Համավարակի ու պատերազմի հետևանքով Շիրակի մարզում քաղաքաշինական մի շարք ծրագրեր նախագծային փուլում մնացին

2020 թվականին Շիրակի մարզում կատարված աշխատանքների ընդհանուր ծավալը ներկայացնելիս, Շիրակի մարզպետը նշել է, որ   ավելի շատ աշխատանք է կատարվել,քան 2019 թվականին։

«Եթե ընդհանուր քաղաքաշինության ոլորտին անդրադառնանք, 2020 թվականին  մոտ 31 միլիարդ դրամի աշխատանք է կատարվել, որի մեջ գերակշռում է ճանապարհաշինության ոլորտը մոտ 21 միլիարդ դրամ գումարով։Այստեղ մեզ համար մտահոգիչ էր  այն հանգամանքը, որ մասնավոր  շինարարության սեգմենտում մեզ համար երևացող թվերում մոտ 50%-ի անկում կար 2019 թվականի հետ համեմատ։Բայց  ճանապարհաշինության ոլորտում  տարին բավականին հաջողված էր»,-շեշտել է մարզպետը։

Ըստ Տիգրան Պետրոսյանի,շինարարության ոլորտում աշխատանքների ձգձգման պատճառներից հիմնականը կապված էր պատերազմական շրջանում  տեխնիկայի ռազմաճակատ ուղարկելով, որի ժամանակ աշխատանքները դադարել են։

«Պատերազմի ժամանակ մեծ թվով շինարարական կազմակերպություններից մենք ստիպված էինք  մեծ թվով տեխնիկա վերցնել և սպասարկել  մեր անվտանգային կարիքները և մի պահ նույնիսկ մտահոգություն ունեինք,որ արդյունքում կտուժեր գործընթացը, բայց ի պատիվ մեր շինարարների, մենք լուրջ  ծավալային խնդիրներ չունեցանք»,-ասել է Տիգրան Պետրոսյանը։

Իրականացված շինարարական ծրագրերից մի քանիսը տեղափոխվել  են հաջորդ տարի։Այս տարվա ընթացքում մարզում իրականացված քաղաքաշինական ծրագրերում մեծ թիվ են կազմել սուբվենցիոն ծրագրերը։

«Էն մոտեցումը, որ ինչքան սուբվենցիոն ծրագիր ներկայացնենք,էնքան կֆինանսավորենք, էապես շատ կարևոր էր և մոտ 3,3 միլիարդանոց փաթեթն այս տարի իրականացվեց Շիրակի մարզում, որի 57 %-ը կառավարության ներդրումն էր»,-նշել է Շիրակի մարզպետը։

Անդրադառնալով բնակարանաշինության ոլորտում կատարված ծրագրերին, մարզպետը նշել է, որ 2020 թվականի ընթացքում բնակարանաշինություն իրականացվել է միայն գյուղական համայնքներում, իսկ Գյումրիում նախապես  հաստատված ծրագրերը չեն իրականացվել։

«Վթարային շենքերի պարագայում մենք ի սկզբանե չկարողացանք համաձայնության գալ բնակիչների հետ առաջարկվող տարբերակներում։Նույն ԲԳՎ-ի առաջարկվող տիրույթում  ունեցանք բնակիչների հետ անհամաձայնություններ, հրաժարվեցին և իրենց թիվը փոքր չէր։Եվ՛ նախագծի մեջ փոփոխություններ առաջարկվեցին, և՛ համավարակի, պատերազմի  հետևանքով էս նախագիծն էլ ժամանակի մեջ հետ մնաց։Տնակների պարագայում էլ  որևէ հստակ գործիքակազմ չներկայացվեց,բայց հաջորդ տարվա առաջին եռամսյակի ընթացքում հստակ յուրաքանչյուր կոմպոնենտով ժամանակացույցներ կներկայացվեն»,-վստահեցրել է Տիգրան Պետրոսյանը։