Արտասահմանցի  կամավորները վերանորոգում են Լանջիկ գյուղի միջնակարգ դպրոցի դասասենյակները

Կամավորները վերանորոգում են  Լանջիկ գյուղի միջնակարգ դպրոցը։ Նրանք  Հայաստան են եկել տարբեր երկրներից։ Մեծ մասը օտարազգի երիտասարդներն են , Շիրակի մարզը նախընտրել են «Դեպի Հայք» հիմնադրամի և Հայ կամավորների միության  ծրագրերով։ Մասնագիտական գործունեությունից  բացի, կամավորներն ամեն ուրբաթ զբաղվում են վերանորոգման աշխատանքներով։

Լորի Սանչեսը Ֆրանսիացի է, մասնագիտությամբ մարդաբան է։ Կամավորների հետ  Հայաստան է եկել  մի քանի ամիս առաջ։ Ընկերներով  վերանորոգում են  Լանջիկի միջնակարգ դպրոցի  դասասենյակները, աշակերտների համար լավագույն պայմաններ են  ստեղծում։

«Վերանորոգման այս աշխատանքներով շատ եմ ոգևորված, սա թիմային ու միասնական աշխատանք է, համախմբվել ենք մեկ գաղափարի շուրջ, որ աշակերտների  ուսումնառության պայմանները մի փոքր բարելավենք։Ես անձնապես ցանկանում եմ, որ աշխարհի բոլոր մանուկները լավ կրթության հնարավորություն  ունենան, ուզում եմ իմ փոքրիկ ներդրումն ունենալ այս գործում»,-SHANTNEWS.am-ին իր տպավորություններն է փոխանցել ֆրանսիացի կամավոր Լորին Սանչեսը:

21 տարեկան  Գիյոմը հետաքրքրված է հայկական մշակույթով։ Ազատ ժամանակ շրջում է  Հանրապետության ու մարզի  տեսարժան վայրերով։ Հիացած է Գյումրիի ճարտարապետությամբ ու հատկապես եկեղեցիներով։

«Հայկական մշակույթին ծանոթ եղել եմ, Բելգիայում ունեմ շատ հայ ընկերներ։ Տեսարժան վայրերում շրջելիս նկատեցի, որ դուք հնարավորինս պահպանում եք ձեր հնությունները, դա շատ հետաքրքիր է։ Գյումրիի ճարտարապետությունը ինձ շատ է գրավել, հատկապես սև եկեղեցիներն ու «Մայր Հայաստան» հուշահամալիրը։ Համոզվեցի, որ Գյումրին մշակութային կենտրոն է»,-SHANTNEWS.am-ի հետ զրույցում նշել է կամավոր Գիյոմ Կոմեն։

Ջոնը Հայաստանում  առաջին անգամ է, մայրը հայ է։ Կամավորությունը առիթ էր  հայրենիք այցելելու և իր արմատներին, մշակույթին առնչվելու համար։ Ազատ ժամերին սիրում է  ստեղծագործել, արդեն մի քանի մրցույթների հաղթող է։

«Եկել եմ Հայաստան, որպեսզի ավելի լավ ծանոթանամ իմ մայրական կողմի արմատներին։Հայաստանն ու Գյումրին ինձ շատ դուր եկան, այստեղ էլ եմ ստեղծագործում,մասնակցում եմ տարբեր մրցույթների, անցած տարի իմ ստեղծագործությունը հաղթեց իսպանական հայտնի մրցույթում, այս տարի նորից որոշել եմ մրցույթին մասնակցել Հայաստանում գրված իմ ստեղծագործությամբ»,-նշում է Ջոնը։

Մոտ 10 երկրից 30 կամավորներ ամեն ուրբաթ  մասնակցում են Լանջիկի միջնակարգ դպրոցի դասասենյակների վերանորոգման աշխատանքներին։ 2544 քմ ընդհանուր մակերեսով և մոտ 400 երեխայի  համար  կառուցված երկհարկանի դպրոցում հիմա սովորում են 130 աշակերտ։ Կամավորները ներգրավված են տարբեր  նախագծերում, նաև դասավանդում են երեխաներին։ Ծրագրի ավարտից հետո որոշ երիտասարդներ  ցանկություն են հայտնում մնալ Հայաստանում։

«Մենք ունենք շուրջ 2000-ից ավելի շրջանավարտ, որ տարիներ շարունակ եկել մասնակցել են մեր ծրագրերին։ Նրանցից շուրջ 10%-ը տեղափոխվել ու բնակվում են Հայաստանում, ունենք նաև կամավորներ, որ նախընտրել են ապրել հենց Գյումրիում»,- նշում է  «Դեպի Հայք» հիմնադրամի և Հայ կամավորների միության աշխատանքների  տեղակայման  և հատուկ ծրագրերի ղեկավար Լիլիթ Հովհաննիսյանը։

Լանջիկի դպրոցում կամավորների վերանորոգման աշխատանքները կավարտվեն մինչ նոր ուսումնական տարվա մեկնարկը։ Հաջորդ տարվա համար ծրագրի շրջանակներում կընտրվի  մարզի մեկ այլ  դպրոց։

«Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom,SHIRAK telecom , HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։