Թանգարանների միջազգային օրն ու թանգարանային գիշերը Գյումրիում հյուրընկալվել են բազմաթիվ այցելուներ ՀՀ-ից և արտերկրից

Մայիսի 18-ը Թանգարանների միջազգային օրն է: Այն հռչակվել է 1977 թվականին և նշվում է աշխարհի ավելի քան 150 երկրում, այդ թվում՝ Հայաստանում։ Ամեն տարի Թանգարանների միջազգային օրվա համար ընտրվում է կարգախոս: Այս տարի այն այսպիսին է՝ «Թանգարանների ապագան վերականգնել և վերաիմաստավորել»: Գյումրիի թանգարաններն այսօր կեսօրից մինչև ժամը 22-ը այցելուներին կընդունեն անվճար: Բացի մշտական ցուցադրություններից, կունենան նաև տոնական միջոցառումներ:

Թանգարանների միջազգային օրն ու թանգարանային գիշերը Գյումրիի թանգարանների համար շատ այցելուներ ընդունելու միակ առիթը չէ, բայց այսօրվա հյուրերին դիմավորելու պատրաստություններն են ուրիշ: Շիրազի հուշատուն-թանգարանում ապագայի վերաիմաստավորումը անցյալից են սկսել:

«Այսօր մենք ցուցադրել ենք 19-րդ դարի տարազները: Հետ ենք նայում, բայց նաև ազգը, ժողովուրդը, եթե իր ավանդույթները խախտում է, եթե չի հետևում ավանդույթներին, նա ձուլման է ենթակա։ Իսկ մենք այն ազգն ենք, որին Աստված այսքան տարիներ պահել է: Մենք չենք ձուլվել ու չենք ձուլվելու»,- ասում է Գյումրիի Հովհ. Շիրազի հուշատուն-թանգարանի տնօրեն Արա Պապանյանը:

19-րդ դարում ինչպիսի հագուկապ են ունեցել Ալեքպոլում և ոչ միայն այստեղ, հայկական տարազները ներկայացված են Շիրազի հուշատուն-թանգարանի նկուղային հարկաբաժնում: Հագուստները թանգարանային նմուշ չեն, բայց այցելուներին մոտեցնում են թանգարանին։

Իսահակյանի տուն-թանգարանի այսօրվա առաջին հյուրերը դիլիջանցի երիտասարդներն էին: Տավուշից Գյումրի էին եկել թանգարաններ այցելելու համար: 19-րդ դարի շենքերում մշակութային արժեքները վայելելով ասում են՝ Գյումրիից լավ տեղ չկա։

Մհեր Մկրտչյանի թանգարանի այցելուները նաև ռուս զբոսաշրջիկներն են: Խորհրդային տարիներին կինոյում Ֆրունզիկի մարմնավորած կերպարներն ու նրա համբավը նրանց բերում է Գյումրի: Ֆրունզիկի և մյուս թանգարաններում հատկապես շաբաթ-կիրակի օրերին հերթեր են:

Ժողովրդական ճարտարապետության ու քաղաքային կենցաղի թանգարանը ցուցանմուշներով ամենահարուստն է: Քաղաքի պատմությունն ու կենցաղը, արհեստներն ու արվեստը ներկայացված են այստեղ: Այցելուների թիվը բոլոր թանգարաններում համեմատության մեջ է 2019 թվականի հետ: Անցած տարին պարապուրդի շրջան էր թանգարանների համար: Այս տարի նորից Գյումրիում զբոսաշրջային հոսքը և հետաքրքրությունը թանգարանների նկատմամբ մեծացել է:

«Անցած տարի 6 ամիս չաշխատեցինք՝ մարտից մինչև օգոստոս: Հիմա շարժը կա: Շարժը սկսվել է ապրիլ ամսից: Շատ-շատ այցելուներ ունենք: Ռուս նաև այլ օտարերկրացի զբոսաշրջիկներ են գալիս: Նախորդ երկու շաբաթների ընթացքում 300-ից ավելի այցելուներ ենք ունեցել: Բոլորն էլ սիրում են թանգարանը և առնչվում են այն արժեքներին, որոնք 19-րդ դարին են վերաբերում»,- ասում է Գյումրիի Ժողովրդական ճարտարապետության և քաղաքային կենցաղի թանգարանի տնօրեն Սոնա Հարությունյանը:

Այս տարի թանգարանային գիշերը՝ կրկին համավարակով պայմանավոված, սահմանափակումներով է անցկացվում: Այսօր թանգարանները այցելուներին անվճար ընդունելու են մինչև ժամը 22-ը: Նախորդ տարիներին մշակութային տոնը տևում էր մինչև կեսգիշեր:

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom, SHIRAK telecom, HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։