Ի՞նչ են խոսել Պուտինն ու Լուկաշենկոն դեմ առ դեմ հանդիպումից առաջ

Սոչիում ընթանում են ՌԴ նախագահ Վլադիմիր Պուտինի և Բելառուսի նախագահ Ալեքսանդր Լուկաշենկոյի բանակցությունները։ Բանակցություններից առաջ ՌԴ նախագահի պաշտոնական ներկայացուցիչ Դմիտրի Պեսկովը հայտարարել էր, որ դրանք կտևեն «այնքան, որքան կպահանջվի»։

Նախքան հանդիպումը սկսելը Վլադիմիր Պուտինը շեշտել է, որ Բելառուսն ինքնուրույն պետք է լուծի նախագահական ընտրություններից հետո երկրում ստեղծված իրավիճակը։

«Մենք կողմ ենք, որ բելառուսներն իրենք, առանց արտաքին հուշումների և ճնշման, հանգիստ և միմյանց հետ երկխոսությամբ լուծեն այս իրավիճակը և հանգեն ընդհանուր որոշման, թե ինչպես կազմակերպել հետագա աշխատանքը։ Մենք գիտենք Սահմանադրական փոփոխությունների վրա աշխատանք սկսելու Ձեր առաջարկի մասին և կարծում ենք, որ դա ժամանակին է, տրամաբանական և նպատակահարմար»,- ասել է Պուտինը։

Պուտինը նաև շեշտել է, որ Ռուսաստանը հավատարիմ է մնում ՀԱՊԿ-ի և Դաշնակցային պետություն ստեղծելու մասին պայմանագրի շրջանակներում ձեռք բերված համաձայնություններին և կկատարի իր վրա վերցված բոլոր պարտավորությունները։

«Մենք պայմանավորվել ենք, որ Ռուսաստանն այս դժվարին պահին Բելառուսին կտրամադրի 1,5 մլրդ դոլարի պետական վարկ և մենք դա կանենք։ Մենք նաև կշարունակենք մեր համագործակցությունը պաշտպանական ոլորտում… Բելառուսը կլինի առաջին երկիրը, որը կստանա Քովիդ-19-ի դեմ մեր պատվաստանյութը»,- ասել է ՌԴ նախագահը։

Իր հերթին Ալեքսանդր Լուկաշենկոն շնորհակալություն է հայտնել Վլադիմիր Պուտինին Բելառուսի ներքին իրավիճակի հարցում նրա դիրքորոշման համար։

«Ես ձեզ հետո մանրամասն կպատմեմ, թե ինչ է տեղի ունեցել։ Ամեն ինչ իրականում այնպես չի եղել, ինչպես ներկայացրել են լրատվամիջոցները։ Շաբաթ և կիրակի օրերին մենք ազատում ենք Մինսկի որոշ հատվածներ, որպեսզի նրանք, ովքեր երթի դուրս գալու ցանկություն ունեն, կարողանան անցնել։ Կարևորն այն է, որ նրանք սահմանը չանցնեն»,- ասել է Լուկաշենկոն։

Լուկաշենկոն նաև ակնարկել է, որ Բելառուսի ցույցերին խառնված են արտաքին ուժեր։ Նա նշել է, որ ՆԱՏՕ-ն զորավարժություններ է անում, երբ ցանկանում է, և իրենք նույնպես զորավարժություններ կանեն և պատրաստ կպահեն իրենց բանակները։

Դեմ առ դեմ հանդիպումից հետո երկու նախագահների կողմից փաստաթղթերի ստորագրում և մամուլի ասուլիս չի նախատեսվել։ Սոչի աշխատանքային այցը Լուկաշենկոյի առաջին արտասահմանյան ուղևորությունն է օգոստոսի 9-ի նախագահական ընտրություններից հետո։ 6-րդ անգամ նախագահ ընտրվելուց հետո Լուկաշենկոյի դեմ զանգվածային ցույցեր են տեղի ունենում արդեն 1 ամսից ավելի։

Ինչպես ավելի վաղ հայտնել էր SHANTNEWS-ը, ընտրություններում նախագահի նախկին թեկնածու Սվետլանա Տիխանովսկայան մեկնաբանել է Ռուսաստանի և Բելառուսի նախագահների հանդիպումը։ Տիխանովսկայան հայտնել է, որ Սոչիում ձեռք բերված ցանկացած պայմանավորվածություն օրենքի ուժ չի ունենա, քանի որ Լուկաշենկոն երկրի օրինական նախագահ չի հանդիսանում։ Տիխանովսկայան հայտարարել է, որ իշխանության գալուց հետո ընդդիմությունը կվերանայի Սոչիի բանակցությունների արդյունքում կնքված բոլոր համաձայնագրերը։