Կրթության ոլորտում բոլոր ծրագրերի գլխավոր շահառուն մարդն է․ այս մոտեցումը դրված է նաև «Դասավանդի՛ր, Հայաստան»-ի գործունեության առանցքում․ ԿԳՄՍ նախարար

Երևանում և մարզերում հուլիսի 14-18-ն անցկացվում է «Դասավանդի՛ր, Հայաստան» կրթական հիմնադրամի շաբաթը, որը նվիրված է կազմակերպության 10-ամյա գործունեությանն ու անցած ուղուն: Հնգօրյա այս հավաքը միտված է ուսուցիչ-առաջնորդների, աշակերտների, գործընկերների ու աջակիցների համախմբմանը։ Այս մասին հայտնել են ԿԳՄՍ նախարարությունից:

Շաբաթվա շրջանակում այսօր տեղի ունեցած միջոցառմանը որպես բանախոս մասնակցել է ՀՀ կրթության, գիտության, մշակույթի և սպորտի նախարարը Ժաննա Անդրեասյանը: Միջոցառմանը մասնակցել են նաև ԱԺ գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովի նախագահ Սիսակ Գաբրիելյանը, դեսպաններ, կրթության ոլորտի փորձագետներ, ուսուցիչներ:

ԿԳՄՍ նախարար Ժաննա Անդրեասյանը ողջունել է ներկաներին և շնորհավորել «Դասավանդի՛ր, Հայաստան»-ի անդամներին հիմնադրման 10-ամյակի առիթով՝ ընդգծելով կազմակերպության հետ համատեղ արդյունավետ աշխատանքն ու կարևոր ծրագրային նախաձեռնությունները՝ միտված կրթության համակարգի վերափոխմանը.

«Կրթության ոլորտում բոլոր ծրագրերի գլխավոր շահառուն մարդն է։ Այս մոտեցումը դրված է նաև «Դասավանդի՛ր, Հայաստան»-ի գործունեության առանցքում՝ որպես գլխավոր գաղափար, որի շուրջ, ընդհանրապես, կառուցված են նպատակային ծրագրերը»:

Նախարարն ընդգծել է, որ հիմնադրամի աշխատանքը խիստ նկատելի է այն դպրոցներում, որոնցում աշխատում են կազմակերպության կողմից գործուղված ուսուցիչները՝ որպես օրինակ բերելով Ալավերդու ջրհեղեղից հետո այդ քաղաքի դպրոցներում աշակերտների հետ հանդիպումը.

«Կախված նրանից, թե ինչպես ենք աշխատում երեխաների հետ, էապես փոխվում են իրավիճակներին արձագանքելու նրանց հնարավորություններն ու հմտությունները։ Այն դպրոցում, որտեղ տեսա հիմնադրամի նախընթաց աշխատանքը, երեխաները խմբային էին կիսում իրենց էմոցիաները, աջակցում միմյանց, կարողանում իրավիճակից դուրս գալու ելքեր մատնանշել։ Սա կոնկրետ արդյունք է. երբ խոսում ենք ծրագրերից, կարևոր է, որ դրանք լինեն ոչ միայն թվերով, այլ հենց այսպիսի ազդեցություններով»:

Ժաննա Անդրեասյանն անդրադարձել է նաև ԿԳՄՍ նախարարության և «Դասավանդիր, Հայաստան» կրթական հիմնադրամի համագործակցությամբ իրականացվող «Սերունդ» ծրագրին, որն ուղղված է դպրոցներում սոցիալ-հոգեբանական աշխատանքների բարելավմանը.

«Դպրոցի սոցիալ-հոգեբանական միջավայրի վերափոխմանն ուղղված «Սերունդ» ծրագիրը կարող է ընդլայնվել` հաշվի առնելով արդյունքն ու դրական արձագանքները։ Կրթության ոլորտում միայն ակադեմիական միջավայրի բարելավումը չի կարող ցանկալի արդյունք ապահովել, եթե զուգահեռաբար չունենանք ապահով միջավայր, որտեղ երեխաները սովորում են սիրով և լավ են զգում։ Կարծում եմ, որ «Սերունդ» ծրագիրը միջավայրի բարելավման մասին է»:

Կրթության հասանելիության ապահովման համատեքստում Ժաննա Անդրեասյանը կարևորել է հատկապես գյուղական բնակավայրեր ուսուցիչների գործուղման ծրագիրը՝ ուղղված հենց դպրոցներում սոցիալ-հոգեբանական, համագործակցության միջավայրերի ամրապնդմանը:

Ժաննա Անդրեասյանի ընդգծմամբ՝ համավարակի և հետպատերազմյան իրավիճակում հանրակրթության ոլորտի բովանդակային բարեփոխումների հետևողական գործընթացը հնարավոր է դարձել միայն համատեղ աշխատանքի և գործընկերության շնորհիվ:

«Պետության հետ աշխատանքը և պետական քաղաքականության մշակմանն աջակցությունը պահանջում են նաև ինստիտուցիոնալ նրբանկատության և պետական շահի գիտակցում, որը միշտ տեսնում ենք մեր գործընկերության շրջանակում: Վստահ եմ, որ այս որակյալ գործընկերությունը մեզ առաջ է տանելու, և մենք գրանցելու ենք նորանոր հաջողություններ՝ առաջին հերթին մեր երեխաների զարգացման և որակյալ կրթության ապահովման առումով»,- ասել է նախարարն ու շնորհակալություն հայտնել արդյունավետ համագործակցության համար:

Միջոցառմանը ողջույնի խոսքով հանդես են եկել նաև «Դասավանդի՛ր, Հայաստան»-ի հոգաբարձուների խորհրդի նախագահ Սեմ Սիմոնյանը և հիմնադրամի հիմնադիր և գործադիր տնօրեն Լարիսա Հովհաննիսյանը:

«Դասավանդի՛ր, Հայաստան» կրթական հիմնադրամի 10-ամյա հոբելյանին նվիրված միջոցառումներին ներկա է նաև ԿԳՄՍ նախարարի տեղակալ Արթուր Մարտիրոսյանը: