակի բնակիչներից մեկը։ Չբնակեցված մի քանի շինություններ արդեն շինարարն ապամոնտաժել է, բայց քիչ չեն այն կցակառույցները, որոնք բնակեցված են։ Մայթերին կամ երթևեկությանը խանգարող հատվածներում տեղադրված 46 շինություն կա հաշվառված։

«Չի կարող լինի այնպես, որ փողոցի մի հատվածն ունենա մայթ, հետո մայթն ընդհատվի ինչ-որ կառույցով, հետո նորից շարունակվի։ Պետք է անհատական մոտեցում ցուցաբերվի բնակիչներին։ Փորձենք նաև իրենց ունեցած խնդիրները արձանագրել, իրենց դժգոհություններն օբյեկտիվ գնահատենք և յուրաքանչյուրի մասով անհատական լուծում գտնենք»,- պարզաբանում է Գյումրիի քաղաքապետի գլխավոր խորհրդական Կարապետ Մխչյանը։

Սուբվենցիոն և ՎԶԵԲ-ի ծրագրերով փողոցաշինական աշխատանքների ընթացքում առաջ եկած ներքին կոմունիկացիոն ցանցի խնդիրների պատճառով նախագծային փոփոխություններ են դեռ կատարվում, որոնք էլ  շինարարության ժամանակավոր դադարի պատճառ են դառնում ։

Ամեն դեպքում, այս դադարները, ըստ պատվիրատուի, չի նախատեսում շինարարների համար ավարտի ժամկետները փոխել։ Ի տարբերություն ՎԶԵԲ-ի ծրագրի, սուբվենցիոնի ծավալներն անհամեմատ ու շատ փոքր են, որոնք ավարտել մինչև հոկտեմբերի վերջ հնարավոր է։

Այս տարվա աշխատանքներին զուգահեռ, պատվիրատուն՝ քաղաքապետարանը, արդեն նախատեսումներ է անում հաջորդ տարվա համար, ըստ այդմ՝ հնարավոր է 2021 թվականի սուբվենցիոն ծրագրում ընդգրկվեն 50-ամյակի կամրջի և Ալեք Մանուկյան փողոցի հիմնանորոգումները։