Շիրակի մարզում գրիպի դեմ պատվաստվողների թիվն ավելացել է, պոլիկլինիկաները ստացել են պատվաստանյութի նոր խմբաքանակ

Հանրապետության բոլոր պոլիկլինիկաներում գրիպի դեմ պատվաստումներ են։ Մասնագետները հիմա են համարում սուր շնչառական վիրուսների դեմ պայքարի ամենաարդյունավետ ժամանակահատվածը։

Այս ընթացքում պատվաստվում են հիմնականում ռիսկի խմբում ընդգրկված քաղաքացիները։ Հիվանդությունների վերահսկման և կանխարգելման ազգային կենտրոնի «Շիրակ» մասնաճյուղը ստացել է պատվաստանյութի նոր խմբաքանակ, որն առաջնային բժշկության օղակին տրամադրում են ըստ նախնական հայտերի։

Այս սեզոնին ամենաշատ պահանջարկն ունի գրիպի դեմ պատվաստանյութը։ Արդեն մի քանի խմբաքանակ մարզում սպառվել է։

«Ընդհանուր առմամբ ստացել ենք 24․300 դոզա պատվաստանյութ, որից արդեն 58 տոկոսը պատվաստել ենք։ Մեր մարզում բավականին բարձր է ընդգրկվածությունը գրիպի պատվաստումների մեջ»,- մարզի ցուցանիշերը ներկայացրել է ՀՎԿԱԿ «Շիրակ» մասնաճյուղի իմունականխարգելման գործընթացի պատասխանատու Սոնյա Ոսկանյանը։

Ռիսկի խմբերում ընդգրկված քաղաքացիները մարզում մոտ 50․000-ն են, նրանցից 30 %-ը պատվաստվել է: Պատվաստանյութի նոր՝ 7100 դեղաչափ է ստացվել։

«Հոկտեմբեր ամսից մենք ստացել ենք 1226 պատվաստանյութ, էս պահի դրությամբ կատարել ենք 1167 պատվաստում, բնակչությունը շատ ակտիվ մասնակցում է պատվաստումներին, մոտ 98 % ընդգրկվածություն ունենք»,- նշել է Գյումրիի Կարմիր խաչի անվան պոլիկլինիկայի մանկական բաժնի պատասխանատու Անահիտ Սանդրոսյանը։

Հղիները, վեց ամսականից մինչև 5 տարեկան երեխաները, բուժաշխատողները, զինակոչիկներն ու 65 տարեկանից բարձր քաղաքացիները ռիսկային խումբն են կազմում։ Նրանց մեջ քիչ չեն պատվաստվումներից հրաժարվողները։ Նման դեպքերում  պատվաստանյութը տրամադրվում է այլ քաղաքացիների։ Պատվաստանյութը օրգանիզմի դիմադրողականությունն է բարձրացնում, նպաստում է  թեթև տանել վիրուսային հիվանդությունները։

Կախված գրիպի հարուցիչի տեսակից, վակցինայի բաղադրությունը կարող է ամեն տարի փոփոխվել, ըստ այդմ էլ, հիմնականում ռիսկի խմբերի անձանց տրվում է ցուցում՝ տարեկան մեկ անգամ պատվաստում ստանալ։ Ըստ իմունոլոգների՝ գրիպի դեմ կիրառվող պատվաստանյութը Covid-19-ի դեպքում օգտակար չէ, բայց կարող է նպաստել օրգանիզմի դիմադրողականության բարձրացմանը։

«Կոնկրետ սպեցիֆիկ իմունիտետ այս պատվաստանյութը չի առաջացնում Covid-19-ի նկատմամբ, բայց ունի շատ կարևոր նշանակություն  այս պարագայում, որովհետև, եթե մարդը հանկարծ հիվանդանա և՛ գրիպով, և՛ Covid-19-ով միաժամանակ, դա օրգանիզմի համար կարող է շատ ծանր հարված լինել, իսկ եթե պատվաստված լինի, գոնե գրիպով չի հիվանդանա»,- ասում է Սոնյա Ոսկանյանը։

Սուր շնչառական վիրուսների ակտիվացման սեզոնը փետրվարից-ապրիլ ժամանակահատվածն է։ Այդպիսի կանխատեսումներ ունեն համաճարակաբանները։ Հունվարի առաջին երկու շաբաթների ընթացքում պոլիկլինիկաներում կորոնավիրուսի ախտանշաններով դիմելիությունն համեմատաբար նվազել է։